سۋرەتتى تۇسىرگەن – الەكساندر مارچەنكو
بىردەن ايتايىق, وندىرىسكە قاجەتتى شيكىزاتتى شەتەلدەن ساتىپ الادى. ارنايى قوسپانى «Hyundai», «Kia» كولىكتەرى ءۇشىن نيدەرلاند پەن وڭتۇستىك كورەيادان اكەلەدى. ولاردىڭ وكىلى كاسىپورىندا جارتى جىلدا ءبىر بولىپ تۇرادى. ساپاسىن سالىستىرادى, سىنامالاردى تەكسەرەدى. شەتەلدىك ساراپشىلار كەي جاعدايدا كەيبىر سىناما ءتۇرىن وڭتۇستىك كورەياعا جىبەرەدى. قىسقاسى, ساپاعا قاتتى كوڭىل بولىنەدى.
زاۋىتتاعى «Hyundai», «Kia» ماركالى سۋ جاڭا كولىكتەرگە «Protec» برەندىنىڭ ءانتيفريزىن قۇيادى. مۇنىمەن قوسا, سارانداعى «QazTehna» زاۋىتىنان شىعاتىن YUTONG اۆتوبۋستارىنا وسى سۇيىقتىق قولدانىلادى. قوستانايداعى كولىك قۇراستىراتىن «سارىارقااۆتوپروم» جشس-مەن دە سەرىكتەس.
ء«بىز كوبىنە تەندەرگە قاتىسامىز. «قازاقستان تەمىر جولى», «قازپوشتا» سەكىلدى ىرگەلى ۇيىمدارمەن جۇمىس ىستەيمىز. قازىر قىتايلىق «CNPC» كومپانياسىمەن كەلىسسوز جۇرگىزىپ جاتىرمىز. كەلەسى جىلى ءونىمدى ولارعا دا جەتكىزىپ قالۋىمىز مۇمكىن. ويتكەنى ونىمدەرىمىزدىڭ ساپاسىن جوعارى باعالاپ وتىر. جالپى, ءانتيفريزىمىز شەتەلدىك كولىكتەردە تۇراقتى قولدانىلىپ كەلەدى. ءبىز ISO 9001:2015 ساپا مەنەدجمەنتى جۇيەسىن ەنگىزدىك», دەيدى كاسىپورىن ديرەكتورى سۆەتلانا سوروكولەتوۆا.
قاراعاندىدان شىعاتىن انتيفريزدەر بىلتىردان باستاپ وزبەكستان مەن رەسەيگە ەكسپورتتالادى. ەندىگى جوسپار – قىتاي نارىعى.
كاسىپورىندا ساپانى باقىلايتىن زەرتحانا مەن عىلىمي-زەرتتەۋ ورتالىعى بار. وندا شيكىزات تا, دايىن ءونىم دە زەرتتەلەدى. انتيفريز سۋىنىڭ سىناماسى ايىنا ءبىر رەت زەرتحانادان وتەدى. ء«بىزدىڭ حيميك-تەحنولوگ, بىلتىر دوكتورانتۋرانى ءبىتىردى. وڭتۇستىك كورەياعا بارىپ, تاجىريبە الماسىپ كەلدى», دەيدى كاسىپورىن باسشىسى.
كاسىپورىننان جەڭىل كولىكتەرگە, جۇك جانە اۋىل شارۋاشىلىعى تەحنيكالارىنا ارنالعان 12 ءتۇرلى ءونىم شىعادى. انتيفريز 200 ليترلىك بوشكە مەن ءتۇرلى كولەمدەگى قۇتىلارعا قۇيىلىپ ساتىلادى. ءونىمنىڭ سىرتىندا QR كود بار. سول ارقىلى كاسىپورىننىڭ سايتىنا ءوتىپ, كولىگىڭىزدىڭ ماركاسىن تاڭداساڭىز, قانداي انتيفريز قۇيۋ قاجەتتىگى جونىندە كەڭەس الاسىز.
زاۋىت جابدىعىنىڭ كوپ بولىگى – وتاندىق ونىمدەر. ەۋروپا مەن رەسەيدەن تەك ارنايى سورعىلار الىنعان. باعدارلامالىق جۇيە دە سولاردىكى. بۇگىندە كاسىپورىننىڭ ايىنا 160 توننا ءونىم شىعاراتىن قۋاتى بار. نارىقتى جاۋلاي باستاعان قاراعاندىنىڭ انتيفريزىنە سۇرانىس كۇن وتكەن سايىن ارتىپ كەلەدى. سول سەبەپتى, كاسىپورىندى مودەرنيزاتسيالاۋ قولعا الىنا باستادى. ەندى ءتورت توننالىق كونتەينەرلەر كەلەدى. زاۋىتتى جاڭا قۇرىلعى, جابدىقتارمەن جاڭارتۋ جۇمىستارى جولعا قويىلىپ جاتىر.
– تۇنگى اۋىسىممەن جۇمىس ىستەۋگە بولادى. بىراق ول قيىن, قاتەلەسىپ كەتۋى مۇمكىن. سوندىقتان دۇرىسى – جۇمىسكەر سانىن ارتىرۋ. وندا ءبىر اۋىسىمدا 12 تونناعا دەيىن ءونىم وندىرەمىز. كاسىپورىن بىرتىندەپ اۆتوماتتاندىرىلىپ كەلە جاتىر. جۇمىستىڭ كوپ بولىگىن كومپيۋتەر ارقىلى اتقارامىز. قانداي قوسپا قوسۋ كەرەك, قانشا مولشەردە, ونىڭ ءبارى باعدارلامالىق جۇيەمەن جۇزەگە اسادى, – دەيدى ديرەكتور.
اتالعان كاسىپورىن العاشقىدا «روسنەفت» كاسىپورنىنىڭ ونىمدەرىن ساتقان. كەيىن وزدەرى شىعارۋدى ويلاستىرادى. ول كەزدە Hyundai جانە Kia كولىكتەرىنە قۇياتىن ەلىمىزدە انتيفريز جوق ەدى. سول سەبەپتى, زاۋىت باسشىلىعى كورەي وندىرۋشىلەرىنە شىعىپ, كەلىسىم العان. كاسىپورىن «Damu» كاسىپكەرلىكتى دامىتۋ قورىنىڭ كومەگىمەن زاۋىت قۇرىلعىلارىن جاڭارتىپ قويىپتى.
قازىر وندا 40-قا جۋىق ادام جۇمىس ىستەيدى. وسكەمەن مەن الماتى قالاسىندا فيليالدارى بار. استانادان دا اشۋدى جوسپارلاپ ءجۇر. ەندىگى ويلارى – شەتەلدەن قوسپا تاسىعانشا, ونىڭ دا وندىرىسىنە كىرىسۋ. بۇل شارۋاعا دا بىلەك سىبانا كىرىسىپ كەتتى. جاقىن ارادا وزدەرى ازىرلەگەن قوسپا ارقىلى ەكى ءونىمدى شىعارىپ كورمەك. العاشقىسى سىناقتان ءساتتى ءوتىپتى.
كاسىپورىننىڭ انتيفريز سۇيىقتىعىن نارىققا شىعارعانىنا بيىل بەس جىل تولدى. ىشكى قاجەتتىلىكتى دە قامتىپ, سىرتقى تۇتىنۋشىلاردىڭ دا سۇرانىسىنا يە بولىپ جاتىر. كولىك يەلەرى ساپاسىنا دا, باعاسىنا دا ريزا. كاسىپورىننىڭ و باستان كوزدەگەنى دە وسى ەدى.
قاراعاندى وبلىسى
