كەزدەسۋدە قاراشىعاناق جانە قاشاعان كەن ورىندارىنداعى بىرلەسكەن جۇمىس بارىسى قارالىپ, سونداي-اق جاڭارتىلاتىن ەنەرگيا كوزدەرى سالاسىنداعى جاڭا جوبالاردى ىسكە قوسۋ ماسەلەلەرى تالقىلاندى.
تاراپتار قاراشىعاناقتى كەڭەيتۋ جوباسىنىڭ جوسپارعا ساي ىسكە اسىرىلىپ جاتقانىن اتاپ ءوتتى. بۇگىنگى تاڭدا ءوندىرىستى جىلىنا 11 ملن توننا دەڭگەيىندە ۇستاپ تۇرۋ ءۇشىن شيكى گازدى كەرى ايدايتىن قوسىمشا 5-6 كومپرەسسوردى ىسكە قوسۋ ۇدەرىسى جالعاسىپ جاتىر. قۋاتى جىلىنا 4 ملرد م3 بولاتىن گاز وڭدەۋ زاۋىتىن سالۋ جوباسى بەلسەندى تۇردە ىسكە اسىرىلىپ, جاڭا كاسىپورىن حالىقتى ءتيىمدى باعاداعى تاۋارلىق گازبەن قامتاماسىز ەتۋگە مۇمكىندىك بەرەدى.
قاشاعان كەن ورنىن تولىق كولەمدە يگەرۋ جۇمىستارى ۋاقتىلى جۇزەگە اسىرىلۋدا جانە ۇكىمەتتىڭ ەرەكشە باقىلاۋىندا تۇر. تاراپتار سونداي-اق الداعى گاز وڭدەۋ زاۋىتىنىڭ قۇرىلىسىنا قاتىستى وزگە دە ماسەلەلەردى تالقىلادى.
كەلىسسوز بارىسىندا قازاقستاندا جاڭارتىلاتىن ەنەرگيا كوزدەرى سالاسىنداعى جوبالاردى ىسكە اسىرۋدا ENI كومپانياسىمەن ىنتىماقتاستىقتىڭ وڭ تاجىريبەسىنە ەرەكشە نازار اۋدارىلدى. اتاپ ايتقاندا, اقتوبە وبلىسىندا «بادامشا-1», «بادامشا-2» جەل ەلەكتر ستانسالارىنىڭ, تۇركىستان وبلىسىندا ء«شاۋىلدىر» كۇن ەلەكتر ستانساسىنىڭ ىسكە قوسىلۋى ءسوز بولدى. الداعى كەزەڭدە جۇمىستار ماڭعىستاۋ وبلىسىندا جالپى قۋاتى 247 مۆت بولاتىن جەك جانە تابيعي گازبەن جۇمىس ىستەيتىن گيبريدتى ارالاس ەلەكتر ستانساسىن بىرلەسىپ سالۋعا باعىتتالادى. بۇل وندىرىستەگى اپاتتى جاعدايلاردىڭ الدىن الۋعا مۇمكىندىك بەرەدى.
ۇكىمەت باسشىسى قاراشىعاناق پەن قاشاعانداعى جوبالاردى ىسكە اسىرۋ كەزىندە تاۋارلاردى, جۇمىستار مەن قىزمەتتەردى ساتىپ الۋداعى قازاقستاندىق قامتۋ ۇلەسىن ارتتىرۋدىڭ ماڭىزىن اتاپ ءوتتى.
كەزدەسۋ قورىتىندىسىندا قاتىسۋشىلار ۇزاقمەرزىمدى ىنتىماقتاستىقتى ودان ءارى دامىتۋعا نيەتتى ەكەندەرىن راستادى.
