مارقۇمنىڭ تۋىستارىنىڭ ايتۋىنشا, ولار بولعان جايتقا وكىنەتىنىن ايتىپ, كەشىرىم سۇراپ بارعان, بىراق ولار كەشىرىم بەرمەيتىنىن ايتىپ, كىنالى تاراپتان بىردە-ءبىر تيىن المايمىز دەپ وتىر.
كتك تەلەارناسى مالىمدەگەندەي, نۇربول قايىپباەۆتى ءۇش بالاسى مەن تۋعان-تۋىسى كەشە اقتىق ساپارعا شىعارىپ سالدى. قاسىرەتتەن جۇرەگى قانسىراعان انا مەن جەسىرى مارقۇمدى جوقتاۋعا شاماسى كەلمەي, وزدەرىن ارەڭ ۇستاپ وتىر. قاپىداعى ءولىم نۇربولدىڭ اعا-باۋىرلارىن دا ءبىراز ەسەڭگىرەتكەن. ولار جانازا كەزىندە كۇدىكتىنىڭ تۋىستارى اقشا ۇسىنعانىن ايتتى.
«الدىمىزدان ءوتتى, «كەشىرىڭىزدەر» دەدى, بىراق كەشىرىم بولمايدى دەدىك, سوت بولادى. ءادىل سوت بولعانىن قالايمىز دەدىك. جەڭگەمە «ماعان ءنومىرىن بەر, اقشا سالىپ جىبەرەيىن» دەيدى. ونداي كومەك كەرەك ەمەس دەدىم, ەشقانداي كومەك كەرەك ەمەس. ەلدىڭ ءبارى, بۇكىل قازاقستان بولىپ جيناپ جاتىر. «كەشىرىم بولمايدى» دەدىم, بولدى», دەدى مارقۇمنىڭ ءىنىسى رۋسلان قايىپباەۆ.
ايىبىن جۋىپ-شايماق بولىپ اقشا ۇسىنعانداردىڭ كۇدىكتىگە قانداي جاقىندىعى بارى بەلگىسىز. ويتكەنى ونىڭ اكەسى اقشا ۇسىنباق تۇگىلى, كۇزەتشىنى ولتىرگەندى تانىمايمىن دەپ باسىن الا قاشقان.
قاپىدا وتاعاسىنان ايىرىلعان جارى مەن ءۇش بالاسىنا اۋىر سوققى بولدى. ۇلكەنى 14 جاسقا تولسا, كەنجەسىڭ جاسى 5-تە. بارلىعى جالدامالى پاتەردە تۇرادى. جەسىر قالعان جارىنىڭ شوتىنا ەل ازاماتتارى قازىر كوڭىل ايتىپ, جاپپاي اقشا اۋدارىپ جاتىر.
«تەرگەۋدىڭ جان-جاقتى ءارى ءادىل بولۋى ءۇشىن بارلىق دالەل-دايەكتەردى جيناپ ءجۇرمىز. وسى تۇرعىدا جابىرلەنۋشىلەرگە بارىنشا كومەك كورسەتىپ جاتقان ازاماتتارعا العىس ايتامىز. قارجىلاي كومەك بەرگىسى كەلەتىن جاندارعا ايتارىمىز, مارقۇمنىڭ باۋىرى رۋسلان مەن جۇبايى اسەمگە اۋدارساڭىزدار, سەبەبى جابىرلەنۋشىلەردىڭ اتىن جامىلعان الاياقتار كوبەيىپ كەتتى. اباي بولىڭىزدار», دەدى قورعاۋشى اسىلبەك ءابدىرايىموۆ.
