ەلدانا پاۆلودارداعى اققۋلى اۋدانىندا دۇنيەگە كەلىپتى. ايتۋىنشا, جاستايىنان اناسى قازاق ونەرىنە باۋلىعان.
– مەنىڭ انام – قازاق, اكەم – نەمىس. ءوزىمدى كىشكەنە كەزىمنەن قازاقپىن دەن سانايمىن. قالىڭ قازاق ورتاسىندا ءوستىم, ناعاشى جۇرتىمنان كوپ دۇنيەنى بويىما ءسىڭىردىم. اۋىلدا قۇربى-قۇرداستارمەن تاي-ق ۇلىنداي تەبىسىپ وستىك. وقۋشى شاعىمىزدا اۋىل مەكتەبىندەگى ۇستازدارىمىزبەن بىرگە ناۋرىز مەيرامىن ءسان-سالتاناتىمەن وتكىزەتىنبىز. اۋىل ادامدارىنىڭ ءبىر-بىرىنە دەگەن ەرەكشە مەيىرىمى, اۋىلدىڭ قۇرت-قايماعى مەن باۋىرساعى كوڭىلدەن كەتپەيدى. مەكتەپتە ءجۇرىپ ءان سالۋدى ۇيرەندىم, ونەرلى بولۋىم ناعاشى جۇرتىما تارتقاندىعىمنان بولار, – دەپ جىميادى ول.
ناۋرىز – ەلدانانىڭ وتباسى ءۇشىن ۇلى مەيرام. ول مەرەكە كۇندەرى كۇندىز ۇلكەن ساحنالارعا شىعىپ, ءوزى قىزمەت ەتەتىن قورعانىس مينيسترلىگى ورتالىق ءانسامبلىنىڭ قۇرامىندا ءان سالسا, كەشكە ۇيىنە ورالعان سوڭ جايناتىپ داستارقان جايادى. ەت اسىپ, باۋىرساق ءپىسىرىپ, داستارقانىنا قىستان قالعان سارىمايى مەن قۇرت-جەنتىن قويادى. «انام «ناۋرىز – مولشىلىقتىڭ, جەر اياعى كەڭىپ مال-جاننىڭ اۋزى كوككە تيەتىن مەزگىل. سوندىقتان بۇل كەزدە داستارقانعا بارىڭدى سال, قىزىم. مەيرامدا كوڭىل جادىراسىن, وكپە-رەنىشتەر ۇمىتىلسىن», دەپ ۇنەمى ايتىپ وتىراتىن. جولداسىم ازامات, ۇيدەگى ءۇش ۇلىمىز دا مەيرامدى ايرىقشا قۋانىشپەن كۇتەدى», دەيدى ول.
ەت پەن باۋىرساق پىسىرۋدە ەلدانانىڭ الدىنا تۇسەتىن نازىك جاندار سيرەك. ونىڭ داستارقانىنان ءدام تاتقان جاندار اسپازدىق ونەرىنە ءاردايىم ماقتاۋ ايتىپ جاتادى. ال ءوزى قازاقتىڭ ۇلتتىق تاعامدارىن ءپىسىرۋدى اناسىنىڭ جانىندا ءجۇرىپ ۇيرەنگەنىن جەتكىزدى. «انام بويجەتە باستاعان شاعىمنان قازان-وشاققا ارالاستىرىپ, ەت اسۋدى, باۋىرساقتىڭ قامىرىن دايىنداۋدى ۇيرەتتى. ەتتىڭ جۇمساق بولۋى, جايمانىڭ دۇرىس جايىلۋىنىڭ وزىندىك قۇپيالارى بار. ول مازىرلەردى وسى ۋاقىتقا دەيىن بۇلجىتپاي ورىنداپ كەلەمىن. كەيدە ءتىپتى مەنىڭ ەتىمدى ساعىنىپ اۋىلدان ناعاشى جۇرتىم, سوناۋ قىرعىزستاننان قايىن جۇرتىم كەلىپ كەتەدى. شاڭىراققا بىرنەشە ۇلتتىڭ وكىلدەرى جينالىپ, ارقا-جارقا بولامىز. قازاقشا ءان ايتىپ, بي بيلەيمىز», دەيدى ول.
كەيىپكەرىمىزدىڭ انشىلىك ونەرى – بولەك اڭگىمە. نەبارى 11 جاسىندا ونەرىمەن كوزگە ءتۇسىپ, روزا رىمباەۆانىڭ باتاسىن الادى. 2006 جىلى رەسپۋبليكالىق «جاس قانات» جاستار بايقاۋىندا نەمىس قىزىنىڭ ءان سالۋداعى ەرەكشە قابىلەتىن بايقاعان مارقۇم مۇرات ەرعاليەۆ ونى استاناعا جۇمىسقا شاقىرادى. بۇل ۋاقىتتا ول پاۆلودارداعى مۋزىكا مەكتەبىنىڭ دومبىرا بولىمىندە وقىپ جۇرگەن ەدى. 2009 جىلى رەسپۋبليكالىق ء«تىل – تاتۋلىق تىرەگى» اتتى بايقاۋدىڭ باس جۇلدەسىن جەڭىپ السا, ال 2011 جىلى ليۆان-قازاقستان پاتريوتتىق اندەر بايقاۋىندا ءبىرىنشى ورىننان كورىندى. ەڭبەك جولىن استانادا ۇلتتىق ۇلاننىڭ باس ورىنداۋشىسى قىزمەتىن اتقارۋدان باستاسا, بۇگىندە قورعانىس مينيسترلىگى ورتالىق انسامبلىندە ورىنداۋشى بولىپ جۇمىس ىستەيدى.
ونەرلى جان اڭگىمە سوڭىندا كەلەشەكتە ءوزى تۋعان اۋىلىنا بارىپ تۇرعىسى كەلەتىنىن جەتكىزدى. اۋىلدىڭ قۇرت-مايى مەن ادامداردىڭ اقجارقىن پەيىلى تارتىپ تۇرادى دەيدى. ول جاقتا جىلقى ۇستايتىن نەمىس ازاماتتارى, تۋىستارى كوپ. اۋىلعا دەگەن ساعىنىش جەتەگىندە جۇرگەن ءانشى ءوزىنىڭ رۋحتى اندەرىمەن, كەڭپەيىل داستارقانىمەن جۇرتتى ءالى دە جادىراتا بەرمەك.
پاۆلودار وبلىسى
