باقىت كامالقىزى قازاقستان رەسپۋبليكاسى مەملەكەتتىك ورتالىق مۋزەيىندە ۇزاق جىل قىزمەت ەتتى. وندا قازاق ايەلىنە بايلانىستى كوپتەگەن ەكسپونات ەل نازارىنا ۇسىنىلعان. «ەجەلگى داۋىردەن بەرى قازاق ايەلىنىڭ موينىنا كوپتەگەن ماڭىزدى مىندەتتەر ارتىلعان. ايتسە دە, تۇرمىستىق دەڭگەيدەن باستاپ, مەملەكەتتىك دارەجەدەگى ايەل ادامنىڭ ءرولى ايرىقشا بولعان. ءبىزدىڭ حالىق ەشقاشان قىز بالاسىن تومەن تۇسىرمەگەن. قۇرمەتتەپ ءتورىن بەرگەن. قىز-كەلىنشەكتەر ساياسي ىستەرگە دە ەركىن ارالاسا العان. بۇل تۋرالى قازاقتاردىڭ ءومىرىن زەرتتەگەن ەۋروپا ەتنوگرافتارى ءبىراز دەرەك قالدىرعان», – دەيدى ول.
1997 جىلى الماتى قالاسىنا امەريكانىڭ ءبىرىنشى حانىمى حيللاري كلينتون قوناق بولادى. باقىت ورازىمبەتوۆانىڭ ايتۋىنشا, وعان قازاق حالقىنىڭ قىز بالاسىن تاربيەلەۋدەگى ەرەكشەلىكتەرى قىزىقتىرعان. «وسى جاۋاپتى كەزدەسۋدىڭ الدىندا مەن اقش ەلشىلىگىنىڭ قىزمەتكەرلەرىنەن ءبىرىنشى حانىمنىڭ ومىربايانىمەن تانىستىرۋدى سۇرادىم. كوپتەگەن ماڭىزدى دەرەكتىڭ ىشىنەن مەن كلينتون حانىمنىڭ ءوزىن «ماڭگىلىك شاكىرت» دەپ سانايتىنىن ءبىلدىم. بۇل ونىڭ جاڭا ءبىلىمدى قابىلداۋعا ارقاشان دايىن ەكەنىن ءبىلدىردى. بۇل – ەكسكۋرسوۆود رەتىندە ماعان ەرەكشە جاۋاپكەرشىلىك جۇكتەدى», – دەيدى مامان. ەكسكۋرسيادان كەيىن كوپ ۇزاماي مۋزەي باسپاسوزىنە اقش ەلشىلىگىنەن حات كەلدى. وندا كلينتون حانىم باقىت ورازىمبەتوۆا باستاعان مۋزەي ۇجىمىنىڭ جوعارى كاسىبيلىگىنە, قازاق مادەنيەتى تۋرالى تەرەڭ اڭگىمەلەرى ءۇشىن العىس بىلدىرگەن كورىنەدى.
باقىت كامالقىزىنىڭ ءدارىسىن تىڭداۋعا كەلگەن مارتەبەلى قوناقتاردىڭ ىشىندە رەسەي فەدەراتسياسىنىڭ باتىرى ميحايل كالاشنيكوۆ تا بولدى. «مەن ادەتتە تەحنيكالىق ماماندىقتاعى تالانتتى ادامدارىڭ مەيىرىمدى جانە ادەپتى ەكەنىن بۇرىننان بايقايتىن ەدىم. ميحايل تيموفەەۆيچ مەنىڭ وسى باقىلاۋىما سايكەس كەلدى. ول سوعىسقا دەيىنگى جىلدارى ءوزى ءومىر سۇرگەن الماتى وبلىسىنداعى ماتاي اۋىلىنا ارنايى كەلىپتى. ايتپاقشى, ول ءدال سول جەردە ءوزىنىڭ اۆتوماتىنىڭ العاشقى سىزبالارىن جاساعان بولاتىن. مۋزەيگە كەلگەندە م.كالاشنيكوۆ قازاقستان تۋرالى جىلى ەستەلىكتەرىن ايتتى. تۇركىلەردىڭ التىن بەسىگى – التايدىڭ تۋماسى بولعاندىقتان, ول كوشپەلى وركەنيەتتىڭ تاريحىنا وتە قاتتى قىزىعۋشىلىق تانىتتى», – دەيدى. ايتۋىنشا, ول قازاق مادەنيەتى مەن تۇرمىس زاتتارىنا ءتانتى بولىپتى. قازاق اۋىلىنداعى بالالىق شاعىن ەسكە الىپ, قازاق ايەلدەرىنىڭ مىقتىلىعىنا ايرىقشا توقتالعان.
باقىت ورازىمبەتوۆا ەكسكۋرسيا كەزىندە اقپاراتتى جالاڭ بەرىپ قويمايدى. ول ابايدىڭ, مۇحتار اۋەزوۆتىڭ سونىمەن قاتار, الەم ادەبيەتىنىڭ ءىرى وكىلدەرى – تولستوي, رەمارك, فلوبەردىڭ قاناتتى سوزدەرىن, عيبراتتى ءتالىمىن تىلىنە تيەك ەتىپ وتىرادى. وسىلايشا, بىلىكتى مامان مۋزەي قوناقتارىن تاريحتىڭ جاڭا كەڭىستىگىنە كوتەرىپ, قازاق مادەنيەتىن اسقان سۇيىسپەنشىلىكپەن تانىستىرادى.
