فوتو: el.kz
بۇل دا – كاسىپتىڭ ءتۇرى. الايدا تۇرعىندار تەز دايىندالاتىن تاعامنىڭ دەنساۋلىققا زياندى ەكەنىنە ءمان بەرمەيتىن سەكىلدى. دارىگەرلەر ءتىلى ءدام ۇيىرەتىن مۇنداي تاعامداردىڭ دەنساۋلىققا كەرى اسەرى بارىن جاسىرمايدى. اسىرەسە سەمىزدىككە ۇشىراتۋى عاجاپ ەمەس.
اتىراۋ وبلىستىق دەنساۋلىق ساقتاۋ باسقارماسىنىڭ ءبولىم باسشىسى نۇرسۇلتان حۋسانوۆتىڭ ايتۋىنشا, «دەنى ساۋ ۇلت» ۇلتتىق جوباسىندا سالاماتتى ءومىر سالتىن ۇستاناتىندار سانىن ارتتىرۋ مەن بۇقارالىق سپورتتى دامىتۋعا باسىم باعىت بەرىلگەن. ۇلتتىق جوبادا, اسىرەسە 14 جاسقا دەيىنگى بالالار اراسىنداعى سەمىزدىككە شالدىعۋدى تومەندەتۋ قاراستىرىلعان.
«سەمىزدىك – اعزادا ارتىق مايدىڭ جينالۋى. سەمىزدىكتىڭ ءتورت ساتىسى بار. ءبىرىنشى ساتىدا ادامنىڭ سالماعى ادەتتەگى قالپىنان 29 پايىزعا ارتادى. ال ەكىنشىسىندە – 50, ۇشىنشىسىندە – 100, ءتورتىنشى ساتىدا 100 پايىزدان اسىپ كەتەدى. سەمىرۋ تىنىس الۋ جانە جۇرەك-قان تامىرلارى جۇيەسىن وزگەرىسكە ۇشىراتادى. وكپە مەن جۇرەك قىزمەتىن السىرەتەدى», دەيدى ن.حۋسانوۆ.
ال جوعارى ساناتتى ەندوكرينولوگ بيبىگۇل ايتماعانبەتوۆانىڭ پىكىرىنشە, ارتىق سالماعى بار ادام ءتۇرلى اۋرۋعا ۇشىراۋى مۇمكىن. ماسەلەن, كەيىنگى 20 جىلدا ارتىق سالماقتان زارداپ شەگەتىن بالالار سانى ەكى ەسەگە وسكەن.
«كوبىنەسە 11 جاستاعى بالالار ارتىق سالماقتان زارداپ شەگەدى. بىلتىر اتىراۋ وبلىسىندا 10-15 جاستاعى 140 بالادان سەمىزدىك دياگنوزى انىقتالدى. بۇل 2022 جىلعى كورسەتكىشتەن 31 بالاعا كوپ. ارتىق سالماقتىڭ سالدارىنان ەكىنشى ءتيپتى قانت ديابەتى, گيپەرتونيا جانە جۇرەك-قان تامىرلارى اۋرۋلارىنىڭ پايدا بولۋىنا اسەر ەتەدى. مۇنىڭ سالدارى مۇگەدەكتىككە ۇشىراتۋى ابدەن مۇمكىن», دەيدى ب.ايتماعانبەتوۆا.
دارىگەردىڭ كەڭەسىنە قاراعاندا, سەمىزدىكتەن قۇتىلۋدىڭ بىرنەشە ءتيىمدى جولى بار. بىرىنشىدەن, ءبىر ورنىندا وتىرىپ قالماي, ءجيى قوزعالۋ قاجەت. ەكىنشىدەن, دۇرىس تاماقتانعان ءجون. ۇشىنشىدەن, ۇيقى رەجىمىن ساقتاۋ كەرەك. سونداي-اق گورموندارعا ارنايى اناليز تاپسىرۋدى ەستەن شىعارماعان ابزال.
اتىراۋ وبلىسى
