فوتو: gov.kz
ابىلحاكىم اقمىرزين,
دەنساۋلىق سالاسىنىڭ ۇزدىگى, «قۇرمەت» وردەنىنىڭ يەگەرى:
– ناۋرىزدا قىس پەن جاز مامىلەگە كەلگەندەي بولىپ, جەردىڭ توڭى ءجىپسىپ, تىرشىلىك ويانىپ, قۇرساقتاعى ءدان بۇرلەنە باستايدى. جىل باسىنىڭ وسى تىرشىلىكتىڭ ويانۋىمەن ورايلاس كەلۋى جاراتىلىستىڭ زاڭدىلىعى دا سياقتى. ونى اتا-بابالارىمىز ەرتە زاماننان-اق جۇلدىزعا قاراپ جوبالاپ, كۇن مەن ءتۇننىڭ تەڭەلۋىنە قاراپ تۇسپالداعان. اۋزىم اققا ءتيدى دەپ ادام قۋاناتىن, ءتىسىم كوككە ءتيدى دەپ مال-جان جۇباناتىن ۇلىس كۇنى – تۇلەپ جاڭارعان تابيعاتتىڭ, جاڭعىرىپ جاسارعان جاراتىلىستىڭ جىلۋى, جارىعى مولايعان بۇكىل دۇنيەنىڭ مەيرامى.
ناۋرىز مەيرامى ەندى مەملەكەت باسشىسىنىڭ تاپسىرماسىمەن دايىندالعان ارنايى تۇجىرىمداما بويىنشا اتالىپ وتەتىن بولدى. سونىڭ اياسىندا باعزى زاماننان بەرگى تابيعاتپەن ۇندەس بايىرعى يگى سالت-داستۇرلەرىمىز, ىزگى ادەت-عۇرىپتارىمىز جاڭعىرىپ جاتىر.
ناۋرىز – بۇكىلحالىقتىق مەرەكە, ءبىزدىڭ جەرىمىزدە ەڭبەك ەتىپ جاتقان بارشانىڭ ورتاق مەرەكەسى. ءبىز بۇل كۇندەرى جەر-انانى ايالاۋ, تابيعاتتى قاستەرلەۋ جونىندەگى پارىزىمىزدى ورىنداپ, ەسەلەپ ەڭبەك ەتۋگە, كوڭىلىمىزدە مەيىرباندىق پەن باۋىرمالدىق, كىشىپەيىلدىلىك پەن قايىرىمدىلىق سەزىمىن ۇيالاتۋعا ءتيىسپىز.
« ۇلىستىڭ ۇلى كۇنى قازان تولسا, اق مول بولادى. ۇلى كىسىدەن باتا الساڭ, ولجالى جول بولادى» دەمەكشى, مەيىربان حالقىمىزعا, ءاربىر وتباسىنا قۇت-بەرەكە اكەلسىن! اق ساقالدى اتالاردىڭ, اق جاۋلىقتى انالاردىڭ تىلەگى بارشانىڭ كوكىرەگىنە نۇر بولىپ قۇيىلسىن! كۇن ءتاڭىر, نۇرىڭمەن ايالا, جەر ءتاڭىر, ىرىسىڭدى اياما!
ەلەن ءالىمجان,
جازۋشى-دراماتۋرگ, حالىقارالىق «الاش» ادەبي سىيلىعىنىڭ يەگەرى:
– قانشا جەردەن رەسمي كۇنتىزبەنى نەگىزگە الىپ, جاڭا جىلدى الەمنەن قالماي قاڭتاردا قارسى العانىمىزبەن, ءوزىمىزدىڭ ءتول ناۋرىزدى ءبارىبىر ءبىرىنشى ورىنعا قويامىز. ويتكەنى ناۋرىزدىڭ ناعىز جىل باسى ەكەنىن اتا-بابالارىمىز, شىعىس حالىقتارى باعزى زاماننان-اق بىلگەن.
ناۋرىز – جەر-انانىڭ بۋساپ, تىرشىلىكتىڭ جاڭارىپ, كۇن مەن ءتۇننىڭ تەڭەلىپ, وزگەشە كەيىپكە ەنەتىن ايى. كۇللى تۇركى ۇلىسىنا ورتاق ۇلىستىڭ ۇلى كۇنى ءاز ناۋرىز مەرەكەسى دە – قازاق حالقى ءۇشىن ەرەكشە مەيرام. ۇلتتىڭ ۇلى سالت-داستۇرىنە نەگىزدەلگەن ايتۋلى مەرەكەنىڭ كوپشىلىككە بەرەر ءتالىمى مەن تاعىلىمى دا مول. بۇل كۇنى قىستان امان شىققان حالىق ءبىر-بىرىمەن كورىسىپ, حال سۇراسىپ, كەلەر كۇندەردەن جاقسى ءۇمىت كۇتەدى, ءبىر-بىرىنە يگى تىلەگىن ارنايدى. بۇل دا – حالقىمىزدىڭ عاسىرلار بويى جاساپ كەلە جاتقان ەجەلگى ءداستۇرى, كەلەر ۇرپاققا كورسەتكەن جاقسى ونەگەسى.
بۇگىندە ەلىمىزدە ناۋرىز مەرەكەسى جاڭاشا اتاپ ءوتىلىپ جاتىر. ونىڭ ىشىندە جامبىل وبلىسىندا دا ۇلىستىڭ ۇلى كۇنى جوعارى دەڭگەيدە ۇيىمداستىرىلىپ ءجۇر. كوكتەم شىعىپ, ناۋرىز ايى تۋا سالىسىمەن وڭىردە كوگالداندىرۋ جۇمىستارى قارقىن الادى.
جالپى, بۇل جىل باسىنان بارلىق ىزگى نيەتتى ادامدار سياقتى مەن دە جاقسىلىق كۇتەمىن. سونى تىلەيمىن. قاي زاماندا دا جاقسىلىقتىڭ ەڭ تورەسى – بەيبىتشىلىك. تىنىشتىق بولسا, توقشىلىق بولادى. سوناۋ 1986 جىلى باستالعان تاريحي سىلكىنىستەن ءوزىنىڭ كىسىلىك قاسيەتى ارقاسىندا قانتوگىسكە ۇرىنباي, «سۇلۋ تورى اتتاي» بولىپ ادەمى شىققان قازاق ەلى ۇلۋ جىلى دا ۇلتقا قىزمەت قىلار ۇلى ىستەرىن, تاۋەلسىزدىگىن ودان ءارى نىعايتا تۇسپەك. ادىلەتتى قازاقستان يدەياسىن تەمىرقازىق ەتىپ, العا قاراي نىق باسادى دەپ سەنەمىن.
ءتول مەرەكەمىز قۇتتى بولسىن! قازاققا جاراتۋشى يە قاشاندا جار بولسىن!
داۋلەت مۇقاەۆ,
ءماجىلىس دەپۋتاتى:
– جاستار – قوعامنىڭ ءبىر بولىگى رەتىندە مەملەكەتتە ماڭىزدى ءرول اتقارادى. سوندىقتان پرەزيدەنت قاسىم-جومارت توقاەۆ جاستاردىڭ بۇگىنى مەن بولاشاعىنا قامقورلىق جاساۋدى ءوز ساياساتىنىڭ نەگىزگى ءمانى دەپ سانايدى.
قازىر شەتەل اسىپ, وقۋ بىتىرگەن جاس ماماندار قاتارى دا جىل ساناپ بيلىك تارماقتارىن تولىقتىرىپ جاتىر. وسىلايشا, ەلدە ساپالى, بىلىكتى كادر جاساقتالىپ كەلەدى. دەسەك تە ەلىمىزدە جاستاردىڭ الەۋمەتتىك-ەكونوميكالىق جاعدايى تۇبەگەيلى شەشىمىن تاپتى دەۋ قيىن. رەسپۋبليكا بويىنشا 35-كە دەيىنگى وتانداستارىمىزدىڭ باسپاناسىز ءجۇرۋى, مەگاپوليستەردەن بولەك, قالا مەن شالعايداعى ەلدى مەكەندەردەگى ازاماتتاردىڭ ەكى قولعا ءبىر كۇرەك تاپپاي سەندەلۋى, ودان قالدى ءبىلىم دەڭگەيى مەن دەنساۋلىعى, مەملەكەتتىك باعدارلامالار تۋرالى حاباردارلىعىنىڭ تومەندىگى – ءالى دە وزەكتى كۇيىندە قالىپ وتىرعان تۇيتكىل.
پرەزيدەنت جىل سايىنعى ءداستۇرلى جولداۋلارىندا وسى جاستار ساياساتىن جەتىلدىرۋ بويىنشا ىرگەلى تاپسىرمالار جۇكتەپ جۇرگەنى بەلگىلى. تاياۋداعى ءۇشىنشى شاقىرىلعان ۇلتتىق قۇرىلتايدا دا مەملەكەت باسشىسى: «كوپ ۇزاماي مەملەكەتتى باسقارۋ ءىسى, ياعني ەل تىزگىنى بۇگىنگى جاستاردىڭ قولىنا وتەدى. سىزدەر وسى جاۋاپكەرشىلىكتى قازىردەن باستاپ سەزىنۋلەرىڭىز قاجەت. وزدەرىڭىزگە جۇكتەلەتىن تاريحي ميسسيانى ورىنداۋعا قاشاندا دايىن بولۋلارىڭىز كەرەك», دەپ قاداپ ايتتى. دەمەك ءبىز بولاشاعى جارقىن, قۋاتتى مەملەكەت قۇرۋ ءۇشىن ءونىمدى ەڭبەك ەتىپ, ساپالى ءبىلىم الىپ, ورتاق ماقساتقا جۇمىلا ءبىلۋىمىز كەرەك. جاڭا جىل باستاۋى ناۋرىز قارساڭىندا جۇكتەلگەن مىندەت ساپالى ورىندالىپ, كوزدەگەن مەجەگە جەتەمىز دەپ ويلايمىن. ەلدى كوركەيتىپ, مەملەكەتتىڭ ورنىقتى دامۋىنا سەپ بولامىن دەگەن ۇرپاق جالىنى وشپەسىن.
بيىل ەرەكشە جاعدايدا اتالىپ ءوتىپ جاتقان ناۋرىز – ەڭ الدىمەن, ەڭبەك مەيرامى, حالىقتىڭ تويى. جىل باسى جانىمىزدى جادىراتسىن, جۇرەگىمىزگە شاتتىق سىيلاسىن!
