جەرلەسىمىز 500 مەترلىك قاشىقتىقتى 41.676 سەكۋندتا جۇگىرىپ ءوتتى. ول تەك قىتايدىڭ اتاقتى سپورتشىسى سياوتسزيۋن ليننەن قالىپ قويدى. قولا مەدالدى كانادالىق دجوردان پەر-جيل يەلەندى. وسىلايشا, قازاقستاننىڭ ۇلتتىق قۇراماسى ءوز تاريحىندا تۇڭعىش رەت ەرەسەكتەردىڭ دۇنيەجۇزىلىك دوداسىندا جۇلدە الدى.
جالپى, دەنيس نيكيشانىڭ جانكۇيەلەرىن قۋانتىپ جۇرگەنىنە بىرەر جىلدىڭ ءجۇزى بولدى. اتاپ ايتساق, 2014 جانە 2015 جىلدارى ول تۇركيانىڭ ەرزۋرۋمى مەن جاپونيانىڭ وساكاسىندا ۇيىمداستىرىلعان جاستاردىڭ الەم بىرىنشىلىگىندە قولا مەدالدى موينىندا جارقىراتتى. 2017 جىلى الماتى مەن 2019 جىلى كراسنويارسكىدە الاۋى تۇتانعان دۇنيەجۇزىلىك ۋنيۆەرسيادادا ءتورت رەت ءۇشىنشى ورىنعا تابان تىرەدى. الەم كۋبوگىنىڭ كەزەڭدىك سايىستارىندا 2 التىن, 4 كۇمىس جانە 4 قولانى ەنشىلەدى.
سونىمەن قاتار وتانداسىمىز ءۇش بىردەي وليمپيا ويىندارىنا قاتىستى. 2014 جىلى سوچيدەگى ەستافەتالىق سايىستا دەنيس بەسىنشى ورىن السا, 2018 جىلى پحەنچحاندا التىنشى ساتىعا جايعاستى. ال 2020 جىلى بەيجىڭ وليمپياداسىنىڭ 500 مەترلىك باسەكەسىندە سەگىزىنشى ورىنعا تۇراقتاسا, 2000 مەترلىك سايىستا ۇزدىك بەستىكتى تۇيىندەدى.
