«كەلەر ۇرپاق شاكەن اعامىزدىڭ قانداي ادام بولعانىن, ونىڭ ءومىرى قالاي ورىلگەنىن ءبىلسىن دەگەن نيەتتەن تۋىپ وتىر. جيناققا ولجاس سۇلەيمەنوۆ, ءابىش كەكىلباەۆ, ءاسانالى ءاشىموۆ, بيبىگۇل تولەگەنوۆا, اكىم تارازي, اشىربەك سىعاي جانە ايگىلى ارتىسپەن يىق تىرەسىپ جۇمىس ىستەگەن وزگە دە ونەر قايراتكەرلەرىنىڭ ەستەلىك ماقالالارى ەندى. كولەمى 345 بەت بولىپ شىقتى. شاكەن اعا قانداي فيلم تۇسىرسە دە, ۇلتتىق قۇندىلىقتاردى دارىپتەگەن. وسى ەرەكشەلىكتەردى نەگىزگى ۇستانىم ەتىپ, كىتاپتىڭ بايانىنا سىڭىردىك», دەپ اتاپ ءوتتى كىتاپتىڭ قۇراستىرۋشىسى, فيلولوگيا عىلىمدارىنىڭ كانديداتى, س.تورايعىروۆ ۋنيۆەرسيتەتىندەگى ە.بەكماحانوۆ اتىنداعى ولكەنىڭ تاريحى مەن مادەنيەتىن زەرتتەۋ ورتالىعىنىڭ ديرەكتورى امانتاي قۇداباەۆ.
كىتاپتىڭ تۇساۋكەسەرىنە وراي شاكەن ايمانوۆتىڭ 110 جىلدىعىنا ارنالعان حالىقارالىق عىلىمي-پراكتيكالىق كونفەرەنتسيا ءوتتى. وعان پاۆلودار وبلىسىنىڭ اكىمى اسايىن بايحانوۆ, قازاقستاننىڭ ەڭبەك سىڭىرگەن قايراتكەرى, كينورەجيسسەر, ستسەناريست, پروديۋسەر, قازاق ۇلتتىق ونەر ۋنيۆەرسيتەتىنىڭ پروفەسسورى سلامبەك تاۋەكەل, قازاقستاننىڭ ەڭبەك سىڭىرگەن ءارتىسى شاحيماردان ءابىلوۆ, تەاتر جانە كينو اكتەرى ەرگەنباي ءابۋ جانە س.تورايعىروۆ ۋنيۆەرسيتەتىنىڭ عالىمدارى قاتىستى.
– شاكەن ايمانوۆ – قالىپقا سىيمايتىن تۇلعا ەدى. قازاق كينو ونەرىنىڭ نەگىزىن سالۋشىلاردىڭ ءبىرى بولىپ قانا قويعان جوق, ونى الەمگە تانىتىپ, مويىنداتتى. ونىڭ رەسەيدە, كسرو-نىڭ وزگە ەلدەرىندە, شەت مەملەكەتتەردە دوستارى كوپ ەدى. مەن ماسكەۋدە ءبىلىم الىپ جۇرگەندە شاكەن اعا ىسساپارمەن كەلە قالسا قازاق جاستارىن ىزدەپ, ارنايى قوناق ەتەتىن. بىزگە ءوز قولىمەن پالاۋ باسىپ بەرۋشى ەدى جارىقتىق. قاراپايىمدىلىعىندا شەك جوق. بىردە ماسكەۋدە وتكەن فەستيۆالدە اعىلشىن-امەريكان اكتريساسى ەليزابەت تەيلورمەن جۇپتاسىپ بيلەپ, ءبىرىنشى ورىندى جەڭىپ الدى. ال ەندى ازىلقويلىعى بولەك ونەرتۇعىن. كسرو كينو جانە تەاتر مايتالماندارىنىڭ اراسىندا ابىروي-بەدەلى وتە بيىك بولدى. 1970 جىلى جەلتوقسان ايىندا تۋعان ەلىنە سۇيەگىن الىپ كەتۋگە بارعانىمىزدا ماسكەۋدىڭ بۇكىل زيالى قاۋىمى كۇڭىرەنىپ قوشتاستى, – دەپ تەبىرەندى سلامبەك تاۋەكەل.
شاحيماردان ءابىلوۆ تە رەجيسسەردەن تاربيە الىپ, تاعىلىمىن كورگەن جان. ول شاكەن اعانىڭ لوندونداعى حالىقارالىق فەستيۆالدە وتەللونىڭ مونولوگىن قازاق تىلىندە وقىپ, اكتەرلىك شەبەرلىگىمەن جەرگىلىكتى كورەرمەندى ءتانتى ەتكەنىن, سوڭىنان گران-پري جۇلدەسى تاعى ءبىر اكتەرمەن قوسا ايمانوۆقا دا بەرىلگەنىن مايىن تامىزا اڭگىمەلەدى.
كونفەرەنتسيادا بۇقار جىراۋ اتىنداعى ادەبيەت جانە ونەر مۋزەيى ش.ايمانوۆ پەن كاۋكەن كەنجەتاەۆتىڭ شىعارماشىلىعى مەن ءومىرى جايىندا كورمە ۇسىندى.
پاۆلودار وبلىسى
