فوتو: قر تجم
اباي اۋدانى:
قاراعاندى - اياگوز - تارباعاتاي - بوعاز تاس جولىندا (707-دەن 941 شاقىرىمعا دەيىن) جەڭىل اۆتوكولىكتەر ءۇشىن قوزعالىس شەكتەلدى. ايتا كەتەيىك, جولدىڭ 878 جانە 923 شاقىرىمىندا ديامەترى 1 مەتر ءبىر نۇكتەلى قۇبىر مەن ەكى ارالىقتى كوپىر بار.
«جولدىڭ ءوتۋ مۇمكىندىگىن ساقتاۋ ءۇشىن فيليال ماماندارى جول جيەكتەرىن نىعايتۋ, قاپ كونتەينەرلەرىن ورناتۋ جانە جاساندى جاعالاۋلار جاساۋ جۇمىستارىن جۇرگىزىپ جاتىر. جۇمىسقا 7 تەحنيكا جۇمىلدىرىلدى, ونىڭ ىشىندە جۇك تيەگىشتەر, ساموسۆالدار جانە اۆتوگرەيدەرلەر بار», دەپ ءتۇسىندىردى «قازاۆتوجول».
اقتوبە وبلىسى:
قاندىاعاش – ەمبى – شالقار – ىرعىز تاس جولىندا (288 شاقىرىم) سۋ تاسقىنى بولدى. بۇل اۋماقتا ديامەترى 1,5 مەتر بولاتىن ءبىر نۇكتەلى سۋ وتكىزگىش قۇبىر بار.
«سۋدىڭ ودان ءارى اعىپ كەتۋىنە جول بەرمەۋ ءۇشىن 650 قۇم سالىنعان قاپ قويىلىپ, قوسىمشا 480 توننا قۇم جەتكىزىلدى.تاسۋدىڭ سالدارىن جويۋ ءۇشىن بەس جول جۇمىسشىسى, ءۇش بىرلىك مامانداندىرىلعان تەحنيكا (متز, تيەگىش, كاماز) جۇمىلدىرىلدى», دەپ حابارلادى جول قىزمەتكەرلەرى.
27 ناۋرىز كۇنى ساعات 20:15-تەن باستاپ قاندىاعاش – ەمبى – شالقار – ىرعىز تاس جولىنىڭ 3-ءشى شاقىرىمىنان 92-ءشى شاقىرىمىنا دەيىنگى ۋچاسكەدە كولىكتىڭ بارلىق ءتۇرى ءۇشىن قوزعالىسقا شەكتەۋ ەنگىزىلدى.
سونداي-اق بۇگىن تاڭعى ساعات 8:00-دەن باستاپ سامارا-شىمكەنت جولىنىڭ ۋچاسكەسىندە (526-شى شاقىرىمنان 618-ءشى شاقىرىمعا دەيىن) جەڭىل اۆتوكولىكتەر قوزعالىسىنا ۋاقىتشا شەكتەۋ ەنگىزىلدى.
«سۋدىڭ ودان ءارى اعۋىن بولدىرماۋ ءۇشىن 200 قۇم سالىنعان قاپ قويىلىپ, قوسىمشا 40 توننا قۇم جەتكىزىلدى. 5 ادام مەن 2 تەحنيكا جۇمىلدىرىلدى. سونداي-اق جولدى نىعايتۋعا 110 توننا قۇم جانە 450 قۇم سالىنعان قاپ دايىندالدى. سۋدى شىعارۋعا 15 ادام مەن 7 تەحنيكا جۇمىلدىرىلدى», دەپ ءتۇسىندىردى «قازاۆتوجول» ءباسپاسوز قىزمەتى.
قوستاناي وبلىسى:
جەزقازعان – پەتروپاۆل تاس جولىنىڭ 269-شاقىرىمىندا (جازعىزتال كەنتىنەن 28 شاقىرىم) سۋ تاسقىنى بولدى. بۇل ايماقتا ديامەترى 2,5-تەن 2 مەترگە دەيىن ءۇش نۇكتەلى تۇتىك قۇبىرى بار. كولىك قوزعالىسىنا شەكتەۋ قويىلماعان. دەگەنمەن, جولعا ۋاقىتشا وزگەرىستەر ەنگىزۋ ءۇشىن ۋاقىتشا جول بەلگىلەرى مەن باعانالار ورناتىلدى. جول توسەمىن وقشاۋلاۋ ءۇشىن كولەمى 150 تەكشە مەتر بولاتىن ينەرتتى ماتەريال (ۇساتقىش, قيىرشىق تاس) دايىندالدى. ءۇش تەحنيكا مەن توعىز ادام جۇمىلدىرىلدى.
ۇلىتاۋ وبلىسى:
اقشاتاۋ – ورتاۋ – بيدايىق تاس جولىندا (189-شى شاقىرىم – بيدايىق اۋىلى) ەرىگەن سۋ تاسقىنى جول توسەمىنەن اسىپ كەتتى. بۇل ايماقتا ديامەترى 70 سانتيمەتر بولاتىن ءبىر نۇكتەلى قۇبىر بار. كولىك قوزعالىسىنا شەكتەۋ جوق.
«قازىرگى ۋاقىتتا جىلجىمالى اپاتتىق جول بەلگىلەرىن ورناتۋ جۇمىستارى جۇرگىزىلىپ جاتىر. ءتورت تەحنيكا مەن بەس ادام جۇمىلدىرىلعان. جالپى, رەسپۋبليكالىق ماڭىزى بار جولداردا ءتۇرلى جۇمىستاردى جۇرگىزۋ جانە قاۋىپسىزدىكتى قامتاماسىز ەتۋ ءۇشىن 610 بىرلىك تەحنيكا مەن 1558 ادام جۇمىلدىرىلعان», دەپ اتاپ ءوتتى ۆەدومستۆو وكىلدەرى.
قىرمىزى جۇماعاليقىزى,
ەۇۋ ستۋدەنتى
