كوكتەمنىڭ حابارشىسىنداي وقىس وقيعا وبلىس ورتالىعىندا بولدى. ادەتتە قالانىڭ قارى ەرتە ەريدى. جۇرگىنشىنىڭ كوپتىگىنەن بە, جىلۋ جۇيەسىنىڭ اسەرى مە, ايتەۋىر قاسات قاردىڭ كوبەسى تەز سوگىلەدى. بۇل جولى دا سولاي بولدى. ىرىق بەرمەس قىزىل سۋ وبلىس ورتالىعىنداعى №22 مەكتەپكە لاپ بەردى. ءاپ-ساتتە عيماراتتىڭ جەرتولەسىن سۋ باسىپ قالدى. بىرلىك شاعىن اۋدانىنداعى جاڭا سالىنعان مەكتەپتە 360 وقۋشى وقىپ, ءبىلىم الاتىن. ءبىر جاقسىسى, قىزىل اسىقتان كەلەتىن قىزىل سۋ قاپتاعاندا وقۋشىلار دەمالىستا ءجۇر ەدى. بالالارعا تاماق ازىرلەيتىن ءاسۇي, كىر جۋ بولمەسىندەگى ارنايى جابدىقتار, بىرنەشە توڭازىتقىش, اس ساقتايتىن قويما, تۇگەل سۋ استىندا قالدى. ارنايى قىزمەت كۇنى-ءتۇنى كىرپىك ىلمەي, جەرتولەنى سۋدان تازارتتى. جىراعا قۇم سالىنعان قاپتار ءۇيىلدى.
– بيىل قار كوپ ءتۇستى عوي. سۋدى سورعىتىپ, قازىر قالپىنا كەلتىرۋ جۇمىستارى جۇرگىزىلىپ جاتىر, – دەيدى مەكتەپ ديرەكتورى مانارگۇل توقان.
زەرەندى اۋدانىندا سۋ باسۋ قاۋپى ءتونىپ تۇرعان شاعالالى, ترويتسك, ايدابول, الەكسەەۆكا, يۆانوۆكا اۋىلدارى قىزىل سۋدان قورعانۋعا قارەكەت ەتىپ جاتىر. بۇل اۋىلداردى شاعالالى, قىلشاقتى وزەندەرى جيەكتەي جاناپ وتەدى.
– رەزەرۆتەن 22,8 ملن تەڭگە ءبولىندى. اۋدان اۋماعىندا ءتورت گيدروتەحنيكالىق عيمارات بار. مامانداردىڭ ساراپتاۋىنا قاراعاندا, ايدابول, الەكسەەۆكا, يۆانوۆكا, پودلەسنىي بوگەتتەرىنىڭ جاعدايى قاناعاتتانارلىق, – دەيدى زەرەندى اۋدانى اكىمىنىڭ ورىنباسارى اسحات احمەديانوۆ.
اۋداندا سۋ تاسقىنىنىڭ الدىن الۋعا باعىتتالعان ءىس-شارالار اقپان ايىنىڭ العاشقى كۇندەرى باستالعان ەكەن. كۇنى بۇگىنگە دەيىن اۋداننىڭ ەلدى مەكەندەرىنەن 10 مىڭ تەكشە مەتر قار شىعارىلىپتى. جالپى ۇزىندىعى 4,8 شاقىرىم 18 ارنا, 10 ارىق, اۆتوكولىك جولدارىنىڭ 85 جەرىندەگى سۋ وتكىزۋ قۇبىرلارى تازالانعان. 1400 دانا قاپشىق, 1 000 توننا ينەرتتى ماتەريال, 20 مىڭ ليتر ديزەل وتىنى جيناقتالعان. توتەنشە جاعدايلار تۋىنداي قالسا, ادامداردى تاماقتاندىرۋ ماسەلەسى شەشىلگەن. 22 ۋاقىتشا پانالاتۋ پۋنكتتەرى دايىندالعان.
جىل سايىن تاسقىن سۋدىڭ زاردابىن تارتاتىن تسەلينوگراد اۋدانىندا دا تىڭعىلىقتى دايىندىق جۇرگىزىلگەنگە ۇقسايدى. اۋدانداعى قوياندى, شۇبار, ارايلى, نۇرەسىل, وتەمىس, سوفيەۆكا ءتارىزدى ەلدى مەكەندەردەن قار شىعارىلىپ, سۋ وتكىزەتىن قۇبىرلار تازارتىلىپ جاتىر.
– ينجەنەرلىك قورعاۋ جوسپارىنان تىس اۋىل تۇرعىندارىنىڭ وتىنىشتەرىن زەردەلەي زەرتتەپ, 92 سۋ وتكىزگىش قوندىرعى ورناتىلدى, – دەيدى اۋدان اكىمىنىڭ ورىنباسارى سەرىك وسپانوۆ.
ءوڭىر اۋداندارىندا دايىندىق جۇمىستارى شيراتىلىپ, جەرگىلىكتى اتقارۋشى ورگانداردىڭ بارلىق دەڭگەيىندە شتاب قۇرىلىپ, دايىندىق جۇمىستارى پىسىقتالدى. كوممۋنالدىق قىزمەت كۇشەيتىلگەن رەجىمدە جۇمىس ىستەپ جاتىر. جوعارىدا ايتىلعان اقپاراتتاردىڭ اۋ-جايىنا قاراعاندا, سىناققا توتەپ بەرۋگە ءتيىسپىز.
اقمولا وبلىسى
