اقش كوۆبويىن ارباعان كوكپار

تۋريزم جانە سپورت ءمينيسترى ەرمەك مارجىقپاەۆ وتانداستاردى ۇلتتىق سپورت كۇنىمەن قۇتتىقتاپ, ءتول ونەرىمىزدىڭ ءورىسىن كەڭەيتىپ, ناسيحاتىن ارتتىرۋعا ايرىقشا كوڭىل ءبولىنىپ جاتقانىن اتاپ ءوتتى.

«مەملەكەت باسشىسى قاسىم-جومارت توقاەۆتىڭ باستاماسىمەن جىل باسى, ءاز ناۋرىز مەرەكەسى ون كۇن بويى تويلانادى. كۇن مەن ءتۇن تەڭەلىپ, تىرشىلىك اتاۋلى وياناتىن كوكتەمگى ناۋرىزناما ەلدىك مەرەكەگە اينالدى. قىركۇيەك ايىندا استانادا دۇنيەجۇزىلىك كوشپەلىلەر ويىندارى وتەدى. الەمنىڭ ءار قيىرىنان وسى ايتۋلى دودانى تاماشالاۋعا 100 مىڭنان اسا تۋريست ارنايى كەلەدى دەپ سەنىم ارتامىز. 100-دەن اسا ەلدەن 400-گە جۋىق قاتىسۋشى كوشپەلىلەر ويىندارىنىڭ كورىگىن قىزدىرادى. بۇگىنگى ۇلتتىق سپورت كۇنىنە وراي ۇيىمداستىرىلعان مەرەكەلىك ءىس-شارا ارقىلى دا ءبىز ەلدىگىمىزدى ناسيحاتتايمىز. ات ۇستىندەگى الاش ۇلدارىنىڭ ايبىنى ارتا بەرسىن», دەدى ە.مارجىقپاەۆ.

ۇلتتىق سپورت تۇرلەرى قاۋىم­داستىعىنىڭ پرەزيدەنتى يسلامبەك سالجانوۆ ءتول ونەرى­مىزدىڭ جالپى­حالىقتىق سيپات الىپ, بۇقارا­لىق سپورتقا اينالىپ كەلە جاتقانىن جەتكىزدى.

«ۇلتتىق سپورت تۇرلەرى قاۋىم­داستىعى – 10 فەدەراتسيانىڭ باسىن بىرىكتىرەتىن ۇيىم. ءتول ونەرىمىزدەن ساڭلاقتارىمىز بىل­تىر حالىقارالىق, الەمدىك دودالارعا قاتىسىپ, 95 مەدال ولجالادى. ەلىمىز ءۇشىن ايتۋلى الامان سانالاتىن دۇنيەجۇزىلىك كوشپەلىلەر ويىندارىن جوعارى دەڭگەيدە وتكەرۋگە ۇلتتىق سپورت تۇرلەرى قاۋىمداستىعى دا بىلەك ءتۇرىپ كىرىسىپ وتىر. بۇل ايتۋلى ءىس-شارا ۇلتتىق سپورتىمىزدى دا­مىتۋعا تىڭ سەرپىن بەرەرى ءسوزسىز», دەدى ي.سالجانوۆ.

ءىس-شارا بارىسىندا كوكپاردان استانا قالاسىنىڭ كومانداسى مەن اقش-تان كەلگەن كوۆبوي­لار اراسىنداعى جولداستىق كەز­دەسۋ تارتىسقا تولى بولدى. رۋح­تى جانيتىن كوكپار ويىنىنا قاتى­سىپ كورمەگەن امەريكالىقتار دا شە­بەر­لىگىمەن ءتانتى ەتتى. قورعا­نىس­تاعى شاباندوزدارى ءبىزدىڭ جىگىت­تەردى قاقپايلاپ, شەڭبەرگە ماڭايلاتپادى. جەكپە-جەكتە دە ەداۋىر تايتالاستى. اقش كومان­دا­سىنىڭ كاپيتانى ۇلتتىق ويى­نىمىزدىڭ ەپتىلىككە باۋليتىنىن ەرەكشە اتاپ ءوتتى. اقش قۇراما­سىن باستاپ كەلگەن كوۆبوي لەدد حاۋەلل 2018 جىلى قىرعىزستاندا وتكەن دۇنيەجۇزىلىك كوشپەلىلەر ويىندارىنا دا قاتىسىپتى. كوكپار سپورتى بىلەكتى عانا ەمەس, جۇرەكتى جىگىتتەردىڭ دوداسى ەكەنىن ايتتى.

ء«بىزدىڭ كومانداداعى كەيسي فيلد تا, دجەيسون موتل دا بۇرىن-سوڭدى كوكپار تارتىپ كورمەگەن. بىراق ولار كانىگى كوكپارشىلاردان قايمىققان جوق, قايتا قايسار­لىق تانىتتى. كۇزدە دۇنيەجۇزىلىك كوشپەلىلەر ويىندارىنا دا قاتى­سامىز», دەدى كوۆبوي ل.حاۋەلل.

ناۋرىزناما اياسىندا ۇيىم­داستىرىل­عان ءىس-شارا بارىسىندا ۇلتتىق سپورت ارداگەر­لەرىنە دە سىي-قۇرمەت كورسەتىلدى. كوكپاردان كسرو-نىڭ توعىز دۇركىن چەمپيو­نى ءابىلحان داۋىلباەۆ, توعىز­قۇمالاقتان قازاقستاننىڭ ەكى دۇر­كىن چەمپيونى مەيرامقۇل نوعاي­­باەۆ, قازاق كسر-ىنە ەڭبەك سىڭىر­گەن جاتتىق­تىرۋ­شىسى جۇما­بەك مەيرامعاليەۆ, بەل­گىلى سپورت ءجۋرناليسى, جازۋشى نەسىپ ءجۇنىس­باي ۇلى, قازاقستاننىڭ ەڭبەك سىڭىرگەن جات­تىق­تىرۋشىسى قۇلام­حان جاقىپوۆ, اسىق اتۋدان ۇلتتىق قۇرامانىڭ باس باپكەرى جومارت سابىرجانوۆ, اتبەگى مەيرامبەك شاكەنوۆكە قوماقتى سىياقى بەرىلدى.

ۇلتتىق سپورتتىڭ ارداگەرى, ايگىلى شاباندوز, 30 جىل كوكپار تارتقان ءابىلحان داۋىل­باەۆ امەريكالىق كوۆبويلاردىڭ دەگدار ونەر ءتول سپورتىمىزعا يكەمى بار ەكەنىن ايتتى.

«امەريكالىقتاردىڭ اتقا مىنى­سىنەن-اق تاقىمى مىقتى ەكەنىن باعامدادىق, كوك­پار­دى جەردەن ءىلىپ الۋدا, جەكپە-جەكتە دە ابجىل­دىك تانىتتى. بۇل – تەك سپورتتىق سايىس ەمەس, ونەر دارەجەسىندەگى ويىن ءتۇرى. ۇلت­تىق سپورتىمىزدىڭ وسىلاي دارىپتەلگەنى ەلدىگى­مىزدى اسقاقتاتا تۇسەدى», دەدى ارداگەر كوكپارشى.

ستاتيستيكالىق دەرەك بويىن­شا ۇلت­تىق سپورت تۇرلەرىمەن جۇيەلى تۇردە شۇعىلدانۋ­شىلار قاتارى 619,2 مىڭ ادامعا جەتتى. بۇل باعىتتا 1 488 جاتتىقتىرۋشى جۇمىس ىستەيدى, ونىڭ ىشىندە 928 باپكەر اۋىلدا شاكىرت تاربيەلەپ كەلەدى. 12 سپورت كلۋبى مەن ۇلتتىق سپورت تۇرلەرى بويىنشا 13 سپورت مەكتەبى بار. بۇدان باسقا قۇراما كوماندالاردىڭ سپورتشىلارى ازىرلىك جۇرگىزەتىن ۇلتتىق جانە ات سپورتى ورتالىعى جۇمىس ىستەيدى.