كوللاجدى جاساعان – قونىسباي شەجىمباي, «EQ»
بۇعان دەيىن د.قوناەۆ اتىنداعى تاۋ-كەن ءىسى ينستيتۋتىنىڭ ماماندارى «مايقايىڭالتىن» اق-نىڭ كەنىش شاحتالارىنا ءتۇسىپ, ولاردىڭ كەنشىلەر ءۇشىن قانشالىقتى قاۋىپسىز ەكەنىن تەكسەرىپ جاتقانى تۋرالى حابارلاعان ەدىك. ماماندار وڭ شەشىم شىعارسا, ءساۋىر ايىندا كەنىش قايتادان جۇمىسىن جالعاستىرۋى كەرەك ەدى. الايدا ينستيتۋت عالىمدارى ازىرشە كەنىشتىڭ جاعدايىن باعالاۋ بويىنشا قورىتىندىلارىن تاعى ءبىر سوزاتىنعا ۇقسايدى.
بۇل ەكى ارادا التىن كاسىپورنىندا ەڭبەك ەتەتىن مىڭعا جۋىق قىزمەتكەرلەردىڭ اراسىندا «شاحتا تولىعىمەن توقتايدى ەكەن», «مايقايىڭالتىن» بانكروت بولادى ەكەن» دەگەن الىپ-قاشپا اڭگىمە جەلدەي ەسىپ تۇر.
مايقايىڭدىق تۇرعىنداردىڭ بۇل ايتىپ جۇرگەندەرىنىڭ شىندىققا قانشالىقتى جاناساتىنىنا كوز جەتكىزبەك ويمەن, كاسىپورىننىڭ باس ديرەكتورى قۋانىش بوتيننەن قالىپتاسقان احۋالدى سۇراپ بىلدىك.
– «مايقايىڭالتىن» اق-نىڭ باسشىسى رەتىندە بۇل اقپاراتتىڭ شىندىققا جاناسپايتىن قاۋەسەت ەكەنىنە سەندىرە الامىن. اكتسيونەرلەرىمىز شاحتا جۇمىسىنىڭ جالعاسۋىنا, ادامدارىمىزدىڭ ءوز جۇمىس ورىندارىنا ورالىپ, كومبيناتتىڭ تولىققاندى تسيكلگە كوشۋىنە مۇددەلى. بۇل ماسەلەدە ولاردىڭ تاراپىنان دۇرىس ءارى ادىلەتتى كوزقاراس بار. كاسىپورىن توقتامايدى, ونى ءارى قاراي دامىتۋ ءۇشىن اكتسيونەرلەرىمىز قوسىمشا قارجى قۇيۋعا بەيىل تانىتىپ وتىر. قازىرگى ۋاقىتتا «مايقايىڭالتىن» اق-نىڭ كەنىشىندەگى اپاتتى تەرگەپ-تەكسەرۋ شارالارى ءالى دە جالعاسىپ جاتىر. بۇل ءىس-شارالار شامامەن 31 ناۋرىزدا اياقتالىپ قالادى دەگەن ءۇمىت بولعان ەدى. بىراق قۇزىرلى جانە قۇقىق قورعاۋ ورگاندارى ءالى دە ءبىراز ۋاقىت جۇمىس ىستەيتىنگە ۇقسايدى. قوناەۆ اتىنداعى تاۋ-كەن ءىسى ينستيتۋتىنىڭ ماماندارى شاحتالارىمىزعا ءتۇسىپ, ولاردىڭ قىزمەتكەرلەرىمىز ءۇشىن قانشالىقتى قاۋىپسىز ەكەنىن باعالاۋ ۇستىندە. نەگىزى بۇل زەرتتەۋدىڭ ءتۇيىنى دە 31 ناۋرىزدا قويىلىپ, وڭ شەشىم شىقسا شاحتاداعى ءوندىرىس جۇمىستارى ىسكە قوسىلادى دەپ ۇمىتتەنگەنبىز. بىراق ينستيتۋت وكىلدەرى بىزگە اسىقپاۋدى ەسكەرتتى. بارلىعىن ءجىتى زەرتتەپ شىقپاقشى. ارينە, ءبىز ءۇشىن قىزمەتكەرلەرىمىزدىڭ قاۋىپسىزدىگىنەن ماڭىزدى ماسەلە جوق. سوندىقتان زەرتتەۋدى جەرىنە جەتكىزۋگە كەلىستىك. ماماندار بارلىق جايتتى نازارعا الىپ, قاۋىپسىزدىكتى قامتاماسىز ەتەتىن ەسەپتەۋلەرىن جۇرگىزىپ جاتىر, – دەپ جاۋاپ بەردى ءوندىرىس ورنىنىڭ باسشىسى.
بەلگىلى بولعانداي, قازىر كەن بايىتۋ كومبيناتى مەن وزگە قۇرىلىمدىق بولىمشەلەردە جالپى سانى 580 ادام جۇمىس ىستەپ جاتىر. ال جۇمىسى شاحتامەن بايلانىستى 260 قىزمەتكەر ءماجبۇرلى ەڭبەك دەمالىسىندا. ولارعا ايلىق ەڭبەكاقىسىنىڭ 50 پايىزى مولشەرىندە جالاقى تولەنىپ وتىر.
كاسىپورىن باسشىلىعى جەراستىنا ءتۇسىپ كەتكەن اۆتوبۋس ىشىندەگى ارىستاي قوس ازاماتتى ىزدەۋدى جالعاستىرۋى مۇمكىن بە؟ ول ماسەلە ءالى كۇنگە باسى اشىق كۇيىندە تۇر. قازىر اپات ورىن العان جەردىڭ اينالاسى قورشالىپ, بارلىق جۇمىس توقتاتىلعان.
پاۆلودار وبلىسى
