پالاتا وتىرىسىندا لۋكين 2020-2023 جىلدار ارالىعىندا قازاقستاندا التىننىڭ زاڭسىز اينالىمىنا قاتىستى 7 قىلمىستىق ءىس تەرگەلىپ, ونىڭ 4-ءى سوتقا جىبەرىلگەنى تۋرالى ستاتيستيكالىق مالىمەتتەردى كەلتىردى. كەلتىرىلگەن شىعىن 1,5 ميلليارد تەڭگەدەن استى.
«باس پروكۋراتۋرانىڭ مالىمەتىنشە, سوڭعى 4 جىلدا زاڭسىز اينالىمعا, باعالى مەتالداردى وندىرۋگە جانە ۇرلاۋعا قاتىستى 133 قىلمىستىق قۇقىق بۇزۋشىلىق تىركەلگەن», دەدى لۋكين.
مىسال رەتىندە دەپۋتات زاڭسىز وندىرىلگەن التىن ونىمدەرىن ساتىپ الۋمەن اينالىسقان قىلمىستىق توپ مۇشەلەرى 2023 جىلدىڭ قاراشاسىندا قاماۋعا الىنعانىن ايتتى.
«كەيىننەن جەر استى تسەحتارىندا بۇل التىننان بەلگىلى برەندتەردىڭ اتىن جامىلىپ, استانا مەن شىمكەنت ساۋدا ۇيلەرىندە ساتىلعان ونىمدەر شىعارىلدى. ءتىنتۋ كەزىندە 1 كەلىدەن استام التىن مەن 100-دەن استام زات تاركىلەندى», دەدى سەناتور.
پارلامەنتار مۇنداي زاڭ بۇزۋشىلىقتارمەن كۇرەسۋ ءۇشىن التىن كەنىشتەرىندەگى باقىلاۋدى كۇشەيتۋ كەرەك دەپ سانايدى.
«بولجام بويىنشا, زاڭدى تۇردە وندىرىلگەن ءاربىر ءۇش توننا التىنعا ءبىر توننا زاڭسىز وندىرىلگەن التىن قوسىلىپ وتىردى. ەل بويىنشا بۇل - جىلىنا شامامەن 25 توننا زاڭسىز وندىرىلگەن التىن. بۇل ماسەلەنى شەشۋدىڭ باستى شاراسى - نىساندارداعى باقىلاۋدى كۇشەيتۋ. بۇل قوسىمشا بەينەباقىلاۋ كامەرالارىن ورناتۋ, شاحتانى تالشىقتى-وپتيكالىق ارنالارمەن جابدىقتاۋ, تەكسەرۋ جۇيەلەرىن پايدالانۋ, اۆتوماتتى انىقتاۋ سەنسورلارىن ەنگىزۋ جانە باسقا دا قاۋىپسىزدىك شارالارىن قامتيدى», دەدى سەناتور.
ەسكە سالايىق, بۇعان دەيىن ساۋدا جانە ينتەگراتسيا مينيسترلىگى ەل ازاماتتارى التىن ساتىپ الۋ كەزىندە الدانىپ جاتقانىن حابارلاعان ەدى.
قىرمىزى جۇماعاليقىزى,
ەۇۋ ستۋدەنتى
