سۋرەتتەردى تۇسىرگەن – ەرلان ومار, «EQ»
استانا قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ باس قالادا ناۋرىز مەيرامىن جالپىحالىقتىق سيپاتتا مەرەكەلەۋگە بارلىق جاعداي جاسالىپ, بىرنەشە ورىندا ءتۇرلى ويىن-ساۋىق ءىس-شارالارى ءوتىپ جاتقانىن ايتتى. «بيىل ءاز ناۋرىز مەيرامىنا مەملەكەت باسشىسى قاسىم-جومارت توقاەۆتىڭ باستاماسىمەن ايرىقشا ءمان بەرىلىپ, جوعارى دەڭگەيدە اتالىپ وتىلۋدە. ون كۇن بويى تويلاناتىن ۇلىق مەرەكەمىزگە وراي استانادا حالىقارالىق جارمەڭكە اشىلدى. مۇندا وزبەكستاننان كەلگەن قولونەر شەبەرلەرى وزىندىك ورنەگىمەن دارالاناتىن ىدىس-اياق بۇيىمدارىن ۇسىنسا, يراننىڭ تەمىردەن ءتۇيىن تۇيەتىن شەبەرلەرى وزدەرىنىڭ مىستان قۇيىلعان دۇنيەلەرىن اكەلدى. تۇركيادان كەلگەن شەبەرلەر قىشتان قاشاعان قۇمىرا سىندى قۇندى جادىگەرلەرىمەن تاماشالاۋشىلاردى تاڭعالدىردى. بۇرىن-سوڭدى ەلىمىزدە ناۋرىز مەرەكەسىنە وراي تۇركىتىلدەس حالىقتاردىڭ جارمەڭكەسى وتكەن جوق. مادەنيەت جانە اقپارات مينيسترلىگىنىڭ شاقىرتۋىمەن كەلگەن شەبەرلەردىڭ بۇيىمدارىن جەرگىلىكتى تۇرعىندار تەك كورىپ, كوزايىم بولۋمەن شەكتەلمەيدى, ساتىپ الۋىنا دا مۇمكىندىگى بار. ەكسپو حالىقارالىق كورمە ورتالىعىنداعى جارمەڭكەنى تاماشالاۋشىلار ءۇشىن بارلىق جاعداي جاسالىپ وتىر. جاستاردىڭ سۋرەت سالۋىنا مۇمكىندىك بار, شەتەلدەن كەلگەن قولونەر شەبەرلەرىمەن تاجىريبە الماسىپ, شەبەرلىك ساباعىن دا الادى», دەدى م.جاڭاباەۆ.
«استانادا ءوتىپ جاتقان كورمەگە كونەدەن كەلە جاتقان قولونەر بۇيىمى سانالاتىن مىستان ادىپتەلگەن قۇمان, قۇمىرا سىندى ىدىستاردى اكەلدىم. تەمىردەن بۇيىم جاساۋ ونەرىمەن مەنىڭ اتام, ونىڭ اكەسى – ۇلى بابام شۇعىلدانعان ەكەن. قازاقستانعا العاش كەلۋىم, العان اسەرىم ەرەكشە. بۇعان دەيىن الەمنىڭ 30-عا جۋىق ەلىندە بۇيىمدارىمدى كورمەگە ۇسىندىم. ەڭبەگىم ەلەنىپ, يۋنەسكو-نىڭ ارنايى سىيلىعىمەن ماراپاتتالدىم», دەدى يراننان كەلگەن شەبەر ءناسىر ءلۇتفي.
تۇركيالىق قۇمىرا جاساۋشى احمەت ءتاشۇنجى قىشتان قاشاپ, وتقا كۇيدىرىپ جاساعان بۇيىمدارى الەمدە وتە جوعارى باعالاناتىنىن ايتتى. 2019 جىلى يتاليادا قولونەر شەبەرلەرىنىڭ اراسىندا وتكەن بايقاۋدا احمەتتىڭ قىش قۇمىراسى 35 ەلدىڭ اراسىنان ۇزدىك دەپ تانىلعان. تۇركيانىڭ يزمير قالاسىندا تۇراتىن شەبەر قىشتان بۇيىم جاساۋ ەرەكشە دامىعانىن, باسەكەلەستىك جوعارى ەكەنىن جەتكىزدى. ءتىپتى قىمبات قۇمىراسى 3 مىڭ دوللارعا ساتىلعانىن دا ماقتانىشپەن ايتتى. «قازاقستاننىڭ جەرىن باسقاندا ءوزىمنىڭ توپىراعىمدا جۇرگەندەي اسەردە بولامىن. مۇمكىن باۋىرلاس ەل بولعاندىعىمىزدان شىعار. ەۋروپا ەلدەرىنىڭ كورمەلەرىنە بۇيىمدارىمدى اپارامىن. اتاجۇرتتان حالىقارالىق جارمەڭكەگە شاقىرتۋ كەلگەندە ەرەكشە قۋاندىم», دەدى احمەت ءتاشۇنجى. قىرعىزستاننان كەلگەن ىسمەر نۇريا يساكوۆا تالاس شاھارىندا تۇرادى ەكەن. قولونەر بۇيىمدارىنىڭ ىشىندە ايەل زاتىنا ارنالعان كيىمدەردى كەسىپ-ءپىشىپ, توقۋدى كاسىپ ەتىپ كەلە جاتقانىنا 40 جىلدىڭ ءجۇزى بولىپتى. اجەسىنەن, اناسىنان ۇيرەنگەن ىسمەرلىك ونەردى ورىستەتۋ ماقساتىندا جاستاردى دا وقىتاتىنىن ايتتى. «قازاقستاندا شىعىس حالىقتارىنىڭ ءتول مەرەكەسى سانالاتىن ءاز ناۋرىزدى مەرەكەلەۋ جوعارى دەڭگەيدە ءوتىپ جاتقانى قۋانتتى», دەدى نۇريا يساكوۆا.
استاناداعى يگى شارادا تەك قولونەر شەبەرلەرى عانا ەمەس, وتاندىق ازىق-ت ۇلىك وندىرۋشىلەر دە ءوز ونىمدەرىن ۇسىنىپ, جارمەڭكەنىڭ كورىگىن قىزدىردى. ءار وڭىردەن فەرمەرلەر 200 توننادان استام ازىق-ت ۇلىك اكەلگەن. ونىڭ ىشىندە ەت-ءسۇت ونىمدەرى, جەمىس-جيدەك, بالى, بالىق ونىمدەرى بار.
