اقمولا وبلىسى قوسشى قالاسىنىڭ مادەنيەت ۇيىنە قاراستى ۇلتتىق اسپاپتار مۋزەيىنىڭ قورىندا ساقتالعان كونە اسپاپتاردىڭ ۇزىن سانى 1600-دەن اساتىن كورىنەدى. مۋزەي باسشىسى ازامات باقيا ادەتتە كوزىمىز كورىپ ۇيرەنگەن ۇلتتىق اسپاپتاردان بولەك, جەلبۋاز, ۋىلدەك, تاستاۋىق, ۇسكىرىك, قۇسسايراۋىق, شىڭىراۋ, قوسساز, قوسۋىلدەك, ت ۇلىپسىرناي, كەرنەي, ۇرا, بۇعىشاق اسپاپتارىنىڭ ارقايسىسىنىڭ ەرەكشەلىگىنە توقتالدى. كوبى كورمەك تۇگىلى, اتىن ەستىمەگەن ساز بۇيىمدارى. ايتۋىنشا, كەز كەلگەن ادام سازسىرنايدا 5-7 مينۋتتا ويناپ ۇيرەنە الادى. «سازسىرناي اسپابى جاس بالالار ءۇشىن وتە پايدالى. مۇندا 6 ويىق – 6 نوتا بار. ال بالالار قولىنان تاستامايتىن سمارتفوندا بۇدان دا كوپ كومبيناتسيا جاسايدى. بىرىنشىدەن, ۇرمەلى اسپاپ وكپەگە پايدالى. ەكىنشىدەن, قولدىڭ ماتوريكاسىن دامىتۋعا وتە ىڭعايلى», دەيدى ەتنوگراف.
كورمەدەگى ەڭ كونە جادىگەرلەردىڭ ءبىرى – 223 جىل بۇرىن جاسالعان دومبىرا. ونىڭ بەت تاقتايى 1960 جىلدارى اۋىستىرىلعان ەكەن. ال اكادەميك قانىش ساتباەۆ ۇستاعان دومبىرانىڭ كوشىرمەسى ايگىلى جەرلەس عالىم تۋرالى فيلمدە پايدالانىلعان.
كەلۋشىلەردى ەرەكشە قىزىقتىرعان جادىگەر – جولبارىستىڭ ءۇنىن اينىتپاي كەلتىرەتىن ەرەكشە اسپاپ. بۇل – كادىمگى قاۋاق دەگەن كوكونىس. قاۋاقتىڭ ەكى جاق شەتىن كەسىپ تاستاپ, ءىشىن تازالايدى. بەتىن ەشكىنىڭ تەرىسىمەن قاپتايدى. ورتاسىن تەسىپ, قالىڭدىعى ءبىر ەلى قىلدى بەكىتەدى. قىلدى سۋلاپ تارتقان كەزدە اسپاپتان ايبات شەككەن جولبارىستىڭ ءۇنى شىعادى. وسى دىبىستى ەستىگەن وزگە اڭدار قامىس ىشىندە جولبارىس بار ەكەن دەپ جاقىندامايدى ەكەن.
كورمەنىڭ ۇيىمداستىرىلۋىنا «شاڭىراق» وبلىستىق ورتالىعى مەن «Jebe» قوعامدىق بىرلەستىگى ۇيىتقى بولدى.
پاۆلودار
