ماسەلەن, بىلتىر 25 جەلتوقساندا 64 جاستاعى ايەل كەشكى مەزگىلدە وزەننىڭ ارعى بەتىنە وتپەك بولعان. الايدا مۇز ويىلىپ, زەينەتكەر سۋعا ءتۇسىپ كەتكەن. اۋداندىق پوليتسيا بولىمىنە تۇسكەن حاباردى ەستىگەن تاربيە جانە كادر بولىمشەسىنىڭ ينسپەكتورى رومان ناسيحان جەكە اۆتوكولىگىمەن وقيعا ورنىنا جەتكەن. ول اۆتوكولىگىنەن ارقان اكەلىپ, مۇز ۇستىنە شىققان ساتتە كومەككە كەلگەن وزگە ەر ادام مۇز ويىعىنا ءتۇسىپ كەتكەن.
پاترۋلدىك پوليتسيا ءبولىمىنىڭ قىزمەتكەرلەرى ارتۋر كارىموۆ, نۇرحات زۇلقاروۆ, ادىلبەك تەمىربولات, جاندوس يباتۋللاەۆ, اماندىق ايدىناليەۆ پەن ۋچاسكەلىك پوليتسيا ينسپەكتورى دارحان امانعاليەۆ وقيعا ورنىنا جەدەل جەتەدى. بىراق جۇقا مۇز ۇستىنە ءبىر مەزەتتە 10-عا جۋىق ادام شىققاندىقتان, مۇز ويىعى ۇلكەيە تۇسكەن. وسىنداي قاۋىپكە قاراماستان, پوليتسەيلەر وزەنگە قۇلاعان ايەل مەن ەر ادامدى قۇتقارىپ قالادى.
ال بيىل 5 ناۋرىزدا ءدال وسىعان ۇقساس وقيعا تاعى قايتالاندى. بۇل جولى 32 جاستاعى ايەل شارون وزەنىنىڭ ۇستىمەن وتۋگە بەكىنگەن. سول كەزدە مۇز ويىلىپ, وزەنگە قۇلاعان. ايەلدىڭ ايقايلاپ, كومەك سۇراعان داۋسىن سول ماڭنان ءوتىپ بارا جاتقان اۋداندىق پوليتسيا ءبولىمىنىڭ پاترۋلدىك پوليتسيا قىزمەتىنىڭ ينسپەكتورلارى, پوليتسيا اعا لەيتەنانتتارى شىڭتاس ءاليسۇلتان مەن باتىرجان باقىت ۇلى ەستىپ, كومەككە ۇمتىلعان.
پوليتسيا قىزمەتكەرلەرى وزەنگە قۇلاعان ايەلدى جاعاعا الىپ شىعىپ, وعان سول ساتتە العاشقى مەديتسينالىق كومەك كورسەتەدى. «قازىر اۋا رايىنىڭ جىلىنۋىنا بايلانىستى سۋ ايدىندارىنداعى مۇز جۇقارا باستادى. سول سەبەپتەن سۋ ايدىندارىنىڭ جاعالاۋىمەن, جارقاباق پەن جىلعالاردىڭ ۇستىمەن وتۋگە بولمايدى. ويتكەنى جۇقا مۇز ادام ومىرىنە قاۋىپتى. وسىعان وراي وزەننىڭ ۇستىمەن ءوتىپ, جول قىسقارتامىن دەۋ ومىرگە وتە قاۋىپتى ەكەنىن ەسكەرتەمىز», دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
اتىراۋ وبلىسى
