القالى جيىندى جۇرگىزگەن ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ مەملەكەت باسشىسىنىڭ ۇلتتىق عىلىم اكادەمياسىن رەفورمالاپ, ونىڭ بۇگىنگى زامان تالابىنا ساي ماقساتى مەن مىندەتىن قايتا ايقىنداۋدى قولداپ وتىرعانىنا باسا نازار اۋداردى.
«مەملەكەت باسشىسى ق.توقاەۆ عىلىم سالاسىن دامىتۋعا اسا زور كوڭىل ءبولىپ وتىر. سونىڭ ناتيجەسىندە جاڭادان عىلىم جانە جوعارى ءبىلىم مينيسترلىگى, پرەزيدەنت جانىنداعى عىلىم مەن تەحنولوگيالار كەڭەسى قۇرىلدى. ۇلتتىق عىلىم اكادەمياسىنا جاڭا مارتەبە بەرىلىپ, عىلىم سالاسىن قارجىلاندىرۋ 3 ەسەگە ارتتى. عىلىم سالاسىنا كورسەتىلگەن قولداۋ عالىمدار قاۋىمداستىعىنا ۇلكەن مىندەت جۇكتەيدى. وسى ورايدا ۇلتتىق عىلىم اكادەمياسىن تاۋەلسىز, اكىمشىلىك ەمەس, مينيسترلىكتەردىڭ مىندەتتەرىن قايتالامايتىن, ۇكىمەتكە ساراپتامالىق تۇجىرىمدار بەرەتىن جانە فورسايتتىق ىزدەنىستەر جانە دە تەحنولوگيالىق بولجامدار نەگىزىندە وتاندىق عىلىمنىڭ ستراتەگيالىق دامۋ باعىتتارىن انىقتايتىن ورگانعا اينالدىرۋ مىندەتى تۇر. سونداي-اق عىلىمي ىزدەنىستەردىڭ الەمدەگى الدىڭعى قاتارلى عىلىمي ورتالىقتارى مەن مەكتەپتەرىنىڭ تاجىريبەسىنە نەگىزدەلگەن جاڭا فورماتىن ۇسىناتىن بولامىز. ۇلتتىق عىلىم اكادەمياسى ەل عىلىمىنىڭ ينتەگراتسيالانعان جۇيەسىن جاساپ, مەملەكەتىمىزدەگى عىلىم الەۋەتىنىڭ قورىن قۇراتىن بولادى. سونىمەن قاتار عىلىم سالاسىنا تالانتتى جاستاردى تارتۋعا مەيلىنشە ىقپال ەتەمىز», دەدى ول.
جيىن بارىسىندا قازاقستان عالىمدارى وداعىنىڭ پرەزيدەنتى ورازالى سابدەن, قازاقستان ەكونوميكالىق عالىمدار اكادەمياسىنىڭ پرەزيدەنتى راحمان الشانوۆ, قازاقستان ۇلتتىق جاراتىلىستانۋ عالىمدار اكادەمياسىنىڭ ءبىرىنشى ۆيتسە-پرەزيدەنتى ۆلاديمير شكولنيك, اۋىلشارۋاشىلىعى عىلىمدارى اكادەمياسىنىڭ پرەزيدەنتى تىلەكتەس ەسپولوۆ, حالىقارالىق رەپرودۋكتولوگيا اكادەمياسىنىڭ پرەزيدەنتى ۆياچەسلاۆ لوكشين ءسوز الىپ, ۇلتتىق عىلىم اكادەمياسىنىڭ جاڭاشا قادامىنا قولداۋ ءبىلدىرىپ, وزدەرىنىڭ ناقتى ۇسىنىستارىن ايتتى.
سونداي-اق عىلىمدى دامىتۋدىڭ وزەكتى ماسەلەلەرىن كوتەرگەن عالىمدار «عىلىم جانە تەحنولوگيالىق ساياسات تۋرالى» زاڭ جوباسىن جەتىلدىرۋ, عىلىمي جوبالاردى, ونەرتابىستاردى وندىرىسكە ەنگىزۋ, عالىمداردىڭ مارتەبەسىن كوتەرۋ مەن قارجىلاندىرۋعا قاتىستى تۇشىمدى ويلارىن ورتاعا سالدى.
جيىن سوڭىندا ۇلتتىق عىلىم اكادەمياسى مەن سالالىق جانە قوعامدىق اكادەميالار ىنتىماقتاستىق مەموراندۋمىنا قول قويدى.
الماتى
