كوسمومونيتورينگ دەرەكتەرى بويىنشا بۇگىندە وبلىس اۋماعىنىڭ 61 پايىزىن قار الىپ جاتىر. وڭىردەگى وزەندەردەن دە ءتونىپ تۇرعان قاۋىپ ازىرگە جوق. ءوز ارنالارىندا. ياعني سۋ تاسقىنى بويىنشا جاعداي تۇراقتى. ەلدى مەكەندەردى, قالاداعى ءۇي-جايلاردى سۋ باسۋ تىركەلگەن جوق.
توتەنشە جاعدايلار دەپارتامەنتى مەن جەرگىلىكتى اكىمدەر بۇل ماسەلەنى قاتاڭ باقىلاۋىندا ۇستاپ وتىر. قامدانىس بار. 3 765 توننا جانار-جاعارماي, 171 توننا ازىق-ت ۇلىك, 64 مىڭ توننا ينەرتتى ماتەريال, 145 مىڭ سومكە ازىرلەندى. بۇعان قوسا 2 ملن 600 مىڭ تەكشە مەتردەن اسا قار شىعارىلدى. 45 شاقىرىمدىق سۋ بۇرۋ ترانشەيالارى كەسىلدى, 137 شاقىرىمدىق كانالدار مەن ارىقتار, 4 635 سۋ وتكىزۋ قۇبىرى, 441 كوپىر تولىعىمەن تازارتىلدى.
«سامارقاند سۋ قويماسىنان سەكۋندىنا 20 تەكشە مەتر, ىنتىماق سۋ قويماسىنان 6,4 تەكشە مەتر كولەمىندە سانيتاريالىق توگىندىلەر جۇرگىزىلىپ جاتىر. ازاماتتىق قورعاۋدىڭ اۋماقتىق كىشى جۇيەسىنىڭ بارلىق كۇشتەرى مەن قۇرالدارى جوعارى دايىندىققا كەلتىرىلگەن. سانى 4 125 ادام, 1 754 تەحنيكا, ونىڭ ىشىندە تجد بولىمشەلەرىنەن 360 ادام, 70 تەحنيكا ءازىر. ازاماتتىق قورعاۋ قىزمەتتەرىن, ۇيىمداردى, اسكەري قولباسشىلىق ورگاندارى مەن پوليتسيا دەپارتامەنتىنەن 3 675 قىزمەتكەر, 1 631 تەحنيكا دايىن», دەيدى توتەنشە جاعدايلار دەپارتامەنتىنىڭ باسشىسى مۇرات قاتپانوۆ.
جالپى اۋدانى 3 800 تەكشە مەتر بولاتىن 2 ۋچاسكەدە مۇزدى كەسۋ جانە بۇرعىلاۋ جۇرگىزىلدى. دەپارتامەنت قىزمەتكەرلەرى جاعدايدى مونيتورينگتەۋ ماقساتىندا سۋ تاسقىنى قاۋپى بار ەلدى مەكەندەردى تاۋلىك بويى ارالاپ ءجۇر. مۇنداي كەزەڭدە حالىقتى اقپاراتتاندىرۋ ماسەلەسى اسا ماڭىزدى. بۇل باعىت بويىنشا دەپارتامەنت قىزمەتكەرلەرى جۇمىسىن كۇشەيتكەن. ماسەلەن, 28 مىڭنان اسا ادامدى قامتىعان حالىقپەن 286 جيىن وتكىزىلدى. حالىققا 25 مىڭنان اسا جادىناما پاراعى تابىستالدى.
«وبلىستىڭ تەلەارنالارى بويىنشا سۋ تاسقىنى كەزەڭىندە تج الدىن الۋ ماسەلەلەرى بويىنشا 42 حابار ەفيرگە شىقتى, راديو توراپتارى ارقىلى 1 300-دەن اسا ەسكەرتۋ حابارى تارادى, باسىلىمدارعا 32 ماتەريال شىقتى. الەۋمەتتىك جەلىلەردە 257 ماتەريال جاريالاندى. جالپى, سۋ تاسقىنى كەزەڭىنە دايىندىق جۇمىستارى جۇرگىزىلۋدە جانە ەرەكشە باقىلاۋدا», دەيدى مۇرات قاسەن ۇلى.
جاقىندا وبلىس اكىمى ەرماعانبەت بولەكپاەۆ پەن توتەنشە جاعدايلار جونىندەگى وبلىستىق دەپارتامەنتتىڭ باسشىسى مۇرات قاتپانوۆ قارقارالى اۋدانىنداعى جۇمىس ساپارىندا بىرقاتار اۋىلدىق وكرۋگتەردى ارالاپ, كوكتەمگى سۋ تاسقىنىنا ازىرلىك جۇمىستارىمەن تانىسقان ەدى. وبلىس باسشىسى سۋ تاسقىنى بولۋ ىقتيمالدىلىعى باسىم سانالاتىن ىنتالى, ۋگار, قارشىعالى, تەگىسشىلدىك جانە ن.ءابدىروۆ اۋىلدىق وكرۋگتەرىندەگى سۋ وتكىزگىش قۇبىرلاردىڭ, كوپىرلەر مەن سۋ بوگەتتەرىنىڭ جاعدايىن كوردى. مۇنىڭ الدىندا ايماق باسشىسى بۇقار جىراۋ اۋدانى عابيدەن مۇستافين كەنتىنە, سادوۆوە مەن چكالوۆو اۋىلىنا, اقتاۋ كەنتىندەگى مىرزا ستانساسىنا بارىپ, احۋالدى كوزىمەن كورىپ قايتقان ەدى.
قاراعاندى وبلىسى
