بۇعان دەيىن قۇتقارۋشىلار كەنىش ويىعىنا قۇلاعان اۆتوبۋستى ىزدەۋ جۇمىستارىن اقپان ايىنىڭ باسىندا توقتاتىپ, «مايقايىڭالتىن» اق شۇڭقىر تۇبىنە اۋىر تەحنيكا وزدىگىنەن ءجۇرىپ باراتىنداي جول سالا باستاعان. الايدا جۋىقتا مايقايىڭ كەنىشىندەگى جەر قازۋ جۇمىستارى تولىقتاي دوعارىلىپ قالعانى جايىندا اقپارات تارادى. قۇردىمعا قۇلاعان اۆتوبۋستى ىزدەۋ جۇمىستارى نە سەبەپتى توقتاتىلعانى تۋرالى «مايقايىڭالتىن» اق باس ديرەكتورى قۋانىش بوتين بىزگە بىلاي دەپ ءتۇسىندىردى:
– اقپان ايىنىڭ باسىندا قۇتقارۋشىلار بارلىق كەرەك-جاراعىن جيناپ, ىزدەۋ جۇمىستارىن توقتاتقانى ءمالىم. ءبىز جەر استىندا جاتقان قوس ازاماتتىڭ تۋىستارىنىڭ ءوتىنىشىن ەسكەرىپ, جەر قازۋ جۇمىستارىن ءوز كۇشىمىزبەن جالعاستىرامىز دەپ شەشتىك. اۋىر تەحنيكانىڭ كومەگىمەن بۇيىرلىك ترانشەيالار كەڭەيتىلىپ, ويىقتىڭ تۇبىنە دەيىنگى اپپارەلى تەرەڭدەتىلە باستادى. بۇل جۇمىستى ءۇش اپتادان اسا جۇرگىزدىك. الايدا مۇنداي ءىس-شارالاردى جۇرگىزۋ ءۇشىن اۋەلى جەر قازۋ جۇمىستارىنىڭ جوباسى ازىرلەنۋى كەرەك ەدى. ونى بىزبەن تۇراقتى بايلانىس ورناتقان ءبىر فيرما باستاپقىدا جاساپ بەرەمىز دەگەن. ولار ماسەلەنى زەردەلەي كەلگەندە, جاعدايدىڭ اسا كۇردەلى ەكەنىن ەسكەرىپ, جاۋاپكەرشىلىكتەن باس تارتتى. فيرما وكىلدەرىنىڭ ايتۋىنشا, جەر قازۋ جۇمىستارى بارىسىنداعى قاۋىپسىزدىكتى قامتاماسىز ەتۋ وتە قيىن. ال جوبانى ازىرلەۋشى كومپانيا ول جاۋاپكەرشىلىكتى ارقالاعىسى كەلمەيدى. سايكەسىنشە, ءبىز جۇمىستى ودان ءارى جالعاستىرا المادىق. بولماعان سوڭ سىرتتان مامانداردى شاقىرىپ, ويىقتى كورسەتتىك. ولار وسى بەتپەن قازا بەرسەڭىزدەر, ويىقتىڭ اينالاسىنداعى توپىراقتى بوساتىپ, جاعدايدى مۇلدە ۋشىقتىراسىڭدار دەپ ەسكەرتتى. بوساڭسىعان توپىراق كەز كەلگەن ساتتە جارىلىپ, جەر استىنا ءتۇسىپ كەتۋى مۇمكىن. بۇعان دەيىن قۇتقارۋشىلار اۆتوبۋس قۇلاعان جەردە, ياعني شۇڭقىر استىندا تەرەڭ قۇردىمدار پايدا بولعانىن ەسكەرتكەن. اۋىر تەحنيكا شۇڭقىر تۇبىنە تۇسسە ونسىز دا قوپسىپ تۇرعان كەن جىنىستارى ونىڭ سالماعىن كوتەرە الماي, وپىرىلىپ ءتۇسۋى مۇمكىن. بۇدان ادام شىعىنى بولۋى دا ىقتيمال. وسى جاعدايلاردىڭ بارلىعىن ەسكەرە كەلىپ, اقپان ايىنىڭ سوڭعى اپتاسىندا ءبىز باستاپقى شەشىمىمىزدى وزگەرتتىك. ال ىزدەستىرۋ جۇمىستارى الداعى ۋاقىتتا جالعاسا ما, جوق پا, ونى ايتا المايمىن. سەبەبى بۇل ءبىزدىڭ قۇزىرىمىزداعى ماسەلە ەمەس, دەيدى كاسىپورىن باسشىسى.
بۇعان قوسا ول قازىرگى كۇنى ءوندىرىس ورنى قوناەۆ اتىنداعى تاۋ-كەن ءىسى ينستيتۋتىمەن بايلانىس ورناتىپ وتىرعانىن مالىمدەدى. «وقۋ ورنىندا تاۋ-كەن ءىسىن جەتىك بىلەتىن مىقتى عالىمدار بار. ولاردىڭ كومەگىمەن التىن كەنىشىن تولىق تەكسەرىپ جاتىرمىز. شاحتامىزداعى كەن ءوندىرۋ ءىسى 4 قاڭتاردان بەرى تولىق توقتاپ تۇرعانى ءمالىم. «الداعى ۋاقىتتا كەنىشتەگى جۇمىستاردى قايتا جالعاستىرساق, جەر استىنداعى شاحتالار قانشالىقتى قاۋىپسىز بولادى, قىزمەتكەرلەرىمىزدىڭ ومىرىنە قاۋىپ تونبەۋى ءۇشىن نە ىستەي الامىز» دەگەن سۇراقتارعا عالىمدارمەن بىرگە جاۋاپ ىزدەستىرىپ كەلەمىز. ماماندار بارلىق جاعدايدى ەسەپتەپ, قوسىمشا زەرتتەۋلەر تاعايىندادى. بۇل ءىس-شارالاردىڭ بارلىعى 30 ناۋرىزعا دەيىن اياقتالۋى كەرەك. سودان سوڭ بارىپ, كەنىشتىڭ كەلەشەگى شەشىلەدى», دەپ تارقاتتى اڭگىمەسىن ق.بوتين.
ال وڭىرلىك توتەنشە جاعدايلار دەپارتامەنتى بۇعان دەيىن كەنىشتەگى جۇمىستارعا جۇمىلدىرىلعان قىزمەتكەرلەر مەن تەحنيكالار تولىقتاي ءوز قىزمەت ورىندارىنا قايتىپ ورالعانىن حابارلادى. قاجەت بولعان جاعدايدا دەپارتامەنت ماماندارى مايقايىڭعا كومەككە بارا الادى.
بۇگىندە «مايقايىڭالتىن» اق-نىڭ شاحتادان وزگە قۇرىلىمدىق بولىمشەلەرىندە, سونىڭ ىشىندە كەن بايىتۋ كومبيناتىندا جۇمىس تولىق شتاتتا جالعاسىپ كەلەدى. كاسىپورىن بويىنشا شامامەن 250-دەي ادام ءماجبۇرلى ەڭبەك دەمالىسىندا. باس ديرەكتور ولاردىڭ قىزمەت ارەكەتى شاحتامەن بايلانىستى بولعاندىقتان توقتاپ تۇر دەپ سەندىردى. قىزمەتكەرلەرگە جىلدىق ورتاشا ايلىق جالاقىسىنىڭ 50 پايىز كولەمىندە ەڭبەكاقى تولەنىپ جاتىر.
پاۆلودار وبلىسى
