كەزدەسۋ بارىسىندا الەمدە تەڭدەسى جوق « ۇلى دالا جورىعى» بىرەگەي جوباسى جان-جاقتى تالقىلاندى. ۇلتتىق سپورت قاۋىمداستىعىنىڭ قولداۋىمەن 2024 جىلى حالىقارالىق دەڭگەيدە وتكىزىلگەلى وتىرعان مارافون-بايگەنىڭ ۇيىمداستىرۋ ماسەلەلەرى دە كەڭىنەن ءسوز بولدى. قر سىرتقى ىستەر مينيسترلىگى ءوز كەزەگىندە شەتەلدىك ديپلوماتيالىق وكىلدىكتەرمەن جانە ۇيىمدارمەن بايلانىس ورناتۋعا ەرەكشە قولداۋ كورسەتىپ جاتىر.
ب.تۇرلىبەكوۆ ديپلوماتتى الداعى مارافون-بايگەگە دايىندىق بارىسىندا تىعىز ىنتىماقتاستىق ءۇشىن ازەربايجان رەسپۋبليكاسىنىڭ ات سپورتى فەدەراتسياسىمەن بايلانىس ورناتۋعا ىقپال ەتۋگە شاقىردى.
بۇعان جاۋاپ رەتىندە ازەربايجان ەلشىسى ات سپورتى فەدەراتسياسىنىڭ جوبالارىن, سونىڭ ىشىندە ازەربايجان شاباندوزدارىنىڭ, سونداي-اق الەمدەگى ەڭ مىقتى جىلقى تۇقىمدارى, ازەربايجاننىڭ ۇلتتىق سيمۆولىنا اينالعان قاراباق ارعىماقتارىنىڭ « ۇلى دالا جورىعى» مارافون-بايگەسىنە قاتىسۋىنا ىقپال جاسايتىنىن جەتكىزدى.
بيىل « ۇلى دالا جورىعى» حالىقارالىق ءدۇبىرلى دوداسىنىڭ بوتاي (سقو) - بوزوق (استانا) جاڭا باعىتى تاڭدالىپ الىندى. كەم دەگەندە 15 شەتەلدىك كوماندا قاتىسادى دەپ كۇتىلىپ وتىرعان بيىلعى مارافون-بايگەنىڭ قاشىقتىعى 500 شاقىرىمدى قۇرايدى.
مارافون-بايگەنىڭ بوتايدان باستالۋىنىڭ ءمانى تەرەڭ – ادام بالاسى جىلقى مالىن ءدال وسى جەردە العاش رەت قولعا ۇيرەتكەن, ول عىلىمي دالەلدەنگەن. ال VIII–X عع. كونە تۇركىلەردىڭ كيەلى مەكەنى بولعان استانا ماڭىنداعى بوزوق قالاشىعى - جارىستىڭ اياقتالۋ نۇكتەسى.
« ۇلى دالا جورىعى» – جىلقىنىڭ ەڭ مىقتى تۇقىمى انىقتالاتىن دالالىق لابوراتوريا.
