جيىن بارىسىندا ۇلتتىق عىلىم اكادەمياسىنىڭ پرەزيدەنتى, اكادەميك اقىلبەك كۇرىشباەۆ ءداستۇرلى كوكتەم مەرەكەسى سۇلۋلىق پەن نازىكتىك, رۋحاني دانالىق كۇنى ەكەنىن اتاپ ءوتىپ, ايەلدەردىڭ ساياساتتاعى, ەكونوميكا جانە الەۋمەتتىك سالالارداعى جەتىستىكتەرىنە توقتالدى. ال ەل عىلىمىن دامىتۋعا قوسقان ايەلدەردىڭ ۇلەسى وراسان. بۇگىندە ولار جالپى عالىمداردىڭ 60 پايىزعا جۋىعىن قۇرايدى.
«حالىقارالىق ايەلدەر كۇنىن ءبىز ارقاشان دا كوكتەممەن بىرگە كەلەتىن جىلۋلىق پەن سۇلۋلىق ءرامىزى رەتىندە قابىلدايمىز. حالقىمىزدىڭ «جۇماق – انانىڭ ىزىندە, شۋاق – انانىڭ كوزىندە» دەگەن دانالىعىنا نازار اۋدارار بولساق, بۇگىندە ايەلدەردىڭ قوعامداعى الار ورنى ەرەكشە. ولار جانۇيانىڭ قامقورشىسى عانا ەمەس, قوعامنىڭ بارلىق سالاسىنىڭ دامۋىنا وراسان زور ۇلەس قوسىپ وتىرعان بەلسەندى تۇلعالار. عىلىم مەن ءبىلىم بەرۋ سالاسىنا قوسىپ جۇرگەن ۇلەسى قوماقتى. ستاتيستيكالىق دەرەكتەرگە سۇيەنسەك, جىل سايىن عىلىمي جۇمىستارمەن اينالىساتىن ايەلدەردىڭ قاتارى كوبەيىپ كەلەدى. مىسالى, 2015 جىلى ولاردىڭ ۇلەس-سالماعى 50 پايىز بولسا, بۇگىنگى تاڭدا بۇل كورسەتكىش 54,5 پايىزعا جەتىپ وتىر. ياعني سالاداعى جەتىستىكتەردىڭ باسىم كوپشىلىگىنە نازىك جانداردىڭ ەڭبەگىنىڭ ارقاسىندا قول جەتكىزىپ كەلەمىز», دەدى ا.كۇرىشباەۆ.
مەملەكەت باسشىسى عىلىمدى دامىتۋعا بايلانىستى عالىمدار الدىنا ۇلكەن مىندەتتەر جۇكتەپ وتىر. بۇگىندە ەل ەكونوميكاسىنداعى ەڭبەك ونىمدىلىگىن 2 ەسە ارتتىرۋدىڭ ستراتەگيالىق مىندەتىن عىلىمنىڭ قولداۋىنسىز ىسكە اسىرۋ مۇمكىن ەمەس. بۇل زەرتتەۋ قىزمەتىن ۇيىمداستىرۋدى تۇبەگەيلى قايتا قاراۋعا, ەسكى كوزقاراستاردان ارىلۋعا, عىلىمدى باسقارۋ ورگاندارىنىڭ فۋنكتسيالارى مەن وكىلەتتىكتەرىن ناقتىلاۋعا جانە عالىمداردىڭ زياتكەرلىك الەۋەتىن تولىق اشۋعا ىنتالاندىراتىن جاڭا تەتىكتەردى ىسكە اسىرۋعا مىندەتتەيدى. الەمدىك عىلىمي ورتالىقتارمەن باتىل ينتەگراتسيالانىپ, ولاردىڭ وڭ تاجىريبەسىن قابىلداپ, بەيىمدەۋ ۋاقىت تالابىنان تۋىنداپ وتىر. وسى تۇيتكىلدى ماسەلەلەردى ارقاۋ ەتە وتىرىپ, ۇعا پرەزيدەنتى ا.كۇرىشباەۆ بۇل ماسەلەدە عىلىمي قوعامداستىقتىڭ ايەلدەر بولىگىنىڭ رولىنە باسا نازار اۋدارۋ قاجەتتىگىن العا تارتتى.
ء«بىلىم بەرۋ, كادرلار دايارلاۋ, ءبىلىمدى تاراتۋ جانە عىلىمي زەرتتەۋلەردىڭ ناتيجەلەرىن وندىرىسكە ەنگىزۋ ۇردىسىنە بەلسەندى قاتىساتىن ايەل عالىمداردى قولداۋ, ولاردىڭ كاسىبي جانە مانساپتىق وسۋىنە جاعداي جاساۋ, پەرسپەكتيۆالى جانە كرەاتيۆتى ايەلدەردى باسشىلىق لاۋازىمدارعا باتىل ۇسىنۋ جونىندە قوسىمشا شارالار قابىلداۋ ۋاقىت تالابىنان تۋىنداپ وتىر. وسىنى ىسكە اسىرىپ, عالىم ايەلدەردىڭ مارتەبەسىن ارتتىرۋ ماقساتىندا ۇلتتىق عىلىم اكادەمياسى قازاقستان مەن ورتا ازياداعى تۇڭعىش ايەل-اكادەميك, كورنەكتى فيزيولوگ, قازاق كسر عىلىم اكادەمياسىنىڭ اكادەميگى, بيولوگيا عىلىمدارىنىڭ دوكتورى, پروفەسسور, قازاق كسر ەڭبەك سىڭىرگەن عىلىم قايراتكەرى نايلا بازانوۆا مەدالىن تاعايىندادى. بۇل ماراپات الداعى ۋاقىتتا عىلىمداعى ايەلدەردىڭ جەتىستىكتەرى مەن عىلىمي سالانىڭ دامۋىنا قوسقان ۇلەستەرىن ەسكەرە وتىرىپ بەرىلەدى», دەدى عىلىم اكادەمياسىنىڭ پرەزيدەنتى.
مەرەكەلىك جيىنعا وڭىرلەردەن قاتىسقان 70-تەن استام عالىم ايەلدەر عىلىمدى دامىتۋمەن قاتار ءبىلىم ساپاسىن جەتىلدىرۋ, وسكەلەڭ ۇرپاقتى زاماناۋي بىلىممەن سۋسىنداتىپ, ۇلتتىق قۇندىلىقتارعا باۋلۋ توڭىرەگىندە وي ءوربىتتى. مۇنىمەن قوسا عالىم ايەلدەردىڭ مارتەبەسى, الەۋمەتتىك احۋالى مەن زەرتتەۋ جۇمىستارىنا, عىلىمي جوبالارعا قاتىسۋىنا بايلانىستى بىرقاتار ۇسىنىس ايتىلدى.
الماتى
