بۇل قور تۇقىم تۇرلەرىن ۇزاق جىلدار بويى ساقتاۋ ءۇشىن سالىنعان. اسىرەسە وندا ادام ءومىرى ءۇشىن ماڭىزى زور ءداندى داقىلدار مەن دارىلىك وسىمدىكتەرگە كوپ ورىن بولىنگەن. تۇقىمدى ساقتاۋعا اتالعان ارالدىڭ تاڭدالۋى دا تەگىن ەمەس. ويتكەنى مۇندا ۇنەمى شىڭىلتىر اياز بولىپ تۇرادى. قويما تاۋدىڭ استىندا 120 مەتردە ورنالاسقان. تەڭىز دەڭگەيىمەن ەسەپتەگەندە 130 مەتر تەرەڭدىكتە جاتىر. تۇقىم قورى تولىقتاي مۇزداتقىشپەن جابدىقتالعان. ءتۇرلى اپاتتان ساقتايتىن ەسىكتەر مەن كامەرا قويىلعان.
وسى جوبانىڭ عىلىمي جەتەكشىسى ساقىش ەرجانوۆانىڭ ايتۋىنشا, قوردا ساقتاۋ ءۇشىن ەلىمىزدەن 8 بوتانيكالىق تۇرگە جاتاتىن جەمشوپ داقىلدارىنىڭ 522 ۇلگىسى ىرىكتەلىپ الىنعان. اسىرەسە جوڭىشقا داقىلدارىنا ەرەكشە نازار اۋدارىلدى.
ء«بىزدىڭ ەلىمىز جەر كولەمى جاعىنان الەمدە 9-ورىن الادى. سونىڭ 180 ميلليوننان استام گەكتارى جايىلىمدى قۇرايدى. شولەيتتى ايماقتار دا باسىم. جەرگىلىكتى تۇرعىندار ءۇشىن جايىلىم – مال ۇستاۋدىڭ كوزى. بىراق سونى جۇيەسىز پايدالانسا, جايىلىمدىق جەر ەروزياعا ۇشىرايدى. سونىڭ سالدارىنان جەمشوپ داقىلدارى مەن ولاردىڭ ەكوتيپتەرى دەڭگەيىندەگى گەنەتيكالىق ارتۇرلىلىك تارىلادى. الايدا جەم ءشوپ داقىلدارىنىڭ ءتۇرىن ەكوتيپتىك دەڭگەيدە ساقتاۋ وتە ماڭىزدى. وسىعان بايلانىستى 2015 جىلدان باستاپ, اكادەميك ع.مەيىرماننىڭ جەتەكشىلىگىمەن جەمشوپ داقىلدارىنىڭ جابايى ءتۇرىن جيناۋ ءۇشىن ەكسپەديتسيا ۇيىمداستىرىلىپ كەلەدى. جالپى, وسى ساپار ءبىزدىڭ ينستيتۋتتىڭ الەمدىك عىلىمي قوعامداستىقپەن بايلانىسىن ودان ءارى كەڭەيتە ءتۇستى», دەدى س.ەرجانوۆا.
