فوتو: سەنات
كەزدەسۋ بارىسىندا فەدەراتسيا وكىلى قازاقستاندا شاحماتتى دامىتۋدىڭ 2023-2027 جىلدارعا ارنالعان كەشەندى جوسپارىن ىسكە اسىرۋ باعىتىنداعى جۇمىستار جونىندە ايتتى. استانادا الەم چەمپيونى اتاعى ساراپقا سالىنعان جارىس پەن ازيا چەمپيوناتىنىڭ وتكىزىلۋى سونىڭ ءبىر ناتيجەسى ەكەنىن اتاپ وتكەن ءجون. قۇرلىقتىق سايىستا 18 ەلدەن كەلگەن 126 شاحماتشى باق سىنادى.
سۇحبات كەزىندە جاتتىقتىرۋشىلاردىڭ بىلىكتىلىگىن ارتتىرۋ ۇلتتىق قۇراما سپورتشىلارىن دايارلاۋ ءۇشىن كاسىبي مامانداردى جۇمىلدىرۋ, وقىتۋ فورماتتارىن جەتىلدىرۋ, شاحمات كلۋبتارىن اشۋ سياقتى بىرقاتار وزەكتى ماسەلەلەر دە اڭگىمەگە ارقاۋ بولدى.
سونداي-اق الەكساندر بابەنكو ەلىمىزدە شاحماتتى دارىپتەۋ ىسىنە قولداۋ كورسەتكەنى ءۇشىن ماۋلەن اشىمباەۆقا العىس ءبىلدىردى.
ءوز سوزىندە ماۋلەن اشىمباەۆ قازاقستاندا شاحماتتىڭ دامۋىنا ۇلكەن ۇلەس قوساتىن جانە قاتىسۋشىلاردىڭ شەبەرلىكتەرىن شىڭداۋعا ىقپال ەتەتىن حالىقارالىق تۋرنير وتكىزۋدىڭ ماڭىزدى ەكەنىن اتاپ ءوتتى. سونىمەن قاتار ول سەنات تاراپىنان ەلىمىزدە شاحمات قوزعالىسىن ودان ءارى دامىتۋعا جانە قازاقستان شاحمات فەدەراتسياسىنىڭ قىزمەتىن جەتىلدىرۋگە قولداۋ كورسەتىلە بەرەتىنىن تىلگە تيەك ەتتى.
كەزدەسۋدە الداعى ۋاقىتتا سەناتتىڭ قولداۋىمەن شاحماتتان قوعام بەلسەندىلەرى, جۋرناليستەر, سونداي-اق, پارلامەنت جانە ءماسليحات دەپۋتاتتارى اراسىندا وتكىزىلەتىن «Senat Open» تۋرنيرىنە قاتىستى ماسەلەلەر دە تالقىلاندى.
ايتا كەتەيىك, قازىرگى تاڭدا ەلىمىزدە 200 مىڭنان استام ادام شاحماتپەن اينالىسادى. جەتى وڭىردە اتالعان ويىندى ۇيرەتۋ ءۇشىن پيلوتتىق جوبا قولعا الىنعان. بۇل باستاما 42 مەكتەپ پەن 1000 وقۋشىنى قامتىپ وتىر.
