فوتو: Gov.kz
وبلىس باسشىسى بۇل تۋرالى الەۋمەتتىك جەلىدەگى پاراقشاسىندا جازدى.
ول Facebook پاراقشاسىندا بەينەجازبا جاريالاپ, تابيعاتتىڭ ءتىلسىز اپاتىنا ەشكىم توسقاۋىل بولا المايتىنىن جانە جاۋىن-شاشىن جاعدايدى قيىنداتىپ جىبەرگەنىن ايتقان. اسحات شاحاروۆ تۇرعىندارعا العىسىن ءبىلدىرىپ, ايماقتا ماتەريالدىق شىعىندى ەسەپتەيتىن كوميسسيا قۇرىلعانىن, زارداپ شەككەن بىردە-ءبىر اقتوبەلىك نازاردان تىس قالمايتىنىن ايتتى.
«قازىرگى ۋاقىتتا ايماقتا سۋ شايعان جولدار, كوپىرلەر مەن وتكەلدەر, سۋ باسقان ۇيلەر مەن اۋلالار بار. كەشە اۋداندارعا بارىپ كەلدىم, بۇگىن قالانى جاياۋ ارالاپ شىقتىم. ماتەريالدىق شىعىندى قۇرىلعان كوميسسيا انىقتايدى. تۇرعىندارىمىزعا سابىر ساقتاعانى ءۇشىن العىسىمدى بىلدىرەمىن. ەشبىر ادام نازاردان تىس قالمايدى», دەدى ءوڭىر باسشىسى.
قازىرگى ۋاقىتتا اقتوبە وبلىسىندا 12 اۋداننىڭ اكىمدەرى مەن قالا باسشىسى, توتەنشە جاعدايلار دەپارتامەنتىنىڭ قىزمەتكەرلەرى, اسكەري قۇرىلىمدار, پوليتسەيلەر كۇندىز-ءتۇنى كۇشەيتىلگەن رەجيمدە جۇمىس ىستەپ جاتىر.
سۋ تاسقىنىنا قارسى شتاب, احۋالدىق ورتالىقتاعى وپەراتورلار تاۋلىك بويى اقتوبەلىكتەردىڭ قوڭىراۋىنا جاۋاپ بەرىپ, ءتيىستى كومەك كورسەتىپ جاتىر.
