سۋرەتتى تۇسىرگەن – جانگەلدى ابدىعالىم
جاس جۇيرىكتەر ۇدەدەن شىعا الىپ, ءۇمىتتى اقتادى دەۋگە بولادى. عۇلامانىڭ عيبراتتى عۇمىرى مەن شەجىرەلى شاھاردىڭ تارلان تاريحىن كادەلى جىرلارىمەن پاش ەتىپ, اياق الىسىن بايقاتتى.
بۇل – داستۇرگە اينالعان جىر دوداسى. وبلىستىق مادەنيەت, ارحيۆتەر جانە قۇجاتتاما باسقارماسى جان-جاقتى قولداۋ ءبىلدىرىپ, وبلىستىق مادەني-ساۋىق جانە حالىق شىعارماشىلىعىنىڭ عىلىمي-ادىستەمەلىك ورتالىعى مەن «ارقا» ايتىس اقىندارى مەن جىرشى-تەرمەشىلەر مەكتەبى بىرلەسە ۇيىمداستىردى.
ايتىستىڭ رەسمي سالتاناتىن اشىپ بەرگەن وبلىس اكىمىنىڭ ورىنباسارى ەرلان قۇسايىن كوپشىلىكتى ۇلىس كۇنىمەن قۇتتىقتادى.
– كەزىندەگى كەڭەس زامانىندا ءبىراز دۇنيەمىزدەن قول ۇزدىك. ۋاعىندا ەركىمىزدى السا دا, ەڭسەمىز تۇسكەن جوق. ەنشىمىزدى السا دا, ەگەمەندىگىمىزدى جوعالتقان جوقپىز. وشكەنىمىز قايتا جانىپ, ولگەنىمىز قايتا ءتىرىلدى. سونداي اسىل قازىنامىزدىڭ ءبىرى – وسى ايتىس ونەرى. قۇندىلىقتارىمىزبەن قايتا قاۋىشتىق. وزبەكالى جانىبەكوۆتەي ارىس ازاماتىمىزدىڭ قايراتكەرلىگىنىڭ ارقاسىندا ناۋرىز ءوز دەڭگەيىندە تويلانا باستادى. ەندى مەملەكەت باسشىسى قاسىم-جومارت توقاەۆ بۇعان تەرەڭ ماعىنا ۇستەدى. بيىل ءاز ناۋرىز جاڭاشا مانگە يە بولدى. الىستىڭ جاقىندايتىن, ارازدىڭ تاتۋلاساتىن ەرەك كۇندەرى بۇل. جالپىحالىقتىق سيپاتقا يە بولىپ جاتقان تاعىلىمى تەرەڭ, ءداستۇرى دەستەلى ۇلت مەرەكەسى باياندى بولسىن! اقىندار القىنباسىن! – دەدى ەرلان بەيسەنباي ۇلى.
جىر جارمەڭكەسىنە سوناۋ تۇركيادان رۋحانياتتىڭ ۇلكەن جۇرەكتى جاناشىرى, قازاقستان ونەرىنە ەڭبەك سىڭىرگەن قايراتكەر, قاراعاندى وبلىسىنىڭ قۇرمەتتى ازاماتى, پروفەسسور دۇيسەن قاسەيىنوۆ كەلىپ, جاس دۇلدۇلدەردىڭ ونەرىن تاماشالاپ, وڭ باعالادى.
ايتىسقا ەندىگى ەلگە كەڭىنەن تانىلىپ ۇلگەرگەن ارقانىڭ ءار تارابىنان كەلگەن ايتىسكەرلەر قاتىستى. نۇرمۇحاممەد بايسۇگىروۆ, مۇحتار ءادىلوۆ, دوسكەي بوتباي, ەركەعالي بەكبولات, نۇرسۇلتان ىرىمباي, دۋمان سامات ۇلى, تورەحان سابەت, نۇرلىبەك توكەن, ەرعالي ءاليحان, جانارىس تىلەۋبەك, بەكارىس وسپانوۆ, قايرات رىسماعانبەت, سىرىم نىعىزباي, جاندوس باقىت ۇلى ساحناعا جەرەبە ارقىلى شىعىپ, ءسوز سايىستىردى.
ال جاس ورەندەردىڭ ونەرىنە اقىن, فيلولوگيا عىلىمدارىنىڭ دوكتورى, پروفەسسور قويلىباي اسان, قازاق ءان ونەرىنىڭ امىرەسى اتانعان, «قۇرمەت» وردەنىنىڭ يەگەرى سەرجان مۇسايىن, عالىم-ۇستاز سارجان تاكيروۆ, كورنەكتى پۋبليتسيست, وبلىستىق «وrtalyq Qazaqstan» گازەتىنىڭ باس رەداكتورى ەرسىن مۇسابەك, اقتانگەر اقىن, جىرشى-جىراۋ ديدار قاميەۆ باعا بەردى.
جاس دۇلدۇلدەردىڭ ءدۇبىرى ۇزاققا سوزىلدى. ولار ەل ىشىندەگى كەلەڭسىز دۇنيەلەردى تامىرشىداي تاپ باسىپ ايتتى. تايسالمادى دا, توسىلمادى دا. سوزدەن دە ىركىلمەدى. الەمگە اتى تاراعان عالىم قانىش ەسىمىن لايىقتى ۇلىقتاي الدى.
تالانتتاردىڭ تاعىلىمدى تىركەستەرىنە كورەرمەن كوركەم كوڭىل كۇيمەن قوشەمەت سوعىپ, قيقۋ قوسىپ وتىردى. مۇنى سەزىنگەن جاس شايىرلار اۋزىمەن قۇس تىستەپ, وت بۇركىدى.
– «ايتىس – ءسوز بارىمتاسى» دەپ زاڭعار مۇحتار اۋەزوۆ ايتىپ كەتكەندەي, ءسوز سايىسىندا اتالعان شايىرلاردىڭ ءبارى دە تىڭنان تىركەس, ورنەكتى ءسوز تاستادى دەي الامىز ورتاعا. اقىندار ەلدىك وزەكتى دۇنيەلەردى وزىنشە تاپسىرلەدى دەگەن سەنىمدەمىن, – دەيدى ايتىس تىزگىنشىسى, ادەبيەتشى عالىم, «ارقا» اقىندار مەن جىرشى-جىراۋلار مەكتەبىنىڭ باسشىسى ايتباي جۇماعۇل.
اقتىق سىنعا قاتارلاستارىنان وق بويى وزىق كورىنگەن ءتورت اقىن توپ جارىپ شىقتى. ءۇشىنشى ورىندى جاندوس باقىت ۇلى مەن نۇرسۇلتان ىرىمباي, ەكىنشى ورىندى سىرىم بەيسەمبەك پەن نۇرمۇحامبەت بايسۇگىروۆ قانجىعالاپ, ءبىرىنشى ورىن تۇعىرىنان دۋمان سىمبات كورىندى. ال ايتىستىڭ قوس اينالىمىندا دا شاشاسىنا شاڭ جۇقتىرماعان جاس دارىن ەركەعالي بەكبولات جۇلدە قورى 500 مىڭ تەڭگەنى قۇراعان باس بايگەنى ەنشىلەدى.
قاراعاندى وبلىسى
