ولاردىڭ بارلىعى دا ادەتتەگىدەي سەرۋەندەۋدى ەمەس, قوستاناي قالاسىن وراپ اعاتىن وزەننىڭ جاعاسىن قوقىستان تازارتۋدى ماقسات تۇتقان ەدى. “بىرلىگىمىز جاراسقان!” اكتسياسىنىڭ شەڭبەرىندە وتكەن بۇل يگىلىكتى ءىستى باسقا ەمەس, اۋلا كلۋبتارىنىڭ بالالارى باستادى. “تازالىق” اكتسياسىنا قاتىسقان بالالار, قالا تۇرعىندارى, جاستار الدىمەن توبىل جاعاسىنداعى ىبىراي التىنسارين بابامىز كەسەنەسىنىڭ اينالاسىن تازارتتى. سونىمەن قاتار جۇرتشىلىق سۋعا شومىلاتىن جاعاجايلار, ادام كوپ جۇرەتىن جەرلەر قوقىستان تازارىپ قالدى. ەكولوگيالىق اكتسيا اۋىلداردا دا جالعاسىن تاپتى.
ءنازيرا جارىمبەتوۆا, قوستاناي.
شىعارماشىلىق وكىلدەرىمەن جۇزدەستى. وتكەن جۇمادا وبلىس اكىمى بولاتبەك قۋاندىقوۆ ءا.تاجىباەۆ اتىنداعى وبلىستىق امبەباپ عىلىمي كىتاپحانادا سىر ايماعىنىڭ بەلگىلى شىعارماشىلىق وكىلدەرىمەن جۇزدەستى. بۇل كەزدەسۋ “سىر ءوڭىرىنىڭ رۋحانياتى: كەشە, بۇگىن, ەرتەڭ” اتتى تاقىرىپ اياسىندا ءوتتى. وبلىستىق شىعارماشىلىق ينتەلليگەنتسيا وكىلدەرىمەن كەزدەسۋدە وبلىس اكىمى ايماقتاعى الەۋمەتتىك-ەكونوميكالىق باعىتتاعى اتقارىلىپ جاتقان اۋقىمدى شارالاردى ەگجەي-تەگجەيلى بايان ەتتى. اسىرەسە, ەلباسىنىڭ باستى باقىلاۋىندا تۇرعان يندۋستريالىق-يننوۆاتسيالىق جوبالاردىڭ ايماقتا جۇزەگە اسىرىلۋىنا باسا ءمان بەردى. شىعارماشىلىق وكىلدەرى دە ءوز وي-پىكىرلەرىن ورتاعا سالدى.
ەركىن ءابىل, قىزىلوردا.
“بالا شاقتان – بولاشاققا, انا تىلىمەن” . قازاقستاننىڭ بولاشاعى – مەملەكەتتىك تىلىندە. وڭتۇستىك –قازاقى وبلىس دەگەنمەن, ورىس ءتىلدى بالاباقشاعا بارىپ, ورتا مەكتەپتى ورىس تىلىندە تامامداعان, انا تىلىندە ءتىلى جاڭا شىققان بالاداي باس جارىپ, كوز شىعارىپ سويلەيتىن قانداستارىمىز مۇندا دا بار. وبلىستىق تىلدەردى دامىتۋ باسقارماسى “انا ءتىلى جانە وتباسى” جوباسى بويىنشا ۇلكەن بايقاۋ وتكىزدى. وعان ورىس ءتىلدى بالاباقشالاردا تاربيەلەنىپ جاتقان 4-6 جاس ارالىعىنداعى ەكى ءبۇلدىرشىن, تاربيەشى جانە ءبىر وتباسى مۇشەسى توپ قۇراپ, جارىسقا قاتىستى. وسى بايقاۋدا تۇركىستانداعى №33 بالاباقشا اتىنان تۇسكەن توپ باس بايگەنى جەڭىپ الدى. ال, ماقتارال اۋدانىنداعى “اسەم” بالاباقشاسى 1-ورىن, تۇلكىباس اۋدانىنىڭ “بالدىرعان” جانە شىمكەنتتەگى ء“ىنجۋ-مارجان” بالاباقشالارى ەكىنشى ورىن السا, كەنتاۋداعى ء“داۋىر” مەن قازىعۇرت اۋدانىنداعى “شولپان” بالاباقشالارى ءۇشىنشى ورىنعا يە بولدى.
باقتيار تايجان, شىمكەنت.
تۇركى تىلدەس تۇگەل بول!.. وبلىس ورتالىعىنداعى بۇقار جىراۋ اتىنداعى ادەبيەت جانە ونەر مۋزەيىنەن باستاۋ العان “تۇركى تىلدەس حالىقتاردىڭ جازبالار كۇنى” اپتالىعى “دوستىق ۇيىندە” بالقارلار, باشقۇرتتار, قاراشايلار, قىرعىزدار, تاتارلار, تۇرىكتەر, ۇيعىرلار, چۋۆاشتار, ءازىربايجاندار ءان سالعان تاماشا ونەر فەستيۆالىنە ۇلاستى. ال جالپى اپتالىق “تۇركى جازۋى – وتكەندى تانۋ” اتتى كورمە, چۋۆاش حالقىنىڭ جازبالارى مەن مادەنيەتى, تۇركى الەمىنە ارنالعان پوەزيا كەشى, ماحمۇد قاشقاريدىڭ ۇلى مۇرالارى اتتى ادەبي وقۋلار سياقتى تاريحي-تانىمدىق شارالارعا ارنالدى. اپتالىق سوڭى قالالىق ساياباقتا “قىمىزمۇرىندىق” مەرەكەسىنە جالعاستى.
فاريدا بىقاي, پاۆلودار.
برازيليا ەلشىسى – سىر ەلىندە. برازيليا فەدەراتيۆتىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى فەدەريكو س.دۋكە ەسترادا مايەر سىر ەلىندە بولىپ, بايقوڭىر عارىش ايلاعى, قورقىت اتا كەسەنەسى, كوكارال بوگەتى قۇرىلىسىمەن تانىستى. وسىدان كەيىن ول ءوڭىر باسشىسى بولاتبەك قۋاندىقوۆتىڭ قابىلداۋىندا بولىپ, ەكى ەل اراسىنداعى ساياسي-مادەني, دوستىق قارىم-قاتىناستار كەڭىنەن ءسوز ەتىلدى. وبلىس اكىمى مارتەبەلى مەيماندى سىر ايماعىندا جاسالىپ جاتقان جوبالاردان دا حاباردار ەتتى. كەزدەسۋدە وبلىس ورتالىعىندا بىرلەسكەن ءوندىرىس ورىندارىن اشۋ دا ءسوز بولدى. قابىلداۋدان كەيىن ەلشى بۇقارالىق اقپارات قۇرالدارى وكىلدەرىنە ارنايى سۇحبات بەرىپ, ەكى ەل اراسىنداعى قازىرگى تاڭداعى تاۋار اينالىمى 37,3 ملن. اقش دوللارىنا جەتىپ وتىرعانىن اتاپ ءوتتى.
ەركىن ءابىل, قىزىلوردا.
ارناۋلى انگە بايقاۋ جاريالاندى. بۇل كۇندە كەنشىلەر شاھارىندا “بىزدەر –قاراعاندىلىقتار” فەستيۆالى ءوتىپ جاتىر. وسى شارا اياسىندا “قاراعاندى ساعان ارنايمىز ءانىمىزدى” بايقاۋى جاريالاندى. ونىڭ نەگىزگى تالابى بويىنشا قالا تۋرالى ءاڭ تاڭدالىپ الىنادى. بۇعان باستاماشى بولۋشىلاردىڭ ءبىرى – ءاليا شوشاقوۆانىڭ ۇيىمداستىرۋىمەن جەرگىلىكتى تەلە جانە راديو ارنالارى ارقىلى اتالعان تاقىرىپقا ارنالعان اندەر جۇرتشىلىققا تانىستىرىلۋدا. بايقاۋ قورىتىندىسى تاياۋ كۇندەرى شىعارىلادى. قالا تۇرعىندارىنىڭ قاتىسۋىمەن تاڭدالعان ءان الداعى ۇلكەن مەرەكەلىك شارالاردىڭ بىرىندە شىرقالادى. ول قالا ءانۇرانىنا اينالادى. ءسوزىن جازۋشى مەن ءانىن شىعارۋشىعا جانە العاش ورىنداۋشىعا ارنالعان جۇلدە جەڭىمپازدارىن كۇتىپ تۇر.
ايقىن نەسىپباي, قاراعاندى.
“اتامەكەن” كورمەسى شاقىرادى. “جاستار” ساياباعىنداعى قازاق جازۋشىلارىنىڭ پاۆيلونىندا ادەبيەت زەرتتەۋشى, ابايتانۋشى قايىم مۇحامەدحانوۆ جانە جەرلەسىمىز, بيىل 70-كە تولاتىن اقىن توحتاربەك قىزىقباەۆقا ارنالعان كورمە ۇيىمداستىرىلدى. ونى شقو ساۋلەت-ەتنوگرافيالىق جانە تابيعي-لاندشافتىق مۇراجاي قورىعى ۇيىمداستىردى. كورمەدە اباي مەن شاكارىمنىڭ ەڭبەكتەرىن تەرەڭ زەرتتەپ جۇرگەن قايىم اعانىڭ ەڭبەكتەرى, شىعارمالارى, قۇندى سۋرەتتەر قويىلعان. ال جەرلەس اقىن, جۋرناليست توحتاربەك قىزىقباەۆتىڭ كيىمدەرىن, قۇندى زاتتارىن, قۇجاتتارىن, شىعارمالارىن اقىننىڭ جۇبايى روزا اپاي ۇسىنعان كورىنەدى.
وڭداسىن ەلۋباي, وسكەمەن.
