فوتو: مادەنيەت جانە اقپارات مينيسترلىگى
اتالعان ۆەدومستۆو جانىنان قۇرىلعان جاستار ادەبي كلۋبىنىڭ ماقساتى – قازاق ادەبيەتىندەگى وزەكتى ماسەلەلەردى, جاڭا ادەبي تەندەنتسيالار مەن شىعارمالاردى تالقىلاۋ, اۆتورلاردى ناسيحاتتاۋ.
«مەملەكەت باسشىسى ۇلتتىق قۇرىلتايدا جالپى جاستار تاربيەسى, ونىڭ ىشىندە كىتاپحانالاردى دامىتۋ, جالپى كىتاپ وقۋ ماسەلەلەرىن قولعا الۋعا قاتىستى ناقتى تاپسىرمالار بەردى. تۇپتەپ كەلگەندە نەگىزگى ماقسات – ۇلت رۋحانياتىن دامىتۋ, ساپالى ۇرپاق ءوسىرۋ. ويتكەنى, كىتاپ وقيتىن بالا رۋحاني دۇنيەسى باي ازامات بولىپ وسەرى انىق. بار ونەردىڭ ءتۇپ نەگىزى – ادەبيەت. سوندىقتان جاس قالامگەرلەرگە ورتاق الاڭ ۇسىنىپ, ادەبيەتتەگى وزەكتى ماسەلەلەردى تالقىلاۋ – زامان تالابى», دەدى مينيستر ايدا بالاەۆا.
وتىرىستا كلۋبتىڭ كۇن ءتارتىبى بەكىتىلىپ, باسشىلىق قۇرامى جاساقتالدى, الداعى جوسپارلار دا ايقىندالدى. جيىنعا قاتىسۋشىلار زاماناۋي ادەبي پروتسەسس پەن اۋدارما سالاسىنا, كىتاپ شىعارۋ جانە باسپا ىسىنە, بالالار ادەبيەتىن دامىتۋعا قاتىستى ويلارىن ورتاعا سالىپ, ءتۇرلى ۇسىنىستارىن ايتتى.
سونداي-اق ادەبي اگەنتتىك, وتاندىق اۆتورلاردىڭ شىعارمالارىن ناسيحاتتاۋ, كىتاپ وقۋ مادەنيەتىن قالىپتاستىرۋ توڭىرەگىندە وزەكتى ماسەلەلەر كوتەرىلدى.
«جاس قالامگەرلەرگە قولداۋ كورسەتۋدە بۇگىنگى باسقوسۋدىڭ ماڭىزى زور دەپ ەسەپتەيمىن. جاڭا ادەبي كلۋب قازاق ادەبيەتىنىڭ دامۋ كوكجيەگىن كەڭەيتىپ, ۇلت رۋحانياتىنىڭ دامۋىنا ءوز سەپتىگىن تيگەزەدى دەپ ويلايمىن», دەدى مەملەكەتتىك «دارىن» جاستار سىيلىعىنىڭ يەگەرى, سىنشى-ادەبيەتتانۋشى باعاشار تۇرسىنباي ۇلى.
ايتا كەتسەك, ادەبي كلۋبتىڭ الداعى جيىندارى قازاقستاننىڭ وزگە دە ايماقتارىندا كوشپەلى نەگىزدە ۇيىمداستىرىلادى.
