اۋدان اكىمى رۋسلان نۇرمۇحانبەتوۆ پاتەر يەلەرىنە كىلت تابىستاپ, قۋانىشىنا ورتاقتاستى. جاڭا باسپانا يەلەرىنە قۇتتى بولسىن ايتىپ, مۇنداي يگىلىكتى شارۋانىڭ ءارى قاراي دا جالعاساتىنىن اتاپ ءوتتى.
اتا-انا قاراۋىنسىز قالعان بالالار مەن جەتىمدەردىڭ جەرگىلىكتى اتقارۋشى ورگان جالداعان تۇرعىن ۇيدەن ءبىرىنشى كەزەكتە باسپانا الۋعا قۇقى بار. ءارى باسپانامەن قامتۋدى اكىمدىك جۇزەگە اسىرىپ وتىرادى.
ءۇي كەزەگىندە تۇرعان وسىنداي ساناتتاعى جاندارعا وساكاروۆ اۋدانىندا 2020 جىلدان بەرى جاڭا ۇيلەر سالىنىپ جاتىر. كەزەڭ-كەزەڭىمەن كەزەكتە تۇرعان جاندارعا ۇلەستىرىلىپ كەلەدى. بۇل جولى اتا-انا قامقورلىعىنسىز قالعان بەس بالاعا, كوپبالالى ءۇش وتباسىعا جانە الەۋمەتتىك وسال توپقا جاتاتىن 10 ادامعا پاتەر كىلتى تابىستالدى.
جاڭا ۇيگە جاۋاپتى بولعان مەردىگەر كومپانيا پاتەر ىشىنە تولىق جوندەۋ جاساعان. ەكى جانە ءۇش بولمەدەن تۇراتىن پاتەر ءىشى كەڭ ءارى جارىق. بارلىق پاتەر تۇرعىن ءۇي كوممۋنالدىق شارۋاشىلىعىنا بەرىلگەن. ونداعى ماماندار كەزەكتە تۇرعان جاندارعا ۇلەستىرىپ بەرگەن. ءساۋىر ايىندا تاعى سەگىز وتباسىن باسپانامەن قامتاماسىز ەتۋدى جوسپارلاپ وتىر. ونىڭ ىشىندەگى ەكى پاتەر اسىراۋشىسىنان ايىرىلعان جاندارعا بەرىلمەك.
جەرگىلىكتى اكىمدىكتىڭ دەرەگىن سويلەتسەك, وساكاروۆ اۋدانىندا تۇرعىن ۇيگە مۇقتاجدار رەتىندە ەسەپتە تۇرعاندار تىزىمىندە 996 ادام بار. ونىڭ 626-سى – جەتىم بالالار. ال 176-سى – الەۋمەتتىك وسال توپتاعىلار. بۇعان قوسا 136 بيۋدجەتتىك ۇيىمداردىڭ قىزمەتكەرى, 49 كوپبالالى وتباسى دا بار. 9 وتباسىنىڭ ءۇيى قاۋىپتى دەپ تانىلعان.
ءۇيدىڭ كەزەگىندە ەكى جىل تۇرىپ, جاڭا ۇيدەن ءۇش بولمەلى پاتەر يەلەنگەننىڭ ءبىرى – ولگا يرجاۆسكايا. ءۇش قىز, ءبىر ۇل تاربيەلەپ وتىرعان كوپبالالى انانىڭ قۋانىشىندا شەك جوق. بۇعان دەيىن اتا-ەنەسىمەن بىرگە تۇرىپ كەلگەن.
– مۇندا بارلىق جاعدايىمىز ويلاستىرىلعان. جوندەۋ جۇمىستارى تولىق جۇرگىزىلىپتى. ەدەنى قاپتالىپ, قابىرعالارى سىلانعان. ءبىز تەك كوشىپ كەلە سالامىز. ۇلكەنىم 11 جاستا بولسا, كەنجەمىز – التىدا. بالالارىممەن بىرگە ءۇيىمىزدى كورىپ, كىلتىمىزدى الدىق. ولار ەرەكشە قۋانىپ ءجۇر. ەندى تەزىرەك كوشكىلەرى كەلەدى, – دەيدى ولگا الەكساندروۆنا.
مىنە, ءبىر-اق كۇندە كورشى بوپ شىعا كەلگەن 18 وتباسى كەزەك-كەزەك قونىستوي تويلايدى.
قاراعاندى وبلىسى,
وساكاروۆ اۋدانى
