فوتو: primeminister.kz
سوڭعى كۇندەرى اقتوبە وبلىسىندا بولعان سۋ تاسقىنىنان 237 ءۇي سۋعا كەتتى, 2870 ادام ۋاقىتشا پۋنكتتەرگە ورنالاستىرىلدى. وڭىردەگى اپاتتى-قۇتقارۋ جۇمىستارىنا قورعانىس مينيسترلىگى, ۇلتتىق گۆارديا, ىشكى ىستەر مينيسترلىگى, تۇرعىن ءۇي-كوممۋنالدىق كاسىپورىندارىنان 1700 ادام جۇمىلدىرىلدى.
وتكەن تۇندە ەرىگەن قار سۋى جان-جاقتان قۇيىلۋى سالدارىنان اقتوبە سۋ قويماسى كۇرت تولعان سوڭ اپاتتى جاعداي ورناپ, باسى ارتىق سۋ جىبەرىلە باستادى. ەلەك پەن قارعالى وزەندەرى دەڭگەيىنەن اسىپ, جاعالاۋداعى تۇرعىن ۇيلەرگە سۋ كىردى. قازىرگى ۋاقىتتا قالاعا ەرەكشە قاۋىپ توندىرگەن اقتوبە سۋ قويماسىنداعى جاعداي تۇراقتاندى. ونىڭ گيدروتەحنيكالىق قوندىرعىلارىنان سەكۋندىنا 1 مىڭ تەكشەمەتردەن سۋ جىبەرىلىپ جاتىر.
پرەمەر-ءمينيستردىڭ ءبىرىنشى ورىنباسارى سۋ تاسقىنىنان زارداپ شەككەن تۇرعىنداردىڭ جاعدايىن ارنايى قۇرىلاتىن كوميسسيا قاراستىراتىنىن, ەگەر جەرگىلىكتى بيۋدجەت قارجىسى جەتكىلىكسىز بولسا, رەسپۋبليكادان قاجەتتى قولداۋ كورسەتىلەتىنىن مالىمدەدى. سونداي-اق تاسقىن بۇزعان جەرگىلىكتى ماڭىزى بار جولدار وبلىستىق بيۋدجەت ەسەبىنەن, رەسپۋبليكالىق ماڭىزى بار جولدار رەپۋبليكالىق بيۋدجەت ەسەبىنەن جوندەلەتىنىن ايتتى. وتكەن ءتۇنى سامارا-شىمكەنت اۆتوكولىك جولىنىڭ 340-شى شاقىرىمىندا, ىرعىز اۋدانى قۇرىلىس ەلدى مەكەنىنىڭ تۇسىنداعى كوپىردى سۋ شايىپ كەتتى. قازىر بۇل جەردە كولىكتەر وتە الماي تۇر. 10-12 ساعاتتان كەيىن اۆتوجولدىڭ زاقىم كەلگەن بولىگىندە جول قوزعالىسى قالپىنا كەلتىرىلمەكشى.
كەشە اقتوبە قالاسى مەن مۇعالجار, قوبدا اۋداندارىندا, بۇگىن ويىل اۋدانىندا جەرگىلىكتى دەڭگەيدەگى توتەنشە جاعداي جاريالاندى. الايدا وڭىردە سۋ تاسقىنى قاۋپى ءالى سەيىلگەن جوق.
اقتوبە وبلىسى
