اتالعان جارىستا قازاقستاننان بولەك, ساۋد ارابياسى, بەلگيا, حورۆاتيا, ۋكراينا, ازەربايجان, قىرعىزستان, رەسەي, تاجىكستان, وزبەكستاننان كەلگەن 234 بالۋان باق سىنادى. العاشقى كۇنى ءتورت سالماق دارەجەسىنىڭ ءتۇرلى ءتۇستى مەدالدارى ساراپقا سالىندى. سونىڭ بىرىندە قانداسىمىز ەراسىل جەڭىسكە تەڭ كەلەر ەشكىم تابىلمادى. 82 كگ سالماق دارەجەسىندە كۇرەسكەن ول فينالدا ازەربايجاندىق يسمايل رزاەۆقا سان سوقتىردى.
باسەكە اياقتالعان بەتتە باق وكىلدەرىنە سۇحبات بەرگەن ەراسىل: «جارىسقا ەكى اپتا بويى «الماتاۋ» سپورت بازاسىندا دايىندالدىق. قازىر سونىڭ جەمىسىن كورىپ وتىرمىز. بىردە-ءبىر باسەكەدە جەڭىس وڭايلىقپەن كەلگەن جوق. بارىنشا ناتيجەلى ونەر كورسەتۋ ءۇشىن كوپ كۇش سالدىم. اسىرەسە فينالدىق سايىس قيىنعا سوقتى. بەلدەسۋ بارىسىندا ازەربايجاننىڭ بالۋانىنان 2:7 ەسەبىمەن ۇتىلىپ جاتتىم. بىراق جەڭىس تۇعىرىنىڭ ەڭ بيىك ساتىسىنا كوتەرىلسەم دەگەن وي مەنى العا جەتەلەدى. ناتيجەسىندە, شەشۋشى تۇستا قارسىلاسىمنىڭ وسال تۇسىن تاۋىپ, جارىس جەڭىمپازى اتاندىم», دەپ اقتارىلا سويلەدى.
55 كگ سالماقتا بەيتاراپ سپورتشى رەتىندە ونەر كورسەتكەن رەسەيلىك الىبەك ءامىروۆتىڭ اسىعى الشىسىنان ءتۇستى. فينالدا ول جەرلەسىمىز ايبەك ايتبەكوۆتەن ايلاسىن اسىردى. 63 كگ سالماق دارەجەسىندە دە رەسەيدەن كەلگەن سپورتشىنىڭ باعى جاندى. اقتىق سىندا ەرزۋ زاكاريەۆ ءبىزدىڭ دامير يبراشەۆتى ەڭسەردى. 72 كگ سالماقتا رۋسلان نۇرۋللاەۆقا تەڭ كەلەر ەشكىم تابىلمادى. ازەربايجاننىڭ ءۇمىتى شەشۋى تۇستا تايىر امانگەلدىنى ءسۇرىندىردى.
ودان كەيىنگى كۇندەرى وڭداسىن حاميتوۆ (60 كگ), ازەربايجاندىق فارايم مۇستافاەۆ (67 كگ) پەن داۆۋد مامادوۆ (77 كگ), ۋكراينالىق ەگور ياكۋشەنكو (97 كگ) جانە رەسەيلىك مانسۇر سايتوۆ (87 كگ) پەن الەكساندر مەلەحوۆ (130 كگ) سىندى سايىپقىراندار جەڭىس تۇعىرىنىڭ ەڭ بيىك ساتىسىنا كوتەرىلدى. كوماندالىق ەسەپتە بەيتاراپ كوماندا رەتىندە قاتىسقان رەسەي بالۋاندارى ءبىرىنشى ورىن السا, ازەربايجان مەن قازاقستان قۇرامالارى ەكىنشى جانە ءۇشىنشى ورىندى ءوزارا ءبولىستى.
داڭقتى سپورتشى جاقسىلىق ۇشكەمپىروۆتى ەسكە الۋعا ارنالعان ءتۋرنيردىڭ جۇلدە قورى دا مول بولدى. ماسەلەن, باس جۇلدەنى قانجىعالارىنا بايلاعان بالۋاندار 1,5 ميلليون تەڭگەدەن السا, كۇمىسكە قول سوزعاندار 1 ميلليوندى يەلەندى. قولا مەدالدى موينىنا ىلگەن سپورتشىلار 500 مىڭدى قالتاعا باستى. ال چەمپيوندى تاربيەلەگەن جاتتىقتىرۋشىلارعا 100 مىڭ تەڭگەدەن بەرىلدى.
