نەگىزىندە ەلىمىزدىڭ پرەمەر-ليگاسىندا ونەر كورسەتەتىن كوماندالاردىڭ كوبى ترانسفەرلىك ساياساتتى ساۋاتسىز جۇرگىزىپ وتىر. ءبىر عانا مىسال, 2010 جىلدان بەرى ءتۇرلى كلۋبتار ويىنشىلاردى ساتىپ الۋ ءۇشىن 25,039 ملن جۇمساسا, ال ساتۋدان تۇسكەن تابىسى 14,261 ملن-دى قۇرادى. ياعني شىعىن – 10,778 ملن ەۋرو. سولاردىڭ اراسىندا «استانا» اقشانى وڭدى-سولدى شاشىپ جاتىر. ولار گانالىق پاتريك ءتۆۋماسيدى يسپانيانىڭ «الاۆەسىنە» 3 ملن-عا جانە كونگولىق دجۋنيور كابانانگانى ساۋد ارابياسىنىڭ ء«ال-ناسرىنا» 2 ملن-عا ساتقانى راس. سونداي-اق پەروس ءسوتيريۋدى – 800 مىڭعا, راي ۆلۋتتى – 250 مىڭعا, باحتيەر ءزاينۋتدينوۆتى – 115 مىڭعا, مارين ءانيچيچتى – 90 مىڭعا, زاۋىربەك پليەۆتى 50 مىڭعا «وتكىزدى». ءبىر قاراعاندا, ترانسفەردەن قوماقتى قارجى تۇسكەن سەكىلدى. بىراق ەلوردالىق كلۋبتىڭ شىعىنى ودان دا كوپ. وسى ورايدا «استانا» قازىناسى 6,305 ملن-عا تولىقسا, شىعىنى 7,426 ملن ەۋرونى قۇرايدى.
الماتىنىڭ «قايراتى» سوڭعى 14 جىلدا 11 ويىنشىنى وزگە كوماندالاردىڭ قاتارىنا قوستى. سولاردىڭ اراسىندا نۇرالى ءالىپ («زەنيت», سانكت-پەتەربۋرگ. 2 ملن), ادەرينسولا ەسەولا («ۆورسكلا», ۋكراينا. 800 مىڭ), ارتۋر شۋشەناچەۆ («حاپوەل», بەەر-شكۆا. 500 مىڭ) جانە انتون كراچكوۆسكي («دينامو» ماحاچكالا. 300 مىڭ) سىندى ساڭلاقتار بار. بىراق ولاردىڭ دا «العانىنان بەرگەنى» كوپ. «قايراتتىڭ» شىعىنى – 3,035 ملن ەۋرو. وزگە كوماندالاردىڭ ترانسفەرگە جۇمساعان اقشاسى مىناداي: «اقتوبە» (اقتوبە) – 1,105 ملن, «ەرتىس» (پاۆلودار) – 381 مىڭ, «شاحتەر» (قاراعاندى) – 225 مىڭ, «جەتىسۋ» (تالدىقورعان) – 125 مىڭ, «وقجەتپەس» (كوكشەتاۋ) – 52 مىڭ, «اقجايىق» (ورال) – 50 مىڭ جانە «توبىل» (قوستاناي) – 35 مىڭ ەۋرو.
جوعىردا ايتىلعان كەلەڭسىز جايتتار ترانسفەرلىك ساياساتتى ساۋاتتى جۇرگىزە الماۋدىڭ سالدارىنان تۋىنداپ وتىر. فۋتبول سالاسىنىڭ باسى-قاسىندا جۇرگەن باسشىلار مەن مەنەدجەرلەر, قاپتاعان دەلدالداردىڭ دەنى قاراقان باسىنىڭ قامىن عانا كۇيتتەپ جۇرگەنى بەلگىلى. ولار كوماندانىڭ مۇددەسىن ويلايدى دەگەنگە سەنۋ قيىن. سونىڭ سالدارىنان كلۋبتاردىڭ كوبى شىعىنعا بەلشەدەن باتىپ جاتىر. ال سول قاراجاتتىڭ باسىم بولىگى سالىقتان, ياعني ءسىز بەن ءبىزدىڭ قالتامىزدان تۇسەتىنىن ۇمىتپاعان ابزال. بىراق ونىڭ سۇراۋى جوق.
قازىرگى كەزدە قازاقستان قۇراماسى فيفا رەيتينگىندە 100-ورىندا تۇر. وزگەلەردى ايتپاعاندا, ىرگەمىزدەگى وزبەكستان (66-ورىن) مەن تاجىكستاننان (99-ورىن) قالىپ قويدىق. تىپتەن گۆينەيا, گوندۋراس, ەكۆادورلىق گۆينەيا, ومان, گابون, گايتي, سيريا, كيۋراساو, ۋگاندا, انگولا, ترينيداد پەن توباگو, پالەستينا, بەنين تاعى باسقالارى بىزدەن وزىپ تۇر. بۇلاردىڭ كەيبىرەۋى شاعىن عانا ەلدەر, كەيبىرەۋلەرى – قاندىبالاق سوعىس پەن اشارشىلىقتان كوز اشپاي, قالت-قۇلت كۇي كەشىپ وتىرعان مەملەكەتتەر. قۇدايعا شۇكىر, قازىر ەلىمىزدە جاعداي جامان ەمەس. جىل سايىن سپورتقا, اسىرەسە فۋتبولعا مول قارجى بولىنەدى. ەلىمىزدە وزگە سالادا ەڭبەك ەتىپ جۇرگەن ماماندارمەن سالىستىرعاندا, اياقدوپ شەبەرلەرىنىڭ تابىسى الدەقايدا جوعارى. بىراق پىسىقايلار فۋتبولدى مايشەلپەككە اينالدىرىپ وتىر. وسى ءسوزىمىزدىڭ بىردەن-ءبىر دالەلى – 30 جىلدان اسا ۋاقىت ارالىعىندا اياقدوپ ونەرىندە اۋىز تولتىرىپ ايتارلىقتاي تابىسقا جەتكەن جوقپىز. وسىنىڭ بارلىعىن باعامداي كەلە, مەملەكەتتىك بيۋدجەت پەن دەمەۋشىلەر تاراپىنان بولىنەتىن مول قارجى «قۇمعا سىڭگەن سۋداي جوق بولىپ كەتىپ جاتىر» دەپ ايتۋعا تولىق نەگىز بار. وسى ورايدا قاشاندا شىندىقتى بۇكپەسىز ايتاتىن تانىمال ارالاس جەكپە-جەك شەبەرى قۋات «نايمان» ءحاميتوۆتىڭ ء«بىر عانا كوماندا ويىنشىلارىنىڭ ءبىر ايلىق ەڭبەكاقىسى رەسپۋبليكامىزدىڭ ءار قيىرىندا بىرنەشە ساپالى سپورت كەشەندەرىن تۇرعىزۋعا جەتەتىن ەدى», دەپ شىرىلداۋى بەكەر ەمەس.
دەسەك تە ەلىمىزدە ترانسفەردى تابىس كوزىنە اينالدىرا بىلگەن كلۋبتار دا بار. ولار – «ورداباسى», «اتىراۋ» جانە «تاراز». ماسەلەن, ەسەپ-قيساپقا جۇيرىك شىمكەنتتىكتەر كەيىنگى 14 جىلدا نەبارى 547 مىڭ ەۋرونى سارپ ەتتى. ەسەسىنە 1,57 ملن-دى ءوز قازىناسىنا سالىپ, شامامەن ءۇش ەسەدەي كوپ پايدا كوردى. «ورداباسىنىڭ» تازا تابىسى – 1,023 ملن. وسى ورايدا ولار ەركەبۇلان تۇڭعىشباەۆ (870 مىڭ), گافۋرجان سۇيىمباەۆ (450 مىڭ) جانە نەمانيا كويچتى (250 مىڭ) جاقسى باعاعا «وتكىزە» ءبىلدى. «اتىراۋدىڭ» تابىسى – 437 مىڭ. مۇنايلى ولكەنىڭ ەڭ قىمبات ترانسفەرى – حۋسراۆ تويروۆ. تاجىكستاندىق جاس دارىندى ولار دونەتسكىنىڭ «شاحتەرىنە» 300 مىڭعا ساتتى. «تارازدىڭ» دا ەسەبى تۇگەل. ولار وزگە كوماندالارعا وزدەرىنىڭ ءتول تۇلەكتەرىن عانا اتتاندىرىپ جاتىر. 2013 جىلى جامبىلدىقتار باۋىرجان يسلامحان ءۇشىن كراسنوداردىڭ «كۋبان» كلۋبىنان 150 مىڭ السا, باحتيەر زاينۋتدينوۆ ءۇشىن «استانا» 46 مىڭ تولەدى. «تارازدىڭ» تازا تابىسى – 196 مىڭ ەۋرو.
