ءبىرجاندى بىرىككەن اراب امىرلىكتەرىنىڭ اۋە كومانياسى قازاقستاننان شاقىرتىپ العان. قازىر كەلىسىمشارت نەگىزىندە ىستەيدى. اۋە جۇرگىزۋشىسى الەمنىڭ تۇكپىر-تۇكپىرىنە جولاۋشى تاسيدى. ونى الپاۋىت شەتەلدىك كومپانيا باسشىلارى ءۇش كۇندىك سىناقتان سوڭ بىردەن جۇمىسقا العان.
«شەتەل اۋە كومپانياسىندا جۇمىس ىستەۋ – ۇلكەن تاجىريبە مەكتەبى. الەمنىڭ ءارتۇرلى مەكەنىنە ۇشىپ, ءارتۇرلى ۇلت وكىلدەرىمەن ارىپتەس بولۋ, ولاردىڭ ادەت-عۇرپىن, ءتىلى مەن مادەنيەتىمەن تانىسۋ كوڭىل كوكجيەگىمنىڭ اشىلۋىنا اسەر ەتەدى. قازاقستاننان شىققان ۇشقىشتار قاتار, ۆەتنام, گونكونگ تاعى باسقا دا دۇنيەجۇزىلىك اۋە كومپانيالارىندا جۇمىس ىستەپ جاتىر. ال بىزگە اۆياتسيا سالاسىن دامىتۋعا ءالى دە كوپ تەر توگۋ كەرەك. جاڭا ۇشۋ تەرمينالدارى سالىنىپ, جاڭا باعىتتار اشىلا بەرسە, اۋە قىزمەتى دە زاماناۋي جاعىنان دامي تۇسپەك», دەگەن پىكىر ايتتى ول.
الىسقا كوز تاستاساق, ونىڭ ءومىرى كوزىن اشقالى بەرى ۇشاقپەن بايلانىستى. نەگە دەسەڭىز, اكەسى تالعاتبەك ۇشاقتارعا تەحنيكالىق قىزمەت كورسەتۋ ورتالىعىندا جۇمىس ىستەگەن. رەسەيدەگى چكالوۆ اتىنداعى اۆياتسيالىق تەحنيكالىق كوللەدجىندە, سوسىن الماتىداعى ازاماتتىق اۆياتسيا اكادەمياسىندا وقىعان. بالا كەزىندە اكەسى ۇنەمى «ان-24», «تۋ-134», «ياك-42», «تۋ-154» ۇشاقتارىندا قالاي ينجەنەر-مەحانيك بولىپ جۇرگەنىن ايتىپ بەرەدى ەكەن.
العاشىندا ارمان قۋىپ الماتى قالاسىنداعى اكەسى وقىعان ازاماتتىق اۆياتسيا اكادەمياسىنا وقۋعا تۇسكەن. دەگەنمەن ءبىرىنشى كۋرستى اياقتاعان سوڭ وقۋىن تاستاپ كەتكەن. سولاي ءجۇرىپ «Air Astana»-نىڭ «Ab-Initio» ۇشقىشتاردى دايىنداۋ باعدارلاماسى اياسىندا ەمتيحان تاپسىرادى. سىناقتى ءساتتى تاپسىرىپ, جاقسى ناتيجە كورسەتكەن ءبىرجان امەريكاداعى «Aerosim Flight Academy»-گە وقۋعا تۇسەدى. وندا ءبىر جارىم جىل وقىپ, كەيىننەن بەلگيانىڭ شارلەرۋا قالاسىنداعى «Belgian Flight School» ۇشقىشتاردى دايارلاۋ مەكتەبىندە 3 اي ءبىلىم الادى. وقۋىن بىتىرگەن سوڭ ەلىمىزدەگى اۋە كومپانياسىندا ۇشقىش بولىپ 7 جىل ىستەگەن. ال وسىدان 3 جىل بۇرىن الەمدىك كومپانيالارعا جۇمىس ىستەۋ ماقساتىندا قۇجاتىن جىبەرگەن. ونىڭ ويىنشا, شەتەلدىك كومپانيالاردىڭ تولەيتىن جالاقىسى ءبىزدىڭ ەلدەگى ەڭبەكاقىمەن سالىستىرعاندا الدەقايدا مول. قىزمەتكەرلەرگە جان-جاقتى جاعدايدا دا جاساپ بەرەدى. ال ءبىزدىڭ «وتاندىق اۋە تاسىمالداۋ سالاسىن ءالى دە دامىتا ءتۇسۋ كەرەك», دەپ ويلايدى ءبىرجان.
قازىر ول 600 ادامدىق Airbus A380 ۇشاعىندا ەكىنشى پيلوت بولىپ جۇمىس ىستەيدى. كوبىنە اقش, اۋستراليا ەلدەرىنىڭ, ەۋروپانىڭ ءىرى قالالارىنا ۇشادى. نەگىزىندە دۇنيەجۇزىنىڭ بارلىق كونتينەنتتەرىنە رەيستەر بار. ۇلكەن ۇشاق بولعان سوڭ ۇزاق رەيستەر جاسايدى. ورتاشا العاندا 12-13 ساعاتتى الادى, ونىڭ ەڭ ۇزاق ساپارى – بىرىككەن اراب امىرلىكتەرىنەن اقش-تىڭ كاليفورنيا شتاتىنا ۇشۋ كەزىندە بولعان. ول كەزدە 16-17 ساعاتتاي اۋەدە بولىپتى.
«بىرىككەن اراب امىرلىكتەرىندە ۇشقىشتارعا بارلىق جاعداي جاسالعان. كومپانيا تۇراتىن ءۇيدى وزدەرى بەرەدى. شاعىن وتباسى بولسا قالادان پاتەر جالداپ بەرەدى. كوپبالالى وتباسى بولسا, جەر ۇيدەن بەرەدى. ۇشقىشتىڭ بالالارىن حالىقارالىق وقۋ ورىندارىندا تەگىن وقىتادى. مەديتسينالىق ساقتاندىرۋ بار جانە جىلىنا بىرنەشە رەت ۇشۋ بيلەتتەرىن تەگىن بەرەدى. ۇشقىشتىڭ فيزيكالىق جانە پسيحولوگيالىق دەنساۋلىعى ۇنەمى الەمدىك ستاندارتقا ساي بولۋى كەرەك. ۇشقىشقا دا قويىلاتىن تالاپ وتە جوعارى. اسپاندا بولۋى مۇمكىن كۇردەلى جاعدايلارعا ءاردايىم دايىن بولۋىمىز كەرەك», دەپ اقتارىلدى ۇشقىش.
قازاقتى وزگە ەلگە تانىتىپ جۇرگەن ءبىرجان دومبىرانى دا شەبەر وينايدى. «ەلدى ساعىنعاندا دومبىرا سەرىگىم» دەيدى ۇشقىش.
