مەكتەپتەردى جاڭا فورماتسياداعى پەداگوگيكالىق كادرلارمەن قامتاماسىز ەتۋ ماقساتىندا عىلىم جانە جوعارى ءبىلىم مينيسترلىگى مەن استانا قالاسى ءبىلىم باسقارماسىنىڭ قولداۋىمەن اباي ۋنيۆەرسيتەتىنىڭ 181 ستۋدەنتى باس قالامىزدىڭ 32 ءبىلىم بەرۋ ۇيىمىنا وندىرىستىك تاجىريبەگە كەلگەن. سول ستۋدەنتتەرمەن ەۋرازيا ۇلتتىق ۋنيۆەرسيتەتىندە كەزدەسۋ ءوتتى. وعان مينيستر ساياسات نۇربەك جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورلارى, استانا قالاسى ءبىلىم باسقارماسىنىڭ جاۋاپتى ماماندارى, وقۋ ورىندارىنىڭ باسشىلارى قاتىستى.
مازمۇندى شارا بارىسىندا س.نۇربەك 2023-2029 جىلدارعا ارنالعان جوعارى ءبىلىم مەن عىلىمدى دامىتۋ تۇجىرىمداماسىنا, كادرلارمەن قامتاماسىز ەتۋگە جانە پەداگوگيكالىق ءبىلىم بەرۋ ماسەلەلەرىنە كەڭىرەك توقتالدى. تاجىريبەدەن وتۋگە كەلگەن تالاپتى جاستارعا قولداۋ كورسەتىپ, باعىت سىلتەدى. سونداي-اق جاستاردىڭ وزدەرىنە ارتىلعان جاۋاپتى ءىستى لايىقتى الىپ شىعاتىنىنا سەنىم ءبىلدىردى.
– بۇگىندە استانادا پەداگوگ كادرلاردىڭ تاپشىلىعى بايقالادى. جىل سايىن ەلوردادا ونداعان مەكتەپ پايدالانۋعا بەرىلەدى. بۇل مۇعالىمدەرگە دەگەن قاجەتتىلىكتىڭ ارتىپ كەلە جاتقانىن كورسەتەدى. ستۋدەنتتەردىڭ بۇگىنگى قادامى وسى ماسەلەنى شەشۋگە كومەكتەسەدى دەپ سەنەمىن. جالپى جاڭا دەڭگەيدەگى پەداگوگ كادرلاردى دايارلاۋدى ۇنەمى نازاردا ۇستايمىز, – دەدى مينيستر.
كەزدەسۋگە قاتىسقان ستۋدەنت-پراكتيكانتتاردىڭ دا جۇزدەرى بال-بۇل جانىپ, ريزالىق كەيىپتە بولعانىن بايقادىق. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى يمانعالي مامبەتالى بۇل وزدەرى ءۇشىن جاڭا ورتا عانا ەمەس, قولايلى مۇمكىندىك ەكەنىن ايتتى.
– ءبىز – اباي ۋنيۆەرسيتەتىنىڭ ءتورتىنشى كۋرسىندا وقيمىز. وسىنداي مۇمكىندىك تۋعىزعان عىلىم جانە جوعارى ءبىلىم مينيسترلىگى مەن استانا قالاسى ءبىلىم باسقارماسىنا ريزاشىلىعىمىزدى بىلدىرەمىز. ءبىر جاعىنان, بۇل – ۇلكەن جاۋاپكەرشىلىك. ءبىز وسىنداي تاجىريبەنىڭ ۇيىمداستىرىلعانىنا قۋانامىز. وقۋ وردالارى ءبىزدى جىلى قابىلدادى. مەملەكەتىمىز ستۋدەنتتەردىڭ ساپالى ءبىلىم الۋىنا بارلىق ءىس-شارا قابىلداپ جاتىر. سول سەنىمدى اقتاۋعا كۇش سالامىز, – دەدى ول ريزا كوڭىلمەن.
مەملەكەت باسشىسى قاسىم-جومارت توقاەۆ بىلتىر قازان ايىندا وتكەن رەسپۋبليكالىق پەداگوگتەر سەزىندە ەلىمىزدە 5 مىڭ پەداگوگ جەتىسپەيتىنىن ايتقان بولاتىن. بۇل كورسەتكىش جىلدان-جىلعا ارتىپ كەلەدى. ال پەداگوگيكا سالاسىندا وقىعان ءاربىر بەسىنشى تۇلەك ءوز ماماندىعىمەن جۇمىس ىستەمەيدى ەكەن. بۇعان قوسا مۇعالىمدەردىڭ 23 پايىزىندا عانا جوعارى بىلىكتىلىك ساناتى بار. مۇنىڭ ءبارى پەداگوگتەردى دايارلاۋ جانە ولاردىڭ بىلىكتىلىگىن ارتتىرۋ تاسىلدەرىن تۇبەگەيلى وزگەرتۋدى قاجەت ەتەدى.
