جىل باسىندا مەملەكەت باسشىسى قاسىم-جومارت توقاەۆ ناۋرىز مەيرامىن مەرەكەلەۋگە جاڭاشا كوزقاراس قاجەت ەكەنىن اتاپ ءوتتى. وسىعان وراي جاڭا نومىردە جۋرنال بەتىندە ناۋرىز مەيرامىنا قاراستى عىلىمي ىزدەنىس پەن باتىل بولجام بەرىلدى. جۋرنال قىزمەتكەرى, جاس جازۋشى دوسحان جىلقىباي «ناۋرىز باتىر جانە تۇيە جىلى» ماقالاسىندا قازاقى تانىمدى عىلىمي پايىممەن شەبەر بايلانىستىرا بايانداپ, تابيعي كاتاكليزمدەر سەبەبىن حالىق فولكلورى مەن اڭىزداردان ىزدەيدى. سونداي-اق دوسحان «كۇن مەن ءتۇننىڭ تەڭەلۋى» اتتى ەكىنشى ماقالاسىندا قازاق حالقىنىڭ اسپان الەمىن, تابيعي قۇبىلىستاردى نازىك تۇسىنە وتىرىپ, كۇن رايىن عانا ەمەس, ادامزات بولاشاعىن دا سەرگەك پايىمداعانىن ناقتى دەرەكتەر ارقىلى سيپاتتايدى.
«اق جەلكەن» جۋرنالىن 1978-2000 جىلدار ارالىعىندا 20 جىل بويى باسقارعان, باسىلىمنىڭ «پيونەر» دەگەن اتاۋىن «اق جەلكەن» دەپ وزگەرتكەن قازاقتىڭ قابىرعالى قالامگەرى, پوەزيا پاتشايىمى فاريزا وڭعارسىنوۆانىڭ تۋعانىنا بيىل 85 جىل تولادى. وسى مەرەيلى داتاعا وراي جۋرنال بەتىندە اقىن جايلى ادەمى ەستەلىكتەر, سۇبەلى سۇحباتتار, عىلىمي ماقالالار جارىق كوردى. پارلامەنت قابىرعاسىندا فاريزا اپايمەن يىقتاسا قىزمەت ىستەگەن قوعام قايراتكەرى يراك ەلەكەەۆتىڭ, اقىننىڭ سوڭعى دەمى شىعاردا جانىندا بىرگە بولعان زيباگۇل كەمەلدىڭ, قالامگەردىڭ كۋرستاسى قادىر ءجۇسىپتىڭ ەستەلىكتەرى جان تەبىرەنتەدى. اقىننىڭ قىزمەتتەس شاكىرتتەرى بەيسەنباي سۇلەيمەنوۆ, بەكزات وماروۆ, ساكەن سىبانباي, باۋىرجان عۇبايدۋللين, داريا تالاپوۆا ەستەلىكتەرىندە فاريزا بەينەسى ادامگەرشىلىك, مەيىرىم, كىسىلىك سيپاتىنان ەرەكشە اشىلادى. اقىندار وڭايگۇل تۇرجان مەن ەلەنا ابدىحالىقوۆا وڭعارسىنوۆا ولەڭدەرىن جاڭاشا تالدايدى. قازاق جەرىندە اقىن اتىن العان مەكتەپتەردىڭ تىنىس-تىرشىلىگى دە جۋرنال بەتىندە كەڭىنەن كورىنىس تاپتى.
وتكەن جىلى «اق جەلكەن» جۋرنالى وقىرماندار اراسىندا «قايتالانباس ءسات» فوتوبايقاۋىن ۇيىمداستىرىپ, جىل سوڭىندا بەس جەڭىمپازعا باعالى سىيلىقتار ۇسىنعان ەدى. بيىل دا سول ءداستۇر جالعاسىن تابادى. باسىلىم ناۋرىز ايىنداعى سانىنان باستاپ «قازاقتىڭ نار تۇلعالارى» ۆيكتوريناسىن جاريالادى. ءار نومىردە جىل سوڭىنا دەيىن مەرەيتويلارى اتالىپ وتەتىن قازاق حالقىنىڭ اسىل پەرزەنتتەرى ق.ساتباەۆ, ش.ايمانوۆ, ب.سوقپاقباەۆ, ج.ايماۋىت ۇلى, ءا.قاستەەۆ, ت.ب. ءومىر جولى مەن شىعارماشىلىعىنا ارنالىپ 10 سۇراقتان تۇراتىن 10 ۆيكتورينا بەرىلەدى. ەڭ كوپ ۇپاي جيناعان بەس وقىرمانعا باعالى سىيلىقتار, اتاۋلى ديپلومدار تابىس ەتىلەدى. بيىل دا بايقاۋعا ع.قۇلاحمەت اتىنداعى قوعامدىق قور مەن MED365 كومپانياسى دەمەۋشىلىك كورسەتەدى. ناۋرىز ايىنداعى ۆيكتورينا ف.وڭعارسىنوۆاعا ارنالىپ, جاس وقىرماندارعا پوەزيا پاتشايىمىنىڭ ءومىر جولى, شىعارماشىلىعى, جۋرناليستىك قىزمەتى تۋرالى 10 سۇراق قويىلدى.
«اق جەلكەننىڭ» شىعا باستاعانىنا 2025 جىلى 100 جىل تولادى. ءبىر عاسىر بويى قازاق بالالارىنىڭ سەنىمدى سەرىگى, اقىلشى دوسى, تۇرعىلاس-سىرلاسى بولىپ كەلە جاتقان باسىلىم الداعى ۋاقىتتا دا وقىرماندارمەن ەتەنە تىنىستاپ, زاماناۋي تاقىرىپتاردىڭ بارلىعىن قامتىپ, ءار ءجاسوسپىرىمنىڭ ەسىگىن قاعىپ تۇرۋعا تىرىسادى.
