كوللاجدى جاساعان – قونىسباي شەجىمباي, «EQ»
الماتى قالاسى جەكە سوت ورىنداۋشىلارى وڭىرلىك پالاتاسىنىڭ باسشىسى ايدىن قايداروۆتىڭ ايتۋىنشا, قازىرگى ۋاقىتتا قالادا اليمەنت ءوندىرىپ الۋعا قاتىستى 18 مىڭنان استام ءىس قارالىپ جاتىر. نەعۇرلىم ءتيىمدى جۇمىس ىستەۋگە كەيبىر اليمەنت مىندەتتەمەلەرىن ورىنداۋدى عانا پىسىقتايتىن 10 مامانداندىرىلعان كەڭسە قۇرىلعان. ايتالىق, شاھاردا ەڭ ۇلكەن اليمەنت بويىنشا بەرەشەك بۇگىندە 63 ميلليون تەڭگەنى قۇرايدى.
«وكىنىشتىسى, ستاتيستيكا اليمەنت تولەمەۋدىڭ كوپتەگەن جاعدايىن كورسەتەدى. ماقساتىمىز – ماسەلەنىڭ زاڭدى جاعىن قامتاماسىز ەتۋ عانا ەمەس, سونىمەن قاتار قوعامنىڭ نازارىن وسى وزەكتى ماسەلەگە اۋدارۋ. ماسەلەنى رەتتەۋدە تسيفرلىق باقىلاۋ جۇيەسىنىڭ كومەگىنە جۇگىنىپ, قوعامدىق ۇيىمدارمەن بىرلەسە جۇمىس ىستەپ كەلەمىز. بەرەشەگى ءۇش ايدان اساتىن 1 مىڭ پروبلەمالىق ءىس بار. اليمەنت تولەمەيتىندەر كوبىنە ءوز ارەكەتتەرىن تۇراقتى جۇمىستىڭ جوقتىعىمەن دالەلدەيدى, وسىعان بايلانىستى تجك تاراپىنان قاماۋعا الۋ جانە شەكتەۋلەر تۇرىندە ماجبۇرلەپ ورىنداۋ شارالارىنا ۇشىرايدى», دەيدى ا.قايداروۆ.
الماتى قالالىق ادىلەت دەپارتامەنتى سوت ورىنداۋشىلارىنىڭ قىزمەتىن رەتتەۋ جانە باقىلاۋ ءبولىمىنىڭ باسشىسى ءانۋار جەكسەكوۆ بورىشكەرلەردەن اليمەنت ءوندىرۋ بارىسىندا قيىندىق تۋدىراتىن بىرنەشە سەبەپتى اتادى.
«كۇش-جىگەرىمىزگە قاراماستان, اليمەنت ماسەلەسىن شەشۋ مەملەكەتتىك جانە جەكە ينستيتۋتتاردىڭ, سونداي-اق بۇكىل قوعامنىڭ بىرلەسكەن كۇش-جىگەرىن تالاپ ەتەدى. بۇل – وتباسىلىق قۇندىلىقتار مەن بالالار ءال-اۋقاتىنىڭ نەگىزدەرىنە قاتىستى ماسەلە. ەلىمىزدە تۇرمىسى تومەن وتباسىلاردىڭ باسىم بولىگىن اليمەنت المايتىن شاڭىراق قۇراپ وتىر. نەكە (ەرلى-زايىپتىلىق) جانە وتباسى تۋرالى كودەكستىڭ 138-بابىنا سايكەس اتا-انالار كامەلەتكە تولماعان بالالارىن اسىراۋعا مىندەتتى. مازمۇن بەرۋ ءتارتىبىن اتا-انالار دەربەس ايقىندايدى. پالاتا بورىشكەرلەر اراسىندا بالالاردى اسىراۋ جانە اليمەنت تولەۋدىڭ ءتۇرلى ءتاسىلى تۋرالى كەلىسىم جاساسۋ مۇمكىندىگىن ءتۇسىندىرۋ جۇمىستارىن جۇرگىزەدى», دەيدى مامان.
ا.قايداروۆ الماتىدا بورىشكەر جاساعان مەدياتيۆتىك كەلىسىم اياسىندا ءۇش بولمەلى پاتەردى اليمەنت بويىنشا ءىرى بەرەشەكتى وتەۋ ەسەبىنە بەرۋ دە بۇرىن-سوڭدى بولماعان جاعداي ەكەنىن اتاپ ءوتتى. سونداي-اق تاعى ءبىر بورىشكەر پاتەردەگى ۇلەسىنىڭ جارتىسىن اليمەنت ەسەبىنە بەرگەن. بورىشكەردەن م ۇلىكتى ماجبۇرلەپ الىپ قويۋ مىسالدارى دا كوپ كەزدەسەدى. تاياۋدا كەزەكتى بورىشكەردىڭ بىرىنەن «لەكسۋس-570» اۆتوكولىگى تاركىلەنسە, جىل باسىنان بەرى اليمەنت تولەمەگەن 10 ازاماتتىڭ كولىگى ايىپ تۇراعىنا قويىلعان.
ۇزاق ۋاقىتتان بەرى ءوز بالا-شاعاسىنا ءتيىستى كومەك كورسەتۋدەن قالىس قالعان ازاماتتاردىڭ جۇرگىزۋشى كۋالىگىن توقتاتا تۇرۋ ءتيىمدى ناتيجە كورسەتكەن. الماتى قالاسىنىڭ جەكە سوت ورىنداۋشىلار پالاتاسى اليمەنتتەردى ءوندىرىپ الۋ بويىنشا اكتسيالار وتكىزەدى. سونىڭ ىشىندە بريفينگتەر مەن زاڭناماداعى وزگەرىستەردى ءتۇسىندىرۋ, جۇمىسسىز بورىشكەرلەردىڭ ءتىزىمىن جاساۋ جانە ەڭبەك بيرجالارى, بوس ورىندار جارمەڭكەسى ارقىلى ولاردىڭ جۇمىسقا ورنالاسۋىنا كومەكتەسۋ ماسەلەلەرى ناقتى قولعا الىنعان. ماماندار اليمەنت ماسەلەسىن وڭتايلى شەشۋ تەك بىرلەسكەن كۇش-جىگەردىڭ ناتيجەسىندە جۇزەگە اساتىنىن ايتادى.
الماتى
