قازاقى ءداستۇر-عۇرىپتى بويىنا ءسىڭىرىپ العان ناتاليانى تەمىرتاۋ قالاسىنىڭ جۇرتشىلىعى جاقسى تانيدى. ناتاشا العاشقىدا قالاداعى «بيداي-نان» كاسىپورنى دۇكەندەرىندە ساتۋشى بولىپ, 2005 جىلى جەكە كاسىپكەرلىككە دەن قويدى. وعان دەيىن قىتاي مەن ەكى ورتادا سان قاتىناپ, تاۋار تاسىدى. قازاق ءتىلىن ەركىن بىلگەنى كادەگە جاراپ, استاناداعى ل.گۋميلەۆ اتىنداعى ۋنيۆەرسيتەتتىڭ ەكونوميكا فاكۋلتەتىن دە سىرتتاي وقىپ ءبىتىردى. ءبىلىمى مەن تاجىريبەسى تولىسقان ول ۇلتتىق ۇلگىدەگى توسەك-ورىن جابدىقتارىن تىگەتىن تسەح اشىپ, بۇگىندە 15 ادامدى جۇمىسپەن قامتىپ وتىر.
ناتاشا ءۇشىن ناۋرىز مەيرامىنىڭ ورنى ەرەكشە. اسىعا كۇتەدى. نەگە دەسەڭىز, بىلتىر «دامۋ» باعدارلاماسىمەن العان نەسيەسىنە «ارنا» دۇكەنىن اشتى. دۇكەننىڭ اشىلۋىن دا ناۋرىز مەرەكەسىنە وراي ۇيىمداستىرعان كورىنەدى. كوپقاباتتى ءۇيدىڭ ءبىرىنشى قاباتىن تۇتاس الىپ جاتقان بۇل ساۋدا نۇكتەسىندە 25 ادام ناپاقاسىن تاۋىپ وتىر. ءتىل بىلمەگەندەردى تۇتىنۋشىلارمەن قازاقشا سويلەسۋگە ءوزى ۇيرەتىپ ءجۇر.
«بىلتىر كوپ جىلدان بەرى ارمانداعان «ارنا» اتتى دۇكەنىمىزدى ناۋرىز مەرەكەسىنە وراي اشتىق. ەسىك الدىنا ۇستەلدەر قويىپ, قالا جۇرتشىلىعىنا ىستىق پالاۋ مەن شاي, ءتاتتى-دامدىلەردى تەگىن ۇسىندىق. بەرەكەلى اس – ناۋرىزكوجەنى دە تاراتتىق. جالپى, ءوزىم ىرىمشىلمىن. بىلتىرعى ناۋرىز وسىنداي جاقسىلىعىمەن, بەرەكەسىمەن كەلدى. بيىل دا وتباسىمىزبەن, قىزمەتكەرلەرىمىزبەن جاقسىلاپ اتاپ وتەمىز. ويتكەنى بۇل مەرەكەنىڭ بەرەكەسى مول. جىلدى مولشىلىقپەن باستاساڭ, ءارى قاراي دا ءار كۇنىڭ توق بولادى دەگەن ىشكى تۇيسىگىمدە وي بار», دەيدى كاسىپكەر كەلىنشەك.
ناتاشا ۇنەمى قايىرىمدىلىق اكتسيالارىنا قاتىسادى. جومارتتىعىمەن ۇلگى. مىسالى, جىلدا «مەكتەپكە جول» اكتسياسىنا اتسالىسىپ, قالاداعى قارتتار ءۇيى مەن داعدارىس ورتالىعىنان قولدان كەلگەن كومەگىن ايامايدى. وعان قوسا بىلتىر قىستا سۋىقتان توڭعان تەمىرتاۋلىق 60 وتباسىعا جىلى كيىم تاراتىپ بەرگەنى بار. ءتىپتى ءبىر كەزدەرى وزىمەن بىرگە ساتۋشى بولىپ ىستەگەن ورىستىڭ جەتىم قىزى كريستينانى جولداسى نۇرلىبەك ەكەۋى توي جاساپ, قولدان ۇزاتقانىن دا ادامگەرشىلىكتىڭ ۇلكەن ۇلگىسىنە جاتقىزۋعا بولادى.
قازاقتىڭ سالت-داستۇرىنە جەتىك ناتاليانى تەمىرتاۋلىقتار قۇرمەتتەپ, سابيلەرىن قىرقىنان شىعارتىپ, بەسىككە سالعىزىپ, تۇساۋىن كەستىرەدى ەكەن. بىلتىر ورىس جىگىتىنە تۇرمىسقا شىققان قۇربىسى گۇلجاناتتىڭ ءسابيى داۆيدكە دە وسىنداي جورالعى جاساعان. وسى ۋاقىتقا دەيىن 24 ۇل بالانى قىرقىنان شىعارىپتى. قىرقىنان شىعارۋدىڭ ءجون-جورالعىسىن كەيبىر زامانداستارىنىڭ ءالى بىلمەيتىنىنە قىنجىلاتىنىن دا ايتىپ قالدى.
جولداسى نۇرلىبەك ەكەۋىنىڭ لاۋرا مەن جانگەلدى ەسىمدى ۇل-قىزى بار. تۋعانىنان بەسىككە بولەپ وسىرگەن. «بەسىككە بولەۋ – ناعىز تازالىق قوي. شۇكىر, ودان بالالارىم كەم بولعان جوق», دەيدى كەيىپكەرىمىزدىڭ ءوزى. راس, ەكى بالاسى دا جوعارى ءبىلىمدى, IT سالاسىنىڭ بىلىكتى ماماندارى. قىزدارى لاۋرا استانا قالاسىنداعى وسىنداي كاسىپورىننىڭ باس ديرەكتورى بولسا, جانگەلدى IT ۋنيۆەرسيتەتىنىڭ ماگيستراتۋراسىندا وقيدى. ال وتاعاسى نۇرلىبەك «الاۋترانسگازدىڭ» اپاتتان قۇتقارۋ قىزمەتىندە جۇمىس ىستەپ, قازىر قالاعا گاز تارتۋ ماسەلەلەرىمەن شۇعىلدانىپ ءجۇر. بۇل شارۋاعا ەلىمىزدىڭ تۇكپىر-تۇكپىرىنەن, اسىرەسە وزدەرىنىڭ تۋعان جەرى اقتوبەدەن تاجىريبەلى ماماندار اعىلىپ كەلىپ جاتىر. ولارعا قوناقجاي ارىستانوۆتاردىڭ ەسىگى قاشاندا اشىق. الىستان ات ارىتقان مەيماندار ناتاليانىڭ ءوزى اينالدىرىپ, تۇزداعان قازى-قارتاسىن سۇيسىنە جەپ, قايماق قاتقان كۇرەڭ شايىن قانىپ ءىشىپ, ءوز ۇيلەرىنە جۇرگەندەي بولادى. ارينە, مۇنىڭ ءبارى قازاقتىڭ كەلىستى كەلىنى بولعان ناتاشانىڭ كەڭ پەيىلىنەن.
جولداسى نۇرلىبەك جاس كەلىندى اقتوبەدەگى شالقارعا الىپ بارعاندا اتا-ەنەسى ورىنباسار مەن الدان جاتىرقاماي, جاتسىنباي باۋىرىنا باسىپ, اق ورامالىن تاعىپ, دۇرىلدەتىپ توي جاساپ بەرەدى. سودان اۋىلدا تۇرىپ, ەنەنىڭ مەكتەبىنەن وتەدى. «قازىر ەنەمنىڭ ەڭ سۇيىكتى كەلىنىمىن», دەپ مارقايادى ءوزى. اتاسىنىڭ اتىن ايتۋعا كەلگەندە قىسىلىپ, ارەڭ دەگەندە بارىپ, «زامەستيتەلدىڭ اۋدارماسى عوي» دەگەندە ءبىز «ۇلكەندى سىيلاعان ىزەتىڭىز قانداي» دەپ تاڭىرقاپ قالدىق.
ناتاشانىڭ بيىلعى ناۋرىز مەرەكەسىنە دايىندىعى قىزۋ. ۇلكەن داستارقان جايىپ, ۇلتتىق كيىم كيىپ ۇيىندە, دۇكەنى مەن تىگىن تسەحىندا دا اتاپ وتەدى. ناۋرىزكوجەنى ءوزى ۇيىنەن دايىندايدى. مۇنى دا ەنەسىنەن ۇيرەنگەن. جۇمىسىنداعىلار ناتاشانىڭ ازىرلەگەن باۋىرساعىن, كوجەسىن ءسۇيسىنىپ جەپ الادى. قازىر كاسىپكەر كەلىنشەك مەرەكەدەگى داستارقاننىڭ قامىمەن جۇگىرىپ ءجۇر.
قاراعاندى وبلىسى
