بۇگىن تورعايدان اقكولگە قاراي شىعىپ ەدىك, 40 شاقىرىمنان ءارى جۇرە الماي ورتا جولدان كەرى قايتتىق. ودان كولقامىس, ارالباي, كوكالاتقا قاراي بۇرىلىپ ەدىك, ارالبايدىڭ تۇسىندا ىركىلدىك. بۇگىن ساعات ونعا دەيىن اشىق تۇرعان جولدى ەكى جەردەن سۋ جىرىپ كەتكەن. سۋدىڭ ەكپىنى قاتتى. كوتەرمە جولدىڭ ۇستىنەن اسىپ اعىپ جاتىر. ەنى 200 مەتردەي بولادى.
كولقامىس اۋىلىندا 28 ۇيگە سۋ كىرىپ كەتكەن. اۋدان اكىمى سۋ تاسقىنى ءتونىپ تۇرعان ەلدى مەكەندەردەن 250 ادام ەۆاكۋاتسيالانعانىن ايتتى. ولار تورعاي, ارقالىقتاعى تۋىس-تۋعاندارىنىڭ ۇيىنە ورنالاسقان. اۋدان ورتالىعى تورعايدا ەكى ەۆاكۋاتسيالىق ورتالىق, ەرىكتىلەر شتابى جۇمىس ىستەپ جاتىر. كەشە تۇندە ءماجىلىس دەپۋتاتى ەركىن ءابىل باستاعان امانات پارتياسىنىڭ وكىلدەرى تورعايعا ۇلكەن جۇك كولىگىمەن گۋمانيتارلىق كومەك اكەلدى.
اۋدان 5 كۇننەن بەرى جارىقسىز وتىر. ۇيالى تەلەفون بايلانىسى بىردە بار, بىردە جوق. امانگەلدى مەن تورعايدىڭ اراسىنداعى جولدا بەلۋاردان سۋعا مالشىنىپ, قۇلاعان باعانداردى تۇرعىزىپ, ۇزىلگەن سىمداردى جالعاپ, جانتالاسىپ جۇرگەن ەنەرگەتيك مامانداردى كوردىك.
«قازىر جاعداي كۇردەلى. وسىدان 4-5 كۇن بۇرىنعى جاعداي ايماعىمىزدا جاتقان قاردىڭ ەرۋىنەن بولسا, قازىر سىرتتان كەلىپ جاتقان تاسقىن سۋ اۋدان اۋماعىن باسىپ ءوتىپ جاتىر. كوپ بولىپ جۇمىلىپ, سۋ تاسقىنىنا قارسى كۇرەسىپ جاتىرمىز. جاعداي ساعات سايىن قۇبىلىپ تۇر. ەڭ باستىسى - ەلدىڭ اماندىعى. جان-جاقتان اعىلىپ كومەككە كەلىپ جاتقاندار كوپ», دەدى جانگەلدين اۋدانىنىڭ اكىمى شوتا وسپانوۆ.
تورعايدا جاڭا عانا جارىق جاندى. جاركول اۋىلىنا سۋ كىردى دەگەن سۋىت حابار جەتتى.
