اتاپ ايتقاندا, اۋە كەمەسىنىڭ كومانديرى — پودپولكوۆنيك قانات احمەتوۆ, تىكۇشاق ەسكادريلياسى كومانديرىنىڭ ينجەنەرلىك-اۆياتسيالىق قىزمەت جونىندەگى ورىنباسارى — پودپولكوۆنيك اسحات جۋكين, شتۋرمان - اعا لەيتەنانت نۇربولات سوۆەتبەكوۆ سۋ باسقان اۋدانداردان ازاماتتاردى قۇتقارۋ ءۇشىن اۋەگە كوتەرىلدى.
«قازىرگى ۋاقىتقا دەيىن شىعاناق بەرسيەۆ اتىنداعى اۋىلدىق وكرۋگ پەن قاراتاۋ اۋىلىنان 142 ادام ەۆاكۋاتسيالاندى, ولاردىڭ ىشىندە 85 بالا بار. ولار اقتوبە وبلىسى ويىل اۋدانىنىڭ ويىل اۋىلىنا كوشىرىلدى. قاۋىپسىز جەرگە جەتكىزىلگەندەردىڭ باسىم بولىگى قاريالار, بالالار مەن ايەلدەر. سونداي-اق ۇلتتىق ۇلاننىڭ اسكەري بورتتارىنىڭ ەكيپاجدارى اقتوبە مەن ورالدا دا بەلسەندى جۇمىسىن جالعاستىرىپ ءجۇر. ول جاقتاردا اۋە كولىگىمەن نان, سۋ, ماكارون, كارتوپ, كونسەرۆىلەر جونەلتىلدى», دەدى پودپولكوۆنيك قانات احمەتوۆ.
كەيبىر ەلدى مەكەندەردەگى سۋ ءبىر مەترگە دەيىنگى بيىكتىككە نەمەسە ودان دا جوعارى دەڭگەيگە كوتەرىلگەن. سوندىقتان ۇلاندىقتار تجم جەكە قۇرامىمەن بىرلەسىپ سۋ قويمالارى مەن وزەندەردىڭ تولىمدىلىعىنا مونيتورينگ جۇرگىزەدى. قازىرگى ۋاقىتتا اقتوبە, سازدى, اششىساي جانە جارتاس سۋ قويمالارى ترانزيتتىك رەجيمدە جۇمىس ىستەپ تۇر. سۋدى بەلسەندى اعىزۋ جۇزەگە اسىرىلىپ جاتىر. جيناقتاۋ رەجيمىندە قارعالى سۋ قويماسى ورنالاسقان. اكىمدىكتەر سۋ تاسقىنى جاعدايىنىڭ شيەلەنىسۋ قاۋپى بار وڭىرلەردە الدىن الۋ ءىس-شارالارىن جۇرگىزۋگە كىرىسكەن. قاجەت بولعان جاعدايدا قوسىمشا كۇشتەر مەن قۇرالدار تارتىلادى.
وتكەن تاۋلىكتە, تاۋلىكتىڭ تۇنگى ۋاقىتىن قوسا العاندا, قۇتقارۋشىلاردىڭ, ەرىكتىلەردىڭ جانە ۇلتتىق ۇلان اسكەري قىزمەتشىلەرىنىڭ بىرلەسكەن كۇش-جىگەرىمەن اسا قاۋىپتى جانە قاۋىپ ءتونۋى مۇمكىن ۋچاسكەلەردە 250 توننا ينەرتتى ماتەريالدار جينالىپ, سۋ جاعاسىنا قۇم تولى 600 قاپ توسەلگەن. سونىمەن قاتار 800 تەكشە مەتر سۋ شىعارىلعان.
