قوستاناي وبلىسىنىڭ سۋ باسقان اۋداندارىندا بالالاردى وقىتۋ قالاي ۇيىمداستىرىلادى؟

وبلىس باسشىسى قۇمار اسكساقالوۆتىڭ توراعالىعىمەن وبلىستىق جەدەل شتاب ءوز جۇمىسىن جالعاستىرۋدا.

وبلىس اكىمىنىڭ العاشقى تاپسىرمالارىنىڭ ءبىرى زارداپ شەككەن اۋدانداردىڭ بالالارى ءۇشىن وقۋ پروتسەسىن ۇيىمداستىرۋ, سونىڭ ىشىندە ولاردى كيىممەن, وقۋلىقتارمەن جانە كەڭسە تاۋارلارىمەن قامتاماسىز ەتۋ بولدى.

اۋداندار بويىنشا بارلىعى 267 بالا ەۆاكۋاتسيالاندى, ونىڭ 215 - ءى مەكتەپ جاسىنداعى, 52-ءسى مەكتەپكە دەيىنگى جاستاعى بالالار.

بۇگىنگى تاڭدا بالالار تۋىستارىنىڭ جانىندا تۇرادى جانە وتباسىلارىمەن بىرگە ەۆاكۋاتسيالىق پۋنكتتەرگە ورنالاستىرىلعان.

ارقالىق قالاسىنا ەۆاكۋاتسيالانعان بالالاردىڭ وقۋ پروتسەسى م. اۋەزوۆ اتىنداعى № 5 جببم - دە ەكىنشى اۋسىمدا ۇيىمداستىرىلادى.

امانگەلدى جانە جانگەلدى اۋداندارىنداعى سۋ تاسقىنىنان زارداپ شەككەن وتباسىلار ينتەرناتتا جانە تورعاي كەنتىنىڭ شىعارماشىلىق ۇيىندە ورنالاسقان.

جالپى, قاشىقتان وقىتۋ 11 مەكتەپتە ۇيىمداستىرىلادى: امانگەلدى اۋدانىنىڭ 10 مەكتەبى (1739 بالا) جانە جانگەلدى اۋدانىنىڭ 1 مەكتەبى (44 بالا).

وقۋ ۇدەرىسى ءۇشىن بارلىق قاجەتتى قۇرالدارمەن وقۋشىلار قامتاماسىز ەتىلدى, بۇعان قاراجات جالپىعا بىردەي ءبىلىم بەرۋ قورىنان الىندى.

«مەكتەپتەردە بالالارعا ارنالعان كابينەتتەر, وقۋلىقتار دايىن, توقساننىڭ ءبىرىنشى كۇنىنەن باستاپ وقۋشىلاردىڭ تاماقتانۋى ۇيىمداستىرىلادى. بارلىق بالالار مەكتەپ فورماسىمەن جانە كەڭسە تاۋارلارىمەن قامتاماسىز ەتىلگەن», دەپ اتاپ ءوتتى ءبىلىم باسقارماسى.