ە.بوكەتوۆ اتىنداعى قاراعاندى ۋنيۆەرسيتەتى فيلولوگيا فاكۋلتەتىندە ءبىلىم العان مامان جيىرما التى جىل وسى مەكتەپ-ليتسەيدە ساباق بەرىپ كەلەدى. ىزدەنىمپاز پەداگوگ ءار ساباعىنا جوبا قورعاپ شىعاتىنداي دايىندالادى.
– الدىمدا ءبىلىم الىپ وتىرعان ءار وقۋشى – ءبىر-ءبىر جوبام, – دەيدى. – ءبىزدىڭ پاندە ەڭ الدىمەن بالانىڭ تىلگە, ادەبيەتكە قىزىعۋشىلىعى بولۋ كەرەك. شىنى كەرەك, گادجەتكە بايلانعان جاستاردىڭ نازارىن اۋدارۋ وڭاي ەمەس, ارينە. گادجەتتى جوققا شىعارماي, سول ارقىلى دا بالالاردى كىتاپ وقۋعا باۋليمىز. رۋحاني ءىس-شارالار دا وقۋشىلاردىڭ ىنتاسىن ارتتىرۋعا ىقپال ەتەدى, – دەيدى پەداگوگ.
اسەم ادەبيەتتى عىلىميلاندىرۋ باعىتىندا ۇزدىكسىز جۇمىس ىستەپ ءجۇر. نەگە دەسەڭىز, ءتىلدىڭ, ادەبيەتتىڭ تەورياسىن بىلمەگەن وقۋشى جاۋابىن ءجوندى بەرە المايدى دەگەن ۇستانىمدا. سول سەبەپتى دە ءار ىزدەنىستەن عىلىمي نەگىز كورەدى.
– كوپشىلىك مۇعالىم وقۋشىنىڭ جاۋابىن ءوزى ايتىپ قويىپ جاتادى. بالا سۇراعىڭىزعا دۇرىس جاۋاپ بەرسىن, قاتە جاۋاپ بەرسىن, ءوزى جەتكىزۋى كەرەك. بالانىڭ ويىن مۇقيات تىڭداۋ كەرەك جانە وزىڭىزبەن ءبىر دەڭگەيدە ەمىن-ەركىن اڭگىمەلەسۋ كەرەك. سوندا بالانىڭ ايتارى انىق بولىپ, ساباعىڭىز ءساتتى وتەدى. قازىرگى بالالارعا قۇر ءسوز ەمەس, كرەاتيۆ كەرەك. جان-جاقتى بولۋ قاجەت. ويتكەنى بالالاردىڭ ويى كۇردەلەنىپ بارادى, – دەيدى مۇعالىم.
ءيا, ۇجىمداعى عانا ەمەس, ايماقتاعى ارىپتەستەرى ونى شىنىمەن دە جاڭاشىل دەپ تانيدى. بىلتىرعى وقۋ جىلىندا اتتەستاتسيادان ءساتتى ءوتىپ, پەداگوگ-زەرتتەۋشى مارتەبەسىن راستاپ العان. مۇعالىمدەرگە قاتىستى وتەتىن عىلىمي-ادىستەمەلىك كونفەرەنتسيا, ءتۇرلى ترەنينگتەن قالىس قالمايدى.
ارينە, ۇستازدىڭ كورسەتكىشى شاكىرتتەرىنىڭ جەتىستىگىمەن ولشەنەدى. ونىڭ شاكىرتتەرى ءتۇرلى كونكۋرسقا, ينتەللەكتۋالدىق مارافوندارعا, وليمپيادالارعا, عىلىمي-تاجىريبەلىك كونفەرەنتسيالارعا قاتىسىپ, مەكتەپتەرىنە ولجا سالىپ ءجۇر.
ءا.بەرىكقىزىنىڭ ءبىز بىلە بەرمەيتىن تاعى ءبىر قىرى بار. ارتىستىك. ءوزى مەكتەبىندەگى «ساحنا سىرى» اتتى ۇيىرمەگە جەتەكشىلىك ەتەدى. بالالاردىڭ جان دۇنيەسىنە ەنە الاتىن ەكىنىڭ ءبىرىنىڭ قولىنان كەلە بەرمەيتىن قاسيەتى مەن بالدىرعانداردى كەيىپكەر الەمىنە ەندىرە الاتىن ارتىستىك قابىلەتىنە ارىپتەستەرى قايران قالىپ جاتادى.
– بالا بولعان سوڭ ولار كوڭىل كۇي مەن سەزىمگە جاقىن. ساحنا دەگەن كيە. ساحنا دەگەن ءومىر. سول ارقىلى ولارعا رۋحاني تاربيە بەرەمىز. ءتۇرلى قويىلىمدار قويامىز. جالپى, مەكتەپتەگى مادەني ءىس-شارالارعا وقۋشىلارىم قالىس قالمايدى, قۇلشىنىسپەن قاتىسادى. بۇل دا كەرەك, – دەگەن پىكىرىمەن ءبولىستى كەيىپكەرىمىز.
مۇنىڭ ءبارى ءبىر عانا ەڭبەك دەگەن شەڭبەردىڭ شەكاراسىنا توپتاسادى. سول ماڭداي تەر ەڭبەگىنىڭ اقتالعانى – 2018 جىلى ىبىراي التىنسارين اتىنداعى توسبەلگىنى تاعىنعانى. جو-جوق, قاتەلەسەمىز. اسەم ۇستاز ولاي ويلامايدى. «ەڭبەگىمنىڭ جانعانىن وقۋشىلارىمنىڭ جارقىن جەتىستىكتەرىمەن ولشەيمىن», دەيدى. راسىمەن, ۇزدىك ۇستازدىڭ جۇرەك تۇكپىرىندە «شاكىرتتەرىم وزىمنەن وزسا» دەگەن ىزگى تىلەگى جاتادى ەمەس پە؟..
ۇستاز – وتباسىندا اياۋلى جار, قامقور انا. جولداسى ماناربەك قىزىروۆ اسكەري قىزمەتىن ابىرويمەن اتقارىپ, سول سالادان زەينەتكە شىققان. قازىر جەكە كاسىپپەن اينالىسادى. ۇلدارى بەكەجان بولاشاق كوللەدجىندە ءۇشىنشى كۋرستا وقىپ ءجۇر. دەنە شىنىقتىرۋ ءپانىنىڭ مۇعالىمى بولماق نيەتى بار. ال ەركە قىزدارى ءىنجۋ – اناسى ەڭبەك ەتەتىن مەكتەپتىڭ 7-سىنىپ وقۋشىسى. قىزدارى دا اناسىنىڭ ىزىمەن ءجۇرىپ, مۇعالىم بولعىسى كەلەدى. بۇل شاڭىراق ءۇشىن ۇستازدىڭ قادىرى تىم بيىكتە.
قاراعاندى وبلىسى
