فوتو: كازتاگ
مينيسترلىكتىڭ مالىمەتىنشە, قىزىلشامەن سىرقاتتانعاندار ءالى دە تىركەلىپ جاتىر. وسىعان بايلانىستى اتا-انالار بالالارىندا قىزىلشاعا قارسى ەكپەنىڭ بولۋىن قاداعالاۋى قاجەت. ۆاكتسينالاۋ بولماعان جاعدايدا تىركەلگەن جەرى بويىنشا ەمحانادا ۆاكتسينا العان ءجون.
قىزىلشانىڭ بەلگىلەرى جرۆي بەلگىلەرىنە ۇقساس. دەنە قىزۋى كوتەرىلەدى, جوتەل جانە اۋرۋدىڭ 4-5 كۇندەرى بورتپە پايدا بولادى. قىزىلشا ەنتسەفاليت (ميدىڭ قابىنۋى), وكپەنىڭ قابىنۋى, وتيت (قۇلاقتىڭ قابىنۋى) سەكىلدى اسقىنۋلارعا اكەپ سوعۋى مۇمكىن.
«قىزىلشانىڭ الدىن الۋدىڭ جالعىز سەنىمدى قۇرالى – ۋاقتىلى ۆاكتسينالاۋ. ەكپە 1-6 جاس ارالىعىنداعى بالالارعا جۇرگىزىلەدى. ۆاكتسينالاۋ ارقىلى بالالارىڭىزدى قىزىلشانىڭ اۋىر تۇرىنەن جانە ونىڭ سالدارىنان قورعاي الاسىز. قازاقستاندا قىزىلشاعا قارسى ددۇ سەرتيفيكاتتاعان قاۋىپسىز جانە ءتيىمدى ۆاكتسينا قولدانىلادى. ەلىمىزدە ۆاكتسينادان كەيىنگى قولايسىز جاعدايلار تىركەلمەگەن», دەلىنگەن مينيسترلىك مالىمەتىندە.
