فوتو: مادەنيەت جانە اقپارات مينيسترلىگى
جاستار «جۇمىس ىزدەۋ داعدىلارىن ارتتىرۋ», «كاسىپكەرلىك داعدىلارىن جەتىلدىرۋ» جانە «NEET جاستارىنىڭ تسيفرلىق داعدىلارىن ارتتىرۋ» تاقىرىبى اياسىندا بىلىكتىلىگىن شىڭدادى. ەڭبەك نارىعى ترەندتەرىن زەرتتەي وتىرىپ, تۇيىندەمە مەن ىلەسپە حات جازۋ تاجىريبەسىن, اڭگىمەلەسۋدەن ءساتتى ءوتۋدىڭ ماشىقتارىن دا ۇيرەندى. وعان قوسا جۇمىس تابۋعا بولاتىن پلاتفورمالارمەن ءجىتى تانىستى.
– سەمينارعا 14-35 جاس ارالىعىنداعى جاستار قاتىستى. بۇل – ەكولوگيالىق قور مەن ازاماتتىق باستامالاردى قولداۋ ورتالىعىنىڭ بىرلەسكەن جوباسى. كۋرس باعدارلاماسى جاستاردىڭ تىلەكتەرىن ەسكەرە وتىرىپ ازىرلەندى. تىڭداۋشىلار كاسىبي مامانداردان, سونداي-اق تالىمگەرلەر مەن كاسىپكەرلەردەن قۇندى تاجىريبە جانە اقپارات الدى. جالپى, كۋرستارعا جاڭادان باستاعان جانە جۇمىس ىستەپ جاتقان كاسىپكەرلەر دە قاتىسا الادى, – دەدى قازاقستاننىڭ ەكولوگيالىق قورىنىڭ باسشىسى ايگۇل ابدۋاليەۆا.
ۇلتتىق ستاتيستيكا بيۋروسىنىڭ دەرەگىن ەسكەرسەك, ەلدە 15 پەن 34 جاس ارالىعىنداعى NEET جاستاردىڭ ۇلەسى 2023 جىلدىڭ 3 توقسانىنىڭ قورىتىندىسى بويىنشا 7,1 پايىزدى قۇرايدى. مەملەكەت بيىل ەكى قولعا ءبىر كۇرەك تاپپاي سەندەلگەن وتانداستارىمىزدى ەڭبەككە باۋلۋ ماقساتىندا ءبىراز ءىس-شارالاردىڭ باسىن جۇيەلەگەن. ماسەلەن, ەلىمىزدىڭ 20 وڭىرىندە «Zhas project» جوباسى ىسكە قوسىلدى. باعدارلاما اياسىندا ازاماتتارعا كونكۋرستىق نەگىزدە 1 ملن تەڭگەگە دەيىنگى سوماعا شاعىن گرانت بەرۋ كوزدەلگەن. وسىلايشا, 280 جوبا ىسكە اسىرىلاتىن بولادى.
«25 ناۋرىزدا ۇيىمداستىرۋشى, وپەراتور, مۇددەلى سەرىكتەستەردىڭ ينتەرنەت-رەسۋرستارى مەن الەۋمەتتىك جەلىلەرىندە كونكۋرستىڭ باستالۋى جاريالاندى. 25 ناۋرىزدان باستاپ 24 ءساۋىر كۇنگى ساعات 23:59-عا دەيىن جاستاردان وتىنىمدەر قابىلدانادى. 25 ءساۋىر مەن 14 مامىر ارالىعىندا كوميسسيا كونكۋرستىق وتىنىمدەردى ىرىكتەۋ جۇمىستارىن جۇرگىزەدى. 15 مامىردا ۇيىمداستىرۋشىنىڭ ينتەرنەت-رەسۋرستارى مەن الەۋمەتتىك جەلىلەردە ىرىكتەۋ ناتيجەلەرى قورىتىندىلانادى. جوباعا قاتىسۋشىلار ءوز ايماعىنداعى الەۋمەتتىك ماسەلەلەردى شەشۋگە باعىتتالعان ءتيىمدى باستامالاردى جۇزەگە اسىرىپ, سونىمەن قاتار كوشباسشىلىق قابىلەتىن دە دامىتا الادى. جاستار الەۋمەتتىك جانە كاسىبي باعدارلاۋ بويىنشا جاڭا ءبىلىم مەن داعدىعا يە بولادى. بيزنەس قۇرۋ جانە جۇرگىزۋ بويىنشا كاسىبي مەنتورلىق قولداۋ الا الادى», دەدى مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆ.
ءىس-شارا سوڭىندا قاتىسۋشىلارعا ارنايى سەرتيفيكاتتار تابىستالدى. 20 جاسقا جەكە كونسۋلتاتسيا بەرىلدى. ەندى مۇنداي كۋرستار قوستاناي جانە قىزىلوردا وبلىستارىندا ۇيىمداستىرىلماقشى. سونداي-اق قور رەسپۋبليكا بويىنشا جاستار رەسۋرستىق ورتالىقتارىندا جۇمىسپەن قامتۋ, كاسىپكەرلىكتى دامىتۋ ماتەريالدارىنان تۇراتىن اقپاراتتىق-تانىمدىق بۇرىشتار ورناتۋدى كوزدەپ وتىر.
