قىس بويى مول جاۋعان قار كۇرت ەرىپ, وڭىردەگى وزەن-كول ارناسىنان اسارداي بولىپ قار سۋىنا مەلتەكتەپ تۇر. ەتەك-جەڭىن جيناماعان ەلدى مەكەندەرگە قىزىل سۋ كىرىپ, قاربالاس شاق تۋدى. ەل ەلەگىزىگەن شاقتا قايىرىمدى جانداردىڭ قامقورلىعى قىسىلعان جانداردىڭ قولتىعىنان دەمەيتىن پەرىشتە پەيىل ىسپەتتى. وبلىس ورتالىعىنداعى دوستىق ۇيىندە جاناشىرلىق كومەكتى جينايتىن ورىن اشىلدى. جەر-جەردەگى جايسىز حاباردان قۇلاقتانىپ جاتقان قالا تۇرعىندارى جىلى كيىمدەر مەن تازا توسەك ورىندارىن, قاجەتتى ازىق-ت ۇلىكتەرىن اكەلىپ, تاپسىرىپ جاتىر.
– ەشكىم قولقالاپ سۇراعان جوق. شىداپ وتىرا المادىق. قولىمىزدان كوپ نارسە كەلمەسە دە, قارا ورتكە سۋ شاشقان قارلىعاشتاي دەمەۋ بولايىق دەگەنىمىز عوي. بىرلىگى بەكەم ەلدىڭ ەرتەڭى نۇرلى, – دەيدى قالا تۇرعىنى ەسەنباي احمەتوۆ.
جۇرەك جىلۋىنىڭ حوش ءيىسى اڭقىپ تۇرعان جينالعان زاتتار تابيعات اپاتىنان زارداپ شەككەندەرگە پىشاق ۇستىندە ۇلەستىرىلىپ جاتىر. الدىمەن وبلىس ورتالىعىنداعى ەلەۆاتور اۋدانىنىڭ تۇرعىندارىنا قالالىق بەيىمدەۋ ورتالىعىندا ورنالاسقان ەل كومەگى جينالعان جەردەن جىلى كيىمدەر, ازىق-ت ۇلىك تاراتىلىپ جاتىر. العاشقى ەكى كۇننىڭ ىشىندە 1,6 ملن تەڭگە قاراجات, ارقيلى زاتتار جينالىپ, قارعىن سۋدىڭ كەسىرىنەن زارداپ شەككەن 33 وتباسىنا كومەك كورسەتىلدى. شارۋاشىلىق تاۋارلارى مەن كۇندەلىكتى وتە قاجەتتى كەرەك-جاراقتار جاڭا يەلەرىن تاپتى. زارداپ شەككەندەر مەن كۇنى-ءتۇنى بەل شەشپەي جۇمىس ىستەپ جاتقان قۇتقارۋ قىزمەتىنىڭ ادامدارىنا ارناپ تىگىلگەن شاتىرلى قالاشىقتا ۇزىن-ىرعاسى 800 مىڭ تەڭگە بولاتىن ازىق-ت ۇلىك پەن ىستىق تاماق بەرىلدى. قايىرىمدى جۇرەكتەردىڭ ءلۇپىلىن سەزدىرەتىن قىرۋار ءىس ءالى دە جالعاسا بەرمەك.
كوكشەتاۋ
