ءىس-شارا بارىسىندا 8 مىڭنان استام اۋماق تەكسەرىسكە الىندى. ولاردىڭ قاتارىندا اڭشىلىق جانە بالىق اۋلاۋ نىساندارى, ورمانداردى مەن جانۋارلار دۇنيەسىن قورعاۋ جونىندەگى مەملەكەتتىك مەكەمەلەردىڭ اۋماقتارى, سونداي-اق ەرەكشە قورعالاتىن تابيعي اۋماقتار بار.
وسىلايشا, ءبىر ايدا تابيعات قورعاۋ زاڭناماسىن بۇزعان 4 مىڭنان استام دەرەك انىقتالدى. ونىڭ ىشىندە جانۋارلار دۇنيەسى سالاسىندا – 2906 فاكت, بالىق شارۋاشىلىعى سالاسىندا – 621, ورمان شارۋاشىلىعى سالاسىندا – 25, جەر قويناۋىن پايدالانۋ سالاسىندا – 2, باسقا دا سالالاردا 709 فاكت تىركەلدى. سونداي-اق 4 مىڭعا جۋىق زاڭ بۇزۋشى ۇستالىپ, زاڭسىز بالىق اۋلاۋمەن اينالىسقان 11 ادامنان تۇراتىن ۇيىمداسقان قىلمىستىق توپتىڭ قىزمەتى توقتاتىلدى. زاڭسىز اينالىمنان 13 700 مەتر تىيىم سالىنعان بالىق اۋلاۋ تورى, 3,5 توننا بالىق جانە بالىق ونىمدەرى, 2793 اقبوكەن ءمۇيىزى, 188 ءتۇرلى قۇرال تاركىلەندى.
سوتقا دەيىنگى 86 تەرگەۋ باستالىپ كەتتى. مىسالى, قاراعاندى وبلىسىنداعى بالقاش كولىنىڭ سۋ ايدىنىندا پوليتسيا قىزمەتكەرلەرى زاڭسىز بالىق اۋلاعان ەر ادامدى ۇستادى. ول مۇز استىنا 300 مەترلىك اۋ قۇرىپ, ارقايسىسىنىڭ سالماعى 55 كيلو بولاتىن ەكى قاپ بالىق اۋلاپ ۇلگەرگەن. تابيعاتقا كەلتىرىلگەن زالال كولەمى 397 مىڭ تەڭگەنى قۇرادى. بالىق رەسۋرستارىن زاڭسىز ءوندىرۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر.
الماتى وبلىسىندا «سوربۇلاق» جاساندى كولىنىڭ اۋماعىندا ءتارتىپ ساقشىلارى 11 ادامنان تۇراتىن ۇيىمداسقان قىلمىستىق توپتىڭ ارەكەتىن توقتاتتى. ولار تىيىم سالىنعان بالىق اۋلاۋ قۇرالدارىمەن زاڭسىز بالىق اۋلاعان. جەڭىل ولجاعا كەنەلگىسى كەلگەن ازاماتتاردان 1 تونناعا جۋىق بالىق, ءتۇرلى قارۋ-جاراق پەن وق-ءدارى تاركىلەندى.
تابيعاتتى قورعاۋ پوليتسياسى بەكىتىلگەن اڭشىلىق القاپتاردا اڭ اۋلاۋعا بولاتىندىعىن ەسكە سالادى. اڭشىنىڭ قولىندا مەملەكەتتىك باجدى تولەۋ بەلگىسى بار اڭشى كۋالىگى, اڭ اۋلاۋعا رۇقسات, اڭشىلىق شارۋاشىلىعى سۋبەكتىسىنىڭ جولداماسى, اڭشىلىق اتىس قارۋىن الىپ ءجۇرۋ قۇقىعىنا رۇقساتى بولۋعا ءتيىس.
