فوتو: ru.apa.az
سۇحبات «قاسىم-جومارت توقاەۆ: قازاقستان مەن ازەربايجان ىنتىماقتاستىقتىڭ جاڭا داۋىرىنە قادام باسادى» اتتى تاقىرىپپەن جارىق كوردى.
وندا قازاقستان پرەزيدەنتىنىڭ مەملەكەت باسشىسى رەتىندە ازەربايجانعا بارعان العاشقى رەسمي ساپارى قورىتىندىلانعان.
ق.توقاەۆ ءوز سوزىندە: «نورماتيۆتىك-قۇقىقتىق بازا بىرتىندەپ كەڭەيۋدە, تەك سوڭعى ءبىر جارىم جىلدىڭ ىشىندە 40-قا جۋىق ەكىجاقتى ماڭىزدى قۇجاتقا قول قويىلدى. الداعى ساپار بارىسىندا قول قويۋعا تاعى ءبىر اۋقىمدى قۇجاتتار پاكەتى دايىندالىپ جاتىر. ارينە, بۇل ءبىزدىڭ ءوزارا ءىس-قيمىلىمىزعا جاڭا قارقىن بەرەدى.
2020 جىلدان بەرى ەلدەرىمىز اراسىنداعى تاۋار اينالىمى 5 ەسەگە جۋىق ءوستى (109-دان 529 ميلليون دوللارعا دەيىن). بۇل اسەرلى ديناميكا جانە ءبىز كولەمدى ۇلعايتۋدى جوسپارلاپ وتىرمىز», دەپ اتاپ ءوتتى.
مەملەكەت باسشىسى 2022 جىلدىڭ تامىز ايىنداعى ساپارىندا قازاقستان ازەربايجاننىڭ فيزۋلي قالاسىندا بالالار شىعارماشىلىق ورتالىعىن سالىپ, تارتۋ ەتەتىنىن مالىمدەگەن ەدى. وسى ساپاردا سول ورتالىقتىڭ رەسمي اشىلۋ ءىس-شاراسى دا ۇيىمداستىرىلماق.
سونداي-اق سۇحباتتا كاسپي تەڭىزىنىڭ مۇمكىندىگىن ەكى ەلدىڭ ەكونوميكالىق ءوسىمى جولىندا ءتيىمدى پايدالانۋ, جاسىل ەنەرگياعا كوشۋ بارىسىندا تاجىريبە الماسۋ سىندى ت.ب. ماڭىزدى ماسەلەلەر قامتىلدى.
سۇحباتتىڭ تولىق نۇسقاسىن مىنا سىلتەمەدەن وقي الاسىز.
