كوللاجدى جاساعان – قونىسباي شەجىمباي, «EQ»
10 جىلدىق تاريحى بار باعدارلاما ەلىمىزدىڭ حالقى تىعىز ورنالاسقان وڭتۇستىك وڭىرلەرىندەگى جاستاردى كادر جەتىسپەۋشىلىگى بار ەلىمىزدىڭ سولتۇستىك, باتىس جانە شىعىس وڭىرلەرىندە وقىتىپ, جۇمىسقا ورنالاستىرۋ ماقساتىندا قولعا الىنعان. بۇل باعدارلاما العاشىندا پەداگوگيكالىق ماماندىقتار بويىنشا ىسكە اسىرىلدى, كەيىننەن ونىڭ اياسى كەڭەيتىلىپ, تەحنيكالىق جانە اۋىلشارۋاشىلىق ماماندىقتار دا قامتىلا باستادى.
الەۋمەتتىك باستاما اياسىندا «سەرپىن» باعدارلاماسىمەن مامان دايارلايتىن جوعارى وقۋ ورىندارىنىڭ ءبىرى – ى.التىنسارين اتىنداعى ارقالىق پەداگوگيكالىق ينستيتۋتى. 2015 جىلى اتالعان الەۋمەتتىك جوبا بويىنشا العاشقى تالاپكەرلەرىن قابىلداعان وقۋ ورداسىن سوڭعى بەس جىل ىشىندە 700-گە جۋىق تۇلەك تامامداعان. الەۋمەتتىك باعدارلامانىڭ تالاپتارىنا سايكەس, گرانتتىق نەگىزدە وقۋعا تۇسكەن ستۋدەنت 4 جىلدىق بىلىمنەن كەيىن سول وڭىردە جۇمىسپەن وتەۋگە مىندەتتى.
ابۋداللاح وماربەكوۆ – «سەرپىن» باعدارلاماسىنىڭ تۇلەگى. ول 2021 جىلى «ماتەماتيكا مۇعالىمى» ماماندىعىن بىتىرگەن. ءۇش جىلدان بەرى اتالعان باعدارلاما بويىنشا مىندەتىن وتەپ, ەڭبەك ەتىپ ءجۇر. ا.وماربەكوۆ قازىر ارقالىق قالاسىنداعى ى.التىنسارين اتىنداعى مەكتەپ-گيمنازياسىندا ماتەماتيكا ءپانىنىڭ مۇعالىمى بولىپ جۇمىس ىستەيدى. Altynsarin institute-نىڭ «سەرپىندىك» تۇلەگى سوڭعى يننوۆاتسيا – جاساندى ينتەللەكتىنىڭ كومەگىمەن ساباق بەرەدى.
«جاساندى ينتەللەكتىنى انىقتاما, تەورەما ايتۋدا قولدانامىن, وقۋشىلار جاقسى قىزىعادى, ولاردىڭ نازارىن اۋدارادى. ەگەر بالا ساباققا قىزىعا قاتىسىپ, جاقسى تىڭداپ, ەسىندە ساقتاي السا, ءبىلىم ساپاسى دا كوتەرىلەدى. مەملەكەت باسشىسى ق.توقاەۆ جاساندى ينتەللەكتىنى فانتاستيكا ەمەس, ءومىردىڭ اقيقاتى ەكەنىن ايتتى. ياعني ءبىز جاڭا ومىرگە قادام باسىپ جاتىرمىز. وسىعان وراي, مەن ءوز جۇمىسىمدا زاماناۋي جەتىستىكتەردى قولدانۋدى قۇپ كوردىم, ءبىلىم مەن جاساندى ينتەللەكتىنىڭ ينتەگراتسياسى باعىتىن دامىتىپ ءجۇرمىن. جالپى, وسى جۇمىسىم بار, وعان وسىعان دەيىنگى وقۋىمدى قوسقاندا 7 جىلدان بەرى سولتۇستىك وڭىردە ءومىر ءسۇرىپ جاتىرمىن. بيىل ءۇشىنشى جىل «سەرپىن» باعدارلاماسىنىڭ تالابى بويىنشا جۇمىسپەن وتەپ كەلەمىن. بولاشاقتا دا وسىندا قالۋدى جوسپارلاپ وتىرمىن», دەيدى ا.وماربەكوۆ. «جىلدىڭ ۇزدىك مۇعالىمى» اتانعان ول قازىر مەكتەپتە وقۋشىلارمەن ماتەماتيكانىڭ ءارتۇرلى اسپەكتىلەرى مەن ونىڭ قولدانىلۋى جانە ۇدەرىستەردى وڭتايلاندىرۋ, ناقتى ماسەلەلەردى شەشۋ ءۇشىن ماتەماتيكالىق مودەلدەردى ازىرلەۋ سياقتى تاقىرىپتاردا عىلىمي زەرتتەۋ جۇمىستارىن جۇرگىزىپ جاتىر. شاكىرتتەرىمەن بىرگە ۇزدىك ناتيجەلەرگە قول جەتكىزگەن, حالىقارالىق, رەسپۋبليكالىق بايقاۋلاردىڭ جەڭىمپازى اتانىپ تا ۇلگەرگەن. ءاردايىم ءوزىن دامىتۋ ءۇشىن پەداگوگيكالىق بىلىكتىلىگىن ۇنەمى, ۇزدىكسىز جەتىلدىرىپ كەلەدى.
س.امانجولوۆ اتىنداعى شىعىس قازاقستان ۋنيۆەرسيتەتىندە (Amanzholov University) «سەرپىن» باعدارلاماسىمەن الماتى, قىزىلوردا, ماڭعىستاۋ, جامبىل, تۇركىستان, جەتىسۋ وبلىستارىنىڭ جاستارى تەگىن ءبىلىم الىپ, ءوزى قالاعان ورىندارعا جۇمىسقا ورنالاستى. ءتىپتى العاش «سەرپىن» باعدارلاماسى باستالعان ساتتە وقۋعا ءتۇسىپ, وسى جوبانىڭ اياسىندا ءبىلىم العانداردىڭ الدىڭعى قاتارى بۇگىندە دوكتورانتۋرادا ءبىلىمىن جالعاستىرىپ جاتىر. 2020-2021 وقۋ جىلىندا وسى باعدارلامانىڭ اياسىندا ۋنيۆەرسيتەتتى 30 ستۋدەنت ءتامامداسا, 2023-2024 وقۋ جىلىندا 100-گە جۋىق «سەرپىندىك» جاس Amanzholov University-ءدى تاڭداعان.
اتالعان ۋنيۆەرسيتەتتىڭ تاراتقان اقپاراتىنا سۇيەنسەك, 2014 جىلدان بەرى 1700-دەن اسا ءبىلىم الۋشى Amanzholov University-ءدى اياقتاپ, ۇلكەن ومىرگە قادام باستى. شىعىس ءوڭىردى تاڭداعان تالاي جاس وسى ايماقتىڭ ەكونوميكاسىن ىلگەرىلەتۋگە ۇلەس قوسىپ, ءبىلىم سالاسىنىڭ قازانىندا قايناپ جاتىر. ولاردىڭ اراسىندا شىعىسقا ءسىڭىسىپ, ءبىرجولا تۇراقتاپ جاتقان جاستاردىڭ دا قاراسى قالىڭ. بۇعان Amanzholov University-دەگى اكادەميالىق ۇتقىرلىق باعدارلاماسىنىڭ بەلسەندى ىسكە اسىرىلۋى, جاھاننىڭ ۇزدىك 200 جوعارى وقۋ ورىندارىمەن سەنىمدى ىنتىماقتاستىق ورناتۋى, ستۋدەنتتەردى تاجىريبەدەن وتكىزۋگە ەرەكشە دەن قوياتىنى سەبەپ بولىپ وتىر. جالپى, «سەرپىن» باعدارلاماسىنىڭ كەڭ اۋقىم الۋىنا, اتالعان باعدارلامامەن وقۋعا تۇسكەن جاستاردىڭ وسى ۋنيۆەرسيتەتتى تاڭداۋىنا ستۋدەنتتەردىڭ وزدەرى دە مول سەپتىگىن تيگىزىپ كەلەدى. تۇركىستان, قىزىلوردا, جەتىسۋ, الماتى, جامبىل وبلىستارىنىڭ قىز-جىگىتتەرى جىل سايىن قىسقى, جازعى دەمالىس ۋاقىتتارىندا وزدەرىنىڭ جەرلەس تالاپكەرلەرىنە كاسىپتىك باعدار بەرۋ جۇمىسىن وتكىزۋدى داستۇرگە اينالدىرعان. بيىلعى وقۋ جىلىندا باعدارلاما بويىنشا ونىنشى لەكتى قابىلداعان Amanzholov University-دە باعدارلاما اياسىندا كادرلار دايارلاۋ ءبىلىم باعدارلامالارىنىڭ 15 توبى بويىنشا, ونىڭ ىشىندە 23 ءبىلىم باعدارلاماسى بويىنشا جۇزەگە اسىرىلادى. اتالعان جوعارى وقۋ ورنىندا «سەرپىن» باعدارلاماسىمەن وقىپ جۇرگەن, وقىعان 50-دەن اسا ستۋدەنت رەسپۋبليكالىق بايقاۋلار مەن وليمپيادالاردىڭ جەڭىمپازى اتانىپتى.
ال س.تورايعىروۆ ۋنيۆەرسيتەتىندە 2015 جىلدان بەرى «سەرپىن» باعدارلاماسى بويىنشا 600-گە جۋىق جاس ءبىلىم الدى. 10 جىل بۇرىن باستاۋ العان باعدارلامامەن س.تورايعىروۆ ۋنيۆەرسيتەتىندە ستۋدەنتتەر اۆتوماتتاندىرۋ جانە باسقارۋ, ينجەنەرلىك جۇيەلەر جانە جەلىلەر, اقپاراتتىق جۇيەلەر, ساۋلەت, ازىق-ت ۇلىك ونىمدەرىن ءوندىرۋ تەحنولوگياسى جانە وزگە ماماندىقتار بويىنشا وقيدى.
«سەرپىن» باعدارلاماسىنىڭ ماقساتى – ءبىلىم بەرۋ كەڭىستىگىن بارىنشا تەرەڭدەتىپ, بارلىق ايماقتاردى, ونىڭ ىشىندە حالىق تىعىز ورنالاسقان وبلىستاردى قامتۋ. ستۋدەنتتىك جاستاردىڭ كوشى-قونى ەسەبىنەن ءبىز كادر تاپشىلىعىن ازايتىپ قانا قويماي, ءبىر-بىرىنەن الىس وڭىرلەردە تۇراتىن جاستار اراسىندا بايلانىس پەن ديالوگ الاڭىن قامتاماسىز ەتەمىز», دەيدى س.تورايعىروۆ ۋنيۆەرسيتەتىنىڭ رەكتورى ەركىن سادىقوۆ.
اتالعان ۋنيۆەرسيتەتتىڭ بەرگەن اقپاراتىنا قاراعاندا, «سەرپىن» باعدارلاماسى اياسىندا مەملەكەتتىك گرانت بويىنشا وقۋعا تۇسكەن تالاپكەرلەر جاتاقحانامەن تولىق قامتىلادى. وسىعان قوسا, ولار وقۋدى اياقتاعان سوڭ ەڭبەكپەن قامتۋ بويىنشا كومەك الۋعا قۇقىلى. نەگىزى جۇمىس كۇشى كوپ وڭىرلەردە جاستار اراسىندا جۇمىسسىزدىقتى ازايتۋ, كاسىبي كادرلاردى تولىقتىرۋ ماقساتىندا قورعا الىنعان بۇل باعدارلاما وڭىرلەردەگى عىلىمي الەۋەتتىڭ ارتۋىنا دا سەپتىگىن تيگىزىپ جاتىر ەكەن. ويتكەنى «سەرپىن» باعدارلاماسىمەن باكالاۆرياتتى بىتىرگەندەر اراسىندا كەيىن ىزدەنىس اياسىن كەڭەيتىپ, عىلىمعا باعىت الاتىندار بار. سونىڭ ءبىرى – «سەرپىن» باعدارلاماسىمەن س.تورايعىروۆ ۋنيۆەرسيتەتىندە وقىپ جۇرگەن ستۋدەنت ديلناز قانىبەكقىزى: «مەن ازىق-ت ۇلىك ونىمدەرىنىڭ تەحنولوگياسى ماماندىعى بويىنشا ءۇشىنشى كۋرستا وقيمىن. بۇل باعىت جوعارى سۇرانىسقا يە. وقۋىمدى تامامداعان سوڭ العان ءبىلىمىمنىڭ ارقاسىندا عىلىمي ەڭبەككە ارالاسسام دەيمىن. ماگيستراتۋراعا تۇسكىم كەلەدى», دەيدى.
