فوتو: اقوردا
پرەزيدەنت ءوز ءسوزىن اتىراۋ وبلىسىنىڭ تاريحي ءمانى مەن ستراتەگيالىق ماڭىزىن تۇسىندىرۋدەن باستادى.
« ۇلى جىبەك جولىنىڭ بويىندا تۇرعان قالا ءبىر كەزدەرى ايرىقشا گەوستراتەگيالىق ءرول اتقارعان. باتىس پەن شىعىستىڭ ەكونوميكالىق, ساياسي, مادەني قارىم-قاتىناسىنا ەرەكشە ىقپال ەتكەن. اتاقتى حاندارىمىز وسى جەرگە ورداسىن تىگىپ, ەل بيلەگەن. بىرقاتارى سارايشىقتا ماڭگىلىك مەكەنىن تاپقان. تاريحشىلاردىڭ پايىمداۋىنشا, قازاق حاندىعىن قۋاتتى مەملەكەتكە اينالدىرعان قاسىم حان وسىندا جەرلەنگەن. ءبىر سوزبەن ايتساق, سارايشىق – ءتول شەجىرەمىزدە ايرىقشا ورنى بار كيەلى شاھار», دەدى قاسىم-جومارت توقاەۆ.
مەملەكەت باسشىسى ۇلتتىق قۇرىلتاي جيىندارىندا تۇيىتكىلدى ماسەلەلەر كوتەرىلىپ, شەشىمىن تابۋ جولىندا ءىس اتقارىلىپ جاتقانىن اتاپ ءوتتى. ۇلت بولۋ جولىندا ۇلتتىق قۇندىلىقتار جۇيەسىن قالىپتاستىرۋعا نازار اۋداردى.
«قۇرىلتاي – ەشقاشان توي تويلاپ, اڭگىمە-دۇكەن قۇراتىن جيىن بولعان ەمەس, كەلەشەكتە دە ونداي بولمايدى. الدىڭعى ەكى وتىرىستا ەلىمىزدى دامىتۋعا قاتىستى ماڭىزدى باستامالار كوتەرىلدى. ونىڭ ءبىرازى ورىندالدى. جالپى وزگەرىستەر بارلىق سالادا بولىپ جاتىر», دەدى پرەزيدەنت.
