ونەرتاپقىشتار وقىرماندارعا ءتۇرلى قارجىلىق قيىندىققا تاپ بولعان جانە ونى شەشۋگە كومەكتەسكەن كەيىپكەرلەر ارقىلى قارجىلىق ساۋاتسىزدىق دەڭگەيىن ازايتۋدى كوزدەيدى. بۇل باستاما اۆتورلىق قۇقىققا يە بولىپ, «Infomatrix» حالىقارالىق بايقاۋىنىڭ فينالىنا ءوتتى.
– ءبىزدىڭ ەلىمىزدە قارجىلىق ساۋات دەڭگەيى قانداي ەكەنى بەلگىلى. 2021 جىلعى يندەكس بويىنشا ول 39,52 پايىزدى قۇرادى, بۇل دامىعان ەلدەردىڭ ورتاشا دەڭگەيىنەن ەداۋىر تومەن. ءبىز قارجىلىق ساۋاتسىزدىقپەن كۇرەسۋدى مەكتەپتەن باستاۋ كەرەك دەپ سانايمىز. سوندىقتان ساۋاتتى بولۋدىڭ ماڭىزىن وسى كوميكستەر ارقىلى ناسيحاتتاپ وتىرمىز, – دەيدى جوبا اۆتورلارى.
«Qarzhymen» كوميكسى جەتى تاراۋدان تۇرادى. جوبانى ازىرلەۋگە وقۋشىلار ءبىر جىلعا جۋىق ۋاقىت جۇمساعان. ءاسيا مەن ايشات كوميكس اۆتورى بولسا, دانا ءماتىن مەن رەداكتورلىق جۇمىستى ىستەگەن, ال مەرەيلى – ۆەب-ديزاينەر. ولار ەندى ونى قازاق جانە اعىلشىن تىلىنە اۋدارىپ, كوميكستەردى, بەينەروليكتەردى, ويىنداردى جانە قارجىلىق ساۋات تۋرالى ينتەراكتيۆتى ساباقتاردى بىرىكتىرەتىن مۋلتيمەديالىق پلاتفورما قۇرۋ ارقىلى جوبانى كەڭەيتۋدى جوسپارلاعان.
جوبا يۋنەسكو تاراپىنان دا قولداۋ تاپقان. وقۋشىلار كوميكستى ەلىمىزدە, اسىرەسە ءبىلىم بەرۋ رەسۋرستارى قولجەتىمسىز شالعاي اۋداندارداعى جاستار اراسىندا تاراتۋعا مۇمكىندىك الدى. سونىمەن قاتار اۆتورلار مەكتەپ باعدارلاماسىنا كوميكستەردى ەنگىزۋ جانە قارجىلىق ساۋات بويىنشا ءبىلىم بەرۋ ءىس-شاراسىن تەك ەلىمىزدە عانا ەمەس, ودان تىس جەرلەردە دە كەڭەيتۋ ءۇشىن مەملەكەتتىك جانە ۇكىمەتتىك ەمەس ۇيىمدارمەن جۇمىس ىستەۋدى ماقسات ەتىپ وتىر.
