وڭىردە تۇڭعىش رەت اشىلعان اقپاراتتىق كەشەن بەينە جانە اۋديو جازۋعا, اقپاراتتىق بەينەپرەزەنتاتسيالار دايىنداۋعا, ونلاين دارىستەر مەن ۆەب-كونفەرەنتسيالار وتكىزۋگە ارنالعان.
اتالعان جوعارى وقۋ ورنىنىڭ رەكتورى ەرجان امىربەك ۇلى مۋلتيمەديالىق بەينەستۋديانىڭ وقۋ بارىسىندا قولدانۋعا ەرەكشە قاجەت ەكەنىن جەتكىزدى.
«الەمدىك ءبىلىم بەرۋ ءۇردىسى جاڭا ستراتەگيالىق ماقساتتاردى كوزدەيدى. سايكەسىنشە, سول تولقىنعا ۋاقىتىندا ىلەسىپ, قاجەتتى مۇمكىندىكتەر الاڭىن ۇسىنۋ اسا ماڭىزدى. وسى ورايدا كوپفۋنكتسيالى مۋلتيمەديالىق بەينەستۋديا ءبىزدىڭ قالا مەن ينستيتۋت وقىتۋشىلارى, ستۋدەنتتەر ءۇشىن ساپالى مەدياكونتەنت قۇرۋعا تۇرتكى بولاتىنىنا سەنىمىم مول», دەدى ول.
ينتەراكتيۆتى بەينەستۋديا قاشىقتان وقىتۋ جانە شىعارماشىلىق قىزمەتتى ۇيىمداستىرۋدىڭ ەڭ زاماناۋي جانە ءتيىمدى شەشىمىنىڭ ءبىرى. ونىڭ بىرەگەي مۇمكىندىگىن پايدالانا وتىرىپ, ينتەراكتيۆتى بەينەنۇسقاۋلىقتار مەن بەينەدارىستەردى جازۋعا, بەينەساباقتار مەن كونفەرەنتسيالار وتكىزۋگە جانە تاعى باسقا دا جاڭاشىل ادىستەمەنى ءىس جۇزىندە جۇزەگە اسىرۋعا بولادى.
ءبىر جاعىنان, بۇل عىلىم جانە جوعارى ءبىلىم مينيسترلىگىنىڭ وقۋ ۇدەرىسىن تسيفرلاندىرۋ جونىندەگى تالاپتارىنا سايكەس كەلەتىن تسيفرلىق تەحنولوگيالار ارقىلى وقىتۋشىلار مەن ستۋدەنتتەردىڭ ءوزارا ءىس-قيمىلىنىڭ قۇندى قۇرالى ىسپەتتى.
سونداي-اق تسيفرلىق زەرتحانا فورماتى ينتەراكتيۆتىلىك پەن پاندەردى 3D مودەلدەۋ ارقىلى قاشىقتان ساباق وتكىزۋگە قولايلى. ەڭ نەگىزگىسى, بەينەستۋديا «Coursera» جانە «EDx» سياقتى حالىقارالىق پلاتفورمالارعا ارنالعان كونتەنت جاساۋعا, «zoom», «GoogleMeet», «WebEx» جانە باسقا قۇرالدار ارقىلى زاماناۋي Led-تاقتاعا ونلاين وقىتۋدى تاراتۋعا جانە ارالاس وقىتۋ تۇرىنە ارنالعان وقۋ مازمۇنىن ازىرلەۋگە مۇمكىندىك بەرەدى.
